Bélidɔwesɛbɛ Fiézan 26 - Kazambale lé Sebe Sauunu 1979

Féifɛ vininzannu — Lɛɛ yaazan

¹ Dé ka bɔ tɛrɛ lé Gakelebale, kalé Bale a nɔ ka lɛ tɔnɔfɛ nya, a ta, dé ka a kɛlɛ kazé nya yé ka suni wɔra ana,

² kalé tɛrɛ lé Gakelebale, kalé Bale a nɔ ka lɛ, ka dan a ta féifɛ vininnu faa si lɛ yé ka wo pa kyɛɛ gi yé ka go wo nya fɛna do lé Gakelebale, kalé Bale é dan a si lɛ a va é tɔ pale a ma we ma, ana.

³ Balebanzan lé é ke nyanama pana ’bɛ bléyi va, ka dan a nɔ lɛ ’bɛzan lɛ yé ka dan a fe lɛ a lɛ léé: Kyɔ, maa a fena Gakelebale, ilé Bale lɛ léé, an bɔ tɛrɛ lé Gakelebale ébo ’nyɔɔn ko tranu lɛ léé, é dan a nɔ lɛ ko lɛ, a ta.

⁴ Balebanzan é dan kyɛɛ si lɛ i lee yé é dan a dɔra lɛ Gakelebale, ilé Bale banna ’lɛ.

⁵ Yé i dan we fe lɛ é ziin, yé i dan a fe lɛ Gakelebale, ilé Bale lɛ léé: An ti a Aramé mi nya, nɔɔzan nya; é go Éjipiti tɛrɛ la, ’té alé munu a sɛ, yé é nyana ’bɛna; ’bɛna lé é kɛlɛ bɛn blɛn plɛplɛ nya, yé alé mi kɛlɛ kiɛre.

⁶ Éjipiti munu nyané pa ko ta yé wo yaa ko ta, yé wo nyanama tɔntɔn nɔ ko lɛ.

⁷ Ko siaa Gakelebale, ko tranu lé Bale lɛ. Gakelebale ko dére ’ma yé kolé nyanéblele koo, kolé we tɔntɔn koo, wo yaa ko ta fɛan zo koo, é a ye.

⁸ Yé Gakelebale ko si Éjipiti tɛrɛ la é bɛ plɛplɛ soile nya, ’té di kinié migiwe koo, tɔmasenu koo, gyɛzorowenu koo, ’té éé wo kɛla.

⁹ É da ko nya fɛkona, yé é tɛrɛ nyɔnɔzan ’ko nɔ ko lɛ.

¹⁰ Sin, oo Gakelebale, tɛrɛ lé bé nɔ an lɛ bɛ, a tafɛ vininnu lé maa da a nya i lɛ ’ko. I dan wo dɔra lɛ Gakelebale, ilé Bale ’lɛ, yé i dan dia lɛ i bli la Gakelebale, ilé Bale ’lɛ.

¹¹ ’Bɛ zuo i gi é dan nana lɛ fɛ zinnu faa lé Gakelebale, ilé Bale a nɔ bii valé ilé munu lɛ, wolé we ma, ’té Lévimi valé bɛn bɛnu lé é ke ka va, ’té wo gi éé nanaan é ziin ka va.

¹² Lɛɛ fié a yaazan gi, ’bɛ gi léé, fɛvuzan lé lɛɛ, dé ka nyaa kalé fɛnu faa vuzan sile nya, ka dan a nɔ lɛ Lévi mi koo, bɛn bɛ mi koo, ti valé bugalazan koo, zanagalale koo, wo lɛ; wo dan a ble lɛ yé wo dan kan lɛ kalé fɛna.

¹³ I dan a fe lɛ Gakelebale, ilé Bale lɛ léé: We lé i an béli dɔ a nya, maa a faa kɛlɛ, fɛ lé é ke é pale é yɛrama, maa a si anlé kɔn gi yé maa a nɔ Lévi mi koo, bɛn bɛ mi koo, ti valé bugalazan koo, zanagalale koo, wo lɛ; maa ’ka i sɔnné do kpen saan lɛ lo, an gi ’ka san lɛ a do kpen ma lo.

¹⁴ Bléyian va lé maa a gyɛ bona, maa ’ka fɛ ’ko do kpen ble lɛ lo; bléyian va lé maa ’ka tegele lo maa ’ka an bɛ mane lɛ wo ma lo; maa ’ka a do kpen kɛlɛ lɛ gyɛbofɛ nya lo; maa Gakelebale, anlé Bale dére ’ma, yé we faa lé bé fe an lɛ, maa we kɛlɛ ’bɛ yɛrama.

¹⁵ Bii lé i ke la gi i nyanana sauun na bɛ, bé nagini; ’ilé munu Izraɛl drɔɔ vo, tɛrɛ lé bé nɔ ko lɛ, ibo ’nyɔɔn ko tranu lɛ fɛan zo, a zo, tɛrɛ nyɔnɔzan ’ko, bé drɔɔ vo ma.

Gakelebale lé munu bozen

¹⁶ Kyɔ, Gakelebale, kalé Bale ka béli dɔ léé, ’ka tawo bélidɔwe ’konu valé kalé gɔnɔlawe ’konu yɛrama. ’Ka tawo wo ta yé ’ka wo kɛlɛ ka bli faa valé ka boen faa nya.

¹⁷ Kyɔ, Gakelebale lé ka lɛ léé, é dan kɛlɛ lɛ kalé Bale nya, léé, ’ka tawo ’élé tawobɛ gi, yé ’ka ’élé bélidɔwenu ta tawo, yé ’ka ’é sɔnnénu pa yé ’ka ’élé gɔnɔlawenu kɛlɛ yé ’ka ’é dére lɛdɔma.

¹⁸ Kyɔ, ka a fe Gakelebale lɛ léé, ’wo dan kɛlɛ lɛ alé munu ta drɔɔ nya, é a fe ’wo lɛ é kyɛn fɛan zo, a zo, yé ’wo dan tawo lɛ alé bélidɔwenu faa ta, léé,

¹⁹ bɛn faa gi munu lé é wo kɛlɛ tɛrɛ la, kazé mini wo lɛ; ka lɛdɔmale koo, ka tɔbɔle koo, kalé fua koo, é dan mini lɛ wozé ta, yé ka dan kɛlɛ lɛ munu lé Gakelebale, kalé Bale wo pa é yɛrama ézé nya, wo nya, é a fe ka lɛ fɛan zo, a zo.