Bélidɔwesɛbɛ Fiézan 25 - Kazambale lé Sebe Sauunu 1979

Wesiale

¹ Dé munu we sia yé wo da wolé we nya weblezannu va, mi lé we ’ka a gyɛ lɛ lo, ’é vo, yé ’wo we dɔ wegyɛzan nwiin.

² Dé wegyɛzan bla yara lé, weblezan é dan a fe lɛ léé, ’é yia, yé alé wenyané a fɛan zo, wo dan a péli gyɛ lɛ ’bɛ yɛrama weblezan yuɛ va.

³ Té wo fɛ duun a lɛ yé é gié yɔ fié ta lo; dé a blale gié ’bɛ ta, dé i bwe é da kɛlɛ i yuɛ gi bélé wi zo.

⁴ Dirigɔné lé ke ’sa sunwona, té bé ’léé lɛ tan lo.

Bwe na sile

⁵ Dé bwe fié nyana ékeva, dé wo va mi do ga yé a be ’ka lo, té gazan na é go bo si fɛ bɛna lo; a zana bwe é dan go lɛ a va yé é dan a si lɛ é na nya, é a lé mi a kɛlɛ é bwe lɛ fɛan zo, a zo.

⁶ Né vininzan lé le ’ko a yaa, é dan kɛlɛ lɛ a zana lé é ga, a be nya, yé wo dan a laa lɛ gazan tɔ nya, té a tɔ é san Izraɛl lo.

⁷ Dé é ’ka sɔ lɛ gɔnézan lɛ léé, é bwe na si lo, lezan é dan go lɛ flagɔrɔ ’léé, yé é dan fe lɛ mi segelenu lɛ léé, ’é zana bwe ’ka a va léé, é ’é bwe tɔ vo Izraɛl lo; é ’ka a nyi sié lee, é ’é si, é a lé wa kɛlɛ ’wo bwe lɛ fɛan zo, yé é a kɛlɛ a lɛ a zo lo.

⁸ Fla mi segelenu é dan a laa lɛ yé wo dan we fe lɛ a lɛ. Dé é dɔ ézé ta, yé é léé, é ’ka a va léé, é le ’ko si lo,

⁹ a bwe na é dan bié lɛ a ma mi segelenu yuɛ va yé é dan alé sawala si lɛ a gane ma yé é dan ’é ’léli vɔ lɛ a yara. Yé lezan é dan a fe lɛ léé, ’bɛzo lé wa kɛla mi lé é ’ka a nyi sié léé, ’é bwe tɔ vo ’é pagi lo, a lɛ.

¹⁰ Yé Izraɛl tɛrɛ la wo dan gɔné ’ko lé kɔn laa lɛ, sawala sié ganemazan lé kɔn.

¹¹ Dé mi fié a guli danna, dé wo va mi do na da, é zana sile a blazan lee we ma, dé é kun gɔnézan ’ko ma alé sɔ wuo,

¹² ka dan a bɛ kini lɛ; té ka nyanai do kpen zén a ta lo.

Fɛdangi fɛnu

¹³ Té i kilo lé poa fié pa ilé saki gi lo, ’té a do a blɛn, ’té a do a kiéné lo.

¹⁴ Fɛdanfɛ lé wa laama éfa bɛ, té a gɔnɔ ’é kɛlɛ fié ilé kɔn gi lo, ’té a do a blɛn ’té a do a kiéné lo.

¹⁵ Ilé kilo poa ’é kɛlɛ tegele ’kyɛ, yé ilé éfa ’é kɛlɛ tegele ’kyɛ, ka mɔnle we gi, tɛrɛ lé Gakelebale, kalé Bale a nɔ ka lɛ, a ta.

¹⁶ Dé mian éé we’konu kɛla, dé mian éé weple kɛla, é a bélé bo zo Gakelebale kalé Bale yuɛ gi.

Amalɛknu kuru gale

¹⁷ Bléyian va lé ka fwi Éjipiti tɛrɛ la, we lé Amalɛk munu a kɛlɛ ka lɛ zia, a sele ’é dɔ ka gi ma;

¹⁸ wo da guli dan lɛ ka va zi ta, té Gakelebale lee kanale ’ka wo gi lo, yé wo baa ka ta ka zuozia, yé ka vamunu lé wo ke mɔnna zi zuo wo baa wo ta, ’té ka wɔlɛi nyaa ka ma, ’té ka fuu ’ka ka ta lo.

¹⁹ Dé Gakelebale kalé Bale ka si ka nyanézannu lé ke ka zi, wo lee faa, tɛrɛ lé Gakelebale, kalé Bale a nɔ ka lɛ kazé nya, kalé tɔnɔfɛ nya, dé é flinle nɔ ka lɛ a ta faa, ka dan Amalɛk munu sele saan lɛ munu faa gi tɛrɛ la; té ka gi é san ’bɛ ma lo.