Bélidɔwesɛbɛ Fiézan 24 - Kazambale lé Sebe Sauunu 1979

Le bɔrale valé le bɛ sile

¹ Dé gɔné do le do si yé é yia a va, yé ’bɛ zuo é yaragyɛwe ye a ma yé é ’ka sɔ lɛ a lɛ é dɛrɛ lo, é dan lebɔrasɛbɛ gyɛ lɛ yé é dan a nɔ lɛ lezan lɛ, yé é si alé kɔn ’léé.

² Dé é si a va, dé é go, é bɔalɛ léé, é gɔné bɛ si.

³ Dé é ’ka sɔ lɛ gɔné fiézan lɛ lo, yé é lebɔrasɛbɛ gyɛ yé é a nɔ a lɛ yé é si alé kɔn ’léé, dé ’bɛ kaan lo, dé gɔné fiézan lé é lezan si é na nya bɛ, dé é ga,

⁴ té a zana vininzan a si é na nya é ziin lo; é ’ka vo lɛ le tegele nya é dɛrɛ lo; we ’ko a bélé bo zo Gakelebale yuɛ gi; tɛrɛ lé Gakelebale, kalé Bale a nɔ ka lɛ tɔnɔfɛ nya, té ka wenyané kɛlɛ a ta lo.

⁵ Dé gɔné do le si é dɛrɛ, té wa laa sunya kɛlɛle we gi lo, té ’wo kɔné bɛ dɔ a nwiin lo; é dan vo lɛ élé kɔn ’léé lɛɛ do, ’té a na lé é a si bɛ, ’té éé a lɔrɔ paan.

Vɛɛn pale, fɛ dɔle, ’bɛ zo we bɛnu

⁶ Té i mi lé fɛbogɔlɛnu si a bɛfɛ nya lo, dé é a a bolagɔlɛ nyaoo, té bé si a bɛfɛ nya lo; dé bé kɛlɛ, ’té i mi ’ko lé tɛrɛla boen si a bɛfɛ nya.

⁷ Dé mi do é bwe Izraɛl lé mi do kyeen wo, dé é a kɛlɛ élé luu nyaoo, dé é a dan‐oo, dé wa ye wo dan we lɛdɔ lɛ kyeenzan ’ko gi a gale nya. ’Bɛ zo lé ka dan wenaané si lɛ ka méléna.

⁸ ’Ka yuɛ pa kabozen va pantɛngyɛ lé we ma; we faa lé Balebanmunu, Lévinu a paa ka gi alé we ma, ’ka a ta tawo; we faa lé maa a fe wolé we ma, ’ka we kɛlɛ a yɛrama é zima.

⁹ Bléyian va lé ka fwi Éjipiti tɛrɛ la, we lé Gakelebale kalé Bale a kɛlɛ Mari lɛ zia, a sele ’é dɔ ka gi ma.

¹⁰ Dé i fɛofɛan vɛɛn pa i bɔluzan ma, té i wɔra alé kɔn gi a bɛfɛ sile we gi lo;

¹¹ ’i vo béera yé mi lé é vɛɛn si bɛ, ’é da ’é bɛfɛ nya i lɛ béera.

¹² Dé mi ’ko a nyanégyɛzan nya, té a bɛfɛ é yii i lee lo;

¹³ bé nɔ a lɛ yiri vɔbléyi va, yé ’é yigyɛ élé sɔ nya ’é ta yé ’é i drɔɔ vo; yé Gakelebale ilé Bale é dan ’bɛ ye lɛ i ma we tegele nya.

¹⁴ Dé ilé nyanamapazan a i bwe do nya, taa, dé é a bɛn bɛ gi mi do lé ke é nyanale kalé tɛrɛ la fla do la, a nya, dé nyané a gyɛ yé fɛ ’ka a lee lo, té i yaa a ta lo.

¹⁵ ’I alé yi do do nyanama ma gɔɔli nɔ a lɛ yiri vɔle ’lɛ; naa, nyané a gyɛ yé é a élé gɔɔli yele lɛbɛnna. Dé ’bɛ kaan lo, é dan siaa lɛ Gakelebale lɛ i tɔ nya, yé i dan wenyané dɔ lɛ ibo nwiin.

¹⁶ Té ’wo né tinu gyɛ ’wolé nénu lé we ma lo; té ’wo nénu gyɛ ’wo tinu lé we ma lo; mi faa do do é dan ga lɛ ébo lé wenyané ma.

Bɛnnu valé gyɛzaralomu dɔna

¹⁷ Bɛn bɛ gi mi koo, ti valé bugalazan koo, té ka wolé se si wo lee lo; té i zanagalale lé sɔ si a bɛfɛ nya lo.

¹⁸ A sele ’é dɔ ka gi léé, ka kɛlɛ luu nya Éjipiti tɛrɛ la yé Gakelebale, kalé Bale ka tabo; bɛwemalé maa bélidɔwe ’konu nɔ ka lɛ, kalé wo ta tawole we gi.

¹⁹ Dé i a ilé ’sa gyɛna, dé i gi san ’sanwun do ma féi, té i nɔla a siale we gi lo; bɛn bɛ gi mi koo, ti valé bugalazan koo, zanagalale koo, ’é vo wozé nya, Gakelebale ilé Bale lé i panyanama faa drɔɔ vole we gi.

²⁰ Dé i a ilé ɔliviporo sona, a poro lé é vo yili nwiin bɛ, té bé so lo; bɛn bɛ gi mi koo, ti valé bugalazan koo, zanagalale koo, ’é vo wozé nya.

²¹ Dé i a ilé dɔrɔporo sona, a pan lé i yuɛ gié a ta, té i nɔla a sole we ma lo. Bɛn bɛ gi mi koo, ti valé bugalazan koo, zanagalale koo, ’é vo wozé nya.

²² A sele ’é dɔ i gi léé, i kɛlɛ luu nya é vinin Éjipiti tɛrɛ la; bɛwemalé maa bélidɔwe ’konu nɔ ka lɛ, kalé wo ta tawole we gi.