Bélidɔwesɛbɛ Fiézan 23 - Kazambale lé Sebe Sauunu 1979

Munu lé é a lé wo wo bin munu va

¹ Mi lé a wuofɛ ’wii koo, mi lé wa ’lɛ bɔi koo, té ’wo wɔra Gakelebale lé zén‐ékeva na lo.

² Té bwɛlané é wɔra Gakelebale lé zén‐ékeva na lo, fɔɔ yé é bɔ wo kulu vuzan ma, té ’wo wɔra ana lo.

³ Amɔn mi valé Moab mi, té ’wo wɔra Gakelebale lé zen‐ékeva na lo, wo kulu vuzan‐oo, lɛɛfaama oo, té ’wo wɔra lo;

⁴ dé ka fwi Éjipiti tɛrɛ la bléyian va, dé ka a dana zia, wo ’ka da lɛ ’yi valé fɛ nya ka lɛ lo, bɛwemalé té ’wo wɔra lo. Yé é ziin, Béɔɔ be Balaam lé é si Pétɔɔ, Mézopotami tɛrɛ la, wo gɔɔli nɔ ’bɛ lɛ léé, ’bɛ é bale pa ka ma, ’bɛ we ma é ziin, té ’wo wɔra lo.

⁵ Naa, Gakelebale, kalé Bale ’ka tɔné dɔ lɛ Balaam dére lɛ lo; ka sɔ Gakelebale, kalé Bale lɛ, bɛwemalé é balepale nɔla ka ma drɔɔvole nya.

⁶ Té ka wo kɛlɛle mi nya valé wolé we zin yele gi bɔrɔ pa kalé tɛrɛla faa gi lo, lɛɛfaama a glɛ ’ka lo.

⁷ Té ka léabo Édom mi ma lo, é a ka bwe nya, ’bɛzama; té ka léabo Éjipiti mi ma lo, ka kɛlɛ bɛn nya é vinin alé tɛrɛ la, ’bɛzama;

⁸ wo kulu yaazan é bɔa wɔrale lɛ Gakelebale lé zén‐ékeva na.

Bélidɔwe bɛnu

⁹ Dé ka a gulidanna ka nyanézannu va, ’ka yuɛ pa kabozen va wenaané faa ma.

¹⁰ Dé gɔné do a ka va, yé é gɔné nyɛ gy’ɛ é béli, bɛwemalé é ’ka tegele lo, é a lé é si fla, té é da fla lo;

¹¹ nyanadi bléyi va, ’é zuru yé yiri vɔle zuo é dan da lɛ fla.

¹² Ka fɛ dona kɛlɛ sɔkɔn dɔna zuo, yé ’bɛna lé ka dan go lɛ vɔ lɛ luva.

¹³ Guruboyili ’é kɛlɛ kalé kɔné va, kalé vɔluvafɛ nya, yé ’ka guru bo yé ’ka bowo a gi yé ka tɛrɛ zén a ta.

¹⁴ Naa, Gakelebale kalé Bale a tawona ka va, ka takuunle valé ka nyanézannu pale ka lee we gi; bɛwemalé é a lé kalé fla ’é kɛlɛ é zima, té Gakelebale é fɛ tiridɔle do kpen ye ka va lo, dé é da si ka va.

¹⁵ Dé luu do vlan buru ézan lee yé é da vɔ lɛ i zi, té bé nɔ ézan lɛ lo.

¹⁶ É dan nyana lɛ ka va, ka méléna, dé fɛana sɔ a lɛ, ana, dé é dɔ a gi léé, kalé fla‐an ke é zima ézé nyaoo, ’é nyana ana. Té ka yaa a ta lo.

¹⁷ Té Izraɛl le do kpen é kɛlɛ bɔrɔdɛ le nya lo; té Izraɛl gɔné do kpen é kɛlɛ bɔrɔdɛ gɔné nya lo.

¹⁸ Dé i a bale kunle lɛ sɔɔna, dé bɔrɔdɛ ma gɔɔli léé, dé blen ma gɔɔli léé, ’bɛ gi lé bɔrɔdɛ gɔné, té i da ’bɛ nya Gakelebale, kalé Bale lé kɔn gi lo. Wo fiénu a bélé bo zo Gakelebale, kalé Bale yuɛ gi.

¹⁹ Dé é a gɔɔli nyaoo, dé é a fɛblele nyaoo, dé é a fɛofɛan nya yé wa drɔn paan mi ma a taa vɔle a zuo we ma, a nyaoo, té bé drɔn pa i bwe ma a taa vɔle a zuo we ma lo.

²⁰ A se a i lɛ léé, dé é a bɛn nya, ’bɛ a vɔ zuo i lɛ, naa, té i bwe a taa vɔ a zuo i lɛ lo. Dé ka kɛlɛ a zo, we faa lé ka kɛlɛ, tɛrɛ lé ka dan a si lɛ kazé nya bɛ, a ta, Gakelebale, kalé Bale é dan ka drɔɔ vo lɛ.

²¹ Dé i Gakelebale, kalé Bale kun we do gi, té i mɔn a lɛsɔɔna lo; naa, Gakelebale, kalé Bale é dan a laa lɛ i lee, yé i dan wenyané dɔ lɛ ibo nwiin.

²² Naa, dé i ’ka bale kun lɛ lo, ’té we ’ka i nwiin lo.

²³ Dé i Gakelebale, ilé Bale kun ilé blibɔmale nya, we lé é bɔra i ’léé yé bé fe, ’bé ta tawo yé ’bé lɛ sɔɔ.

²⁴ Dé i go i bɔluzan lé dɔrɔféi, a se a i lɛ léé, bé poro ble yé i kan, naa, té bé poro pa kana gi lo.

²⁵ Dé i go i bɔluzan lé ’saféi, a se a i lɛ léé, bé nɛnɛ kini i bɛ nya, naa, té i i bɔluzan lé ’sa gyɛ kɔblané nya lo.