Bélidɔwesɛbɛ Fiézan 22 - Kazambale lé Sebe Sauunu 1979

Nanale ékeva bwenu nya

¹ Dé i bwe do lé diri léé, dé alé ’bla léé, dé é san yé bé ye, té i yuɛ si ana lo; bé kun, i goan i bwe lɛ.

² Dé i bwe ’ka i sɔnɔ lo, dé i ’ka a dɔɔa lo, a wi é dan vo lɛ i lee fɔɔ yé i bwe é da a si; dé é da a si lɛ, bé nɔ a lɛ.

³ Dé alé sokofale léé, dé alé sɔ léé, dé alé fɛofɛan san yé bé ye, yee duo lé i dan a kɛlɛ lɛ; té i yuɛ si ana lo.

⁴ Dé i bwe do lé sokofale léé, dé alé diri léé, dé bé ye é diale zia, té i si a zi lo, ’i bɔ a va yé bé nwa é ziin.

⁵ Té lezan é gɔnézan lé sɔ zén ’é ta lo; té gɔné ’é le lé sɔ zén ’é ta lo; mian é ’bɛ zo wenu kɛlɛ é a bélé bo zo Gakelebale, kalé Bale yuɛ gi, azama.

⁶ Dé i a gona zia, dé i miané kɔn do ye, dé é a yili nwiin‐oo, dé é a tɛrɛ vaoo, dé a nyɛné a a gioo, dé a nénu a a gioo, yé a bu a é buale wo ta, té i mianébu valé élé nénu sia ékeva lo;

⁷ ’i mianénu bu vo yé bé nénu saa ɛ si, ka gi nanale we gi yé kalé tɛrɛlayinu é kɛlɛ di.

⁸ Dé i kɔn dɛrɛ dɔ, ’i gɔrɔ dɔ a gwa ta loru, dé mi do é da dia yé nyɛ é da zana ilé kɔn ta.

⁹ Té i fɛwɔlɛ gɔnɔ fié vɔ ilé dɔrɔféi gi lo, dé wo ’ka dan baa lɛ lo, yé ilé dɔrɔ ’ka baan é ziin lo.

¹⁰ Té ka nyanama pa dirigɔné valé sokofale nya ékeva lo.

¹¹ Sɔ lé wa tan goroné fié nya, ’bɛ gi léé, ’blakyɛɛ kununu valé lɛn kununu, té bé zén i ta lo.

¹² ’I tasɔ lɛi nini kɛlɛ ’é lɔlu ziɛnnu ma.

Zɔwɛgyɛle lomu ta

¹³ Dé mi do le si yé é go a va, yé ’bɛ zuo é ’ka sɔ lɛ a lɛ é dɛrɛ lo,

¹⁴ dé é we dɔ a nwiin yé é a tɔ sɛrɛ a fele nya léé, ’é le ’ko si yé ’é go a va yé ’é a ye léé, é gɔné dɔɔ ’é ’lɛ,

¹⁵ ’té blɛnzan ti valé a bu é dan da lɛ wo lu kɛlɛle tegele tɔmasenu nya yé wa gɔɔn fla mi segelenu lɛ, flagɔrɔ ’léé.

¹⁶ Yé blɛnzan ti é dan a fe lɛ mi segelenu lɛ léé, ’é ’é lu nɔ gɔné ’ko lɛ a na nya, yé é ’ka sɔ lɛ a lɛ lo,

¹⁷ yé é wenaané dɔ a nwiin a fele nya lé, maa ’ka i lu ye lɛ blɛn nya lo, dɔlé ’té ’é lu kɛlɛle tegele tɔmasenu lé ke ’ko. Yé é dan alé sɔ gɔɔn lɛ fla mi segelenu lɛ.

¹⁸ Yé fla mi segelenu é dan gɔné ’ko si lɛ yé wo we lɛdɔ a gi;

¹⁹ é Izraɛl blɛn tegele do tɔ sɛrɛ, amalé wo dan ban dɔ lɛ a nwiin gɔɔlifu sikla yɔ soru yé é dan a banwo lɛ blɛnzan ti lɛ. Blɛnzan é dan vo lɛ a na nya, é ’ka bɔa a bɔrale lɛ lo, alé tɛrɛla faa gi.

²⁰ Naa, dé é kɛlɛ webozen nya, dé blɛnzan sɛrɛ weboen nya,

²¹ wo dan go lɛ blɛnzan nya a ti lé kɔn ’léé; flamunu é dan gɔlɛ vuli lɛ a va yé é dan ga lɛ, é we lɛrɛlɛrɛ kɛlɛ Izraɛl, azama, yé é kɛlɛ bɔrɔdɛ nya é ti lé kɔn gi. ’Bɛ zo lé ka dan wenaané si lɛ ka méléna.

²² Dé wo bɔ gɔné do ma wenyané kɛlɛna gɔné na va, wo fiénu é dan ga lɛ, gɔné lé é yia le va koo, yé lezan koo é ziin. ’Bɛ zo lé ka dan wenaané si lɛ Izraɛlnu va.

²³ Dé blɛnzan tegele do pu a é dɔle yé wo kee gɔné do nya fla yé é yia a va,

²⁴ ’ka da wo fiénu nya flagɔrɔ ’léé yé ’ka gɔlɛ vuli wo va yé ’wo ga; blɛnzan a fla yé é ’ka siaa lɛ lo, azama; gɔnézan é bɔluzan na sɛrɛ, azama. ’Bɛ zo lé ka dan wenaané si lɛ ka méléna.

²⁵ Naa, gɔnézan koo, blɛnzan lé wa pu dɔ koo, dé wo kee féi yé é yia a va gla nya, gɔnézan lé é yia a va bɛ, ’bɛ do kpen é dan ga lɛ.

²⁶ Té ka we do kpen kɛlɛ blɛnzan lɛ lo; é ’ka gawe kɛlɛ lɛ lo, we ’ko a bélé mi lé é baa é bɔluzan ta yé é a gyɛ yé é ga, a zo.

²⁷ Blɛn pudɔle lé wo kee gɔnézan ’ko nya féi, dé é siaaoo, mi do kpen ’ka ana yé ’bɛ é bɔ a va lo.

²⁸ Blɛn tegele lé wo ’ka tan a pu dɔ lɛ lo, dé wo valé gɔné do kee yé é yia a va gla nya, yé wo bɔ wo ma,

²⁹ gɔnézan lé é yia a va, é dan gɔɔlifu sikla yɔ fié wɔlɛ vu nɔ lɛ blɛnzan ti lɛ; é blɛnzan sɛrɛ, amalé é dan a si lɛ é na nya yé é ’ka bɔa a bɔrale lɛ lo, alé tɛrɛla faa gi.

³⁰ Té mi do kpen é ti na si lo; té mi do kpen é ti lé yialafɛ tasɔ nwa lo.