Bélidɔwesɛbɛ Fiézan 20 - Kazambale lé Sebe Sauunu 1979

Sunyanu sile

¹ Dé ka guli dan ka nyanézannu va, yé ka wisoonu valé goronu ye, yé ka léé, wo kiɛre mini ’wo ta, té ka kana wo lee lo; naa, Gakelebale, kalé Bale lé é ka si Éjipiti tɛrɛ la, é a ka va, azama.

² Dé gulidanbléyi pa, Balebanzan é dan bié lɛ yé é dan we fe lɛ munu lɛ.

³ É dan a fe lɛ wo lɛ léé: Izraɛl, ’ka tɔné dɔ. Ka a gona guli danna kyɔ ka nyanézannu va. Té ka bli kyɛ é dɔ lo; té kana é zén ka gi lo, té di é kini ka gi lo; té ka gi nyɛ é kini wolé we ma lo.

⁴ Naa, Gakelebale, kalé Bale a tawona ka va, gulidanle we gi ka nyanézannu va, ’bɛ valé ka bélile we gi.

⁵ ’Bɛ zuo, guli zilɛzannu wo dan we fe lɛ munu lɛ léé, mi kyɛn ɛ kɔn dɛrɛ dɔ yé é ’ka tan nyana lɛ a gi loo? ’É diéra yé ’é go ’élé kɔn ’léé, dé guli é da a gyɛ yé mi bɛ é nyana alé kɔn gi.

⁶ Mi kyɛn ɛ dɔrɔféi pa, yé é ’ka tan a poro vinin so lɛ loo? ’É diéra yé ’é go ’élé kɔn ’léé, dé guli é da a gyɛ yé mi bɛ alé dɔrɔporo vinin so.

⁷ Mi kyɛn ɛ le pu dɔ yé é ’ka tan a si lɛ loo? ’É diéra yé ’é go ’élé kɔn ’léé, dé guli é da a gyɛ yé mi bɛ a le si.

⁸ Guli zilɛzannu é dan vo lɛ we fena munu lɛ léé, kana a mi kyɛn gi yé a fuu si a taa? ’É diéra yé ’é go ’élé kɔn ’léé, té fuu ’é si a bwenu ta bélé azé zo lo.

⁹ Dé guli zilɛzannu nyaa wefele nya munu lɛ, wo dan sunyanu palu nwiinzannu dɔ lɛ munu ’lɛ.

Flanu sibɛ

¹⁰ Dé ka bié fla do sɔnɔ gulidanle a va we gi, ’ka fe ana munu lɛ léé, ’ka vo drɔɔ.

¹¹ Dé wo vole drɔɔ nyi si yé wo flagɔrɔ lɛ so ka lɛ, ana munu faa é dan pla lɛ ka wuo yé wo dan kalé nyanama pa lɛ.

¹² Dé wo ’ka vole drɔɔ nyi si lɛ ka lɛ lo, yé é sɔ wo lɛ léé, ’wo guli dan ka va, ’ka fla mabɛn.

¹³ Dé Gakelebale, kalé Bale wo pa ka lee faa, ka dan gɔnénu faa gyɛ lɛ gwɔun nya.

¹⁴ Naa, lomu koo, nénu koo, winu koo, fɛ faa lé ke fla koo, ’ka ’bɛ faa si; wo faa a gulizarafɛ nya, yé ka nyanézannu lé Gakelebale, kalé Bale a pa ka lee, ka dan wo leefɛ ble lɛ.

¹⁵ Flanu lé ke ka ma baa, ’té wo ’ka bɛn ’konu lé flanu nya lo, ’bɛ zo lé ka dan a kɛlɛ lɛ wo faa lɛ.

¹⁶ Naa, bɛnnu lé Gakelebale, kalé Bale a wolé tɛrɛnu nɔna ka lɛ tɔnɔfɛ nya, dé fɛofɛan ke flinna, té ka a vo é yuɛma lo.

¹⁷ Étinu koo, Amorénu koo, Kanaannu koo, Férézinu koo, Éévinu koo, Jébusinu koo, ’ka munu ’ko gyɛ, Gakelebale, kalé Bale a fe ka lɛ fɛan zo, a zo.

¹⁸ Dé ka kɛlɛ a zo, wolé bozowenu lé wa kɛlɛna wolé balebɔwenu nya bɛ, ka ’ka dan wo zuosona lɛ lo, yé ka ’ka dan wenyané kɛlɛ lɛ Gakelebale, kalé Bale ma lo.

¹⁹ Dé ka a guli danna fla do va, yé ka mɔn wo mabɛnna, té ka ana yilinu sɛrɛ kalé zaanu nya lo; ’ka wo mafɛ ble é wo, té ka wo vɔ lo; féiyilinu a mi nya laa, yé ka guli dan wo vaa?

²⁰ Naa, yilinu lé mi ’ka womafɛ blé lo, a se a ka lɛ léé, ka wo vɔ yé ka wo kɛlɛ gulidanfɛ nya, fla lé ka ke gulidanna a va, a ma, fɔɔ yé é yɔfalo fu nwa ka lɛ.