Bélidɔwesɛbɛ Fiézan 2 - Kazambale lé Sebe Sauunu 1979

Lɛɛnu lé wa kɛlɛ bwi gi

¹ Yé kaa po yéli yé kaa go bwi gi, Wɛyi Sɔɔn lé zi ta, Gakelebale a fe an lɛ fɛan zo, a zo; ka mɔn nɔɔna Séii gɔ zi.

² Gakelebale lé an lɛ léé,

³ ka nɔɔle gɔ ’ko zi sɔ. ’Ka nɔla yirinwana bɛbolazia.

⁴ Yé é léé, ’maa munu béli dɔ léé, ka bwenu, Ézau benu lé wo ke é nyanale Séii tɛrɛ la, ka dan wolé tɛrɛ kini lɛ. Wo dan kana lɛ ka lee, naa, ’ka yuɛ pa kabo va é zima.

⁵ Té ka guli dan wo va lo; ’yee ’ka dan wolé tɛrɛ kiéné boen nɔ lɛ ka lɛ yé ka ka gane dɔra a ta lo; ’é Séii gɔ nɔ Ézau lɛ azé nya.

⁶ Fɛ lé ka dan a ble lɛ, ’bɛ valé ’yi lé ka dan a mini lɛ, ka dan wo lɔ lɛ wo lee.

⁷ Naa, Gakelebale, kalé Bale, é kalé nyanama faa drɔɔ vo; ta lé ka a wo bwi blɛn ta ’ko, é a gi dɔɔ. Ka lɛɛ yɔ fié lo, ’té yee Gakelebale, kalé Bale a ka va; fɛ do kpen ’ka vuru lɛ ka ma lo.

⁸ Ko bwenu, Ézau lé nénu lé wo ke é nyanale Séii tɛrɛ la, ko paa wo ma baa, yé bwila zi koo, Élat zi koo, Esijɔn‐Gébɛɛ zi koo, ko paa wo faa ma yé ’bɛ zuo ko nɔla yé ko go Moab lé bwi gi zia.

⁹ Gakelebale lé an lɛ léé, té ko guli vɔ Moab munu lɛ lo, té ko guli dan wo va lo; ’é ’ka dan wolé tɛrɛlafɛ do kpen nɔ lɛ ko lɛ lo, ’bɛzama; naa, ’é Aa nɔ Lɔt lé nénu lɛ wozé nya.

¹⁰ Émi munu a é nyanale ’bɛna é vinin; wa migɔnɔ blɛn nya, yé wa kiɛre, yé wa grɔgrɔ bélé Anak munu zo.

¹¹ Dé i wo ye ’kyɛ, ’té i Réfaim munu ye, wo bɔ ékema bélé Anak munu zo, naa, Moab munu éé wo laan Émi munu.

¹² Ori munu a é nyanale é vinin Séii tɛrɛ la; naa, Ézau lé nénu wo bin, yé wo wo kulu ga yé wo nyana wo pai, bélé Izraɛl munu a kɛlɛ fɛan zo, tɛrɛ lé Gakelebale a nɔ wo lɛ wozé nya, ana nénu lɛ, a zo.

¹³ Yé Gakelebale lé an lɛ léé, ’ko nwa yé ko Zérɛd yuu kini. Yé ko Zérɛd yuu kini.

¹⁴ Ko ta sia Kadɛs‐Baanéa fɔɔ yé ko bɔ Zérɛd yuu va, é kɛlɛ lɛɛ yɔ do wɔlɛ vu ta sɔraa; ko tawoo fɔɔ gɔnénu lé woo bɔa gulidanle lɛ yé wo faa ga, Gakelebale ’ébo ’nyɔɔn wo lɛ fɛan zo, a zo.

¹⁵ Gakelebale bɛ plɛplɛ vo wo ta sɔkɔn dɔna, fɔɔ yé wo segelenu faa ga.

¹⁶ Gɔnénu lé woo bɔa gulidanle lɛ, wo faa ga yé wo nyaa munu va aan wo,

¹⁷ Gakelebale we fe an lɛ yé é léé,

¹⁸ kyɔ ko dan Moab tɛrɛ kini lɛ Aa lé fɛna,

¹⁹ yé ko dan bié lɛ Amɔn lé nénu ma. Té ko guli vɔ wo lɛ lo, té ko guli dan wo va lo, naa, ’é ’ka dan Amɔnnu lé tɛrɛlafɛ do kpen nɔ lɛ ko lɛ lo; ’é a nɔ Lɔt lé nénu lɛ wozé nya, ’bɛzama.

²⁰ Munu tɛrɛ ’ko ye Réfaim munu lé tɛrɛ do nya é ziin; Réfaim munu a é nyanale ana é vinin, ’té Amɔnnu éé wo laama Zamzum munu;

²¹ wa migɔnɔ blɛn nya, yé wa kiɛre yé wa mi grɔgrɔnu nya bélé Anak munu zo. Gakelebale wo gyɛ Amɔnnu ’lɛ, yé Amɔnnu wo bin yé wo nyana wo pa gi.

²² Gakelebale a kɛlɛ yee duo zo Ézau lé nénu lé wo ke é nyanale Séii tɛrɛ la, wo lɛ; é Ori munu gyɛ wo ’lɛ; wo Ori munu bin yé woo nyanaan wo pa gi fɔɔ kyɔ.

²³ Avinu lé wolé flanu ke é pale fɔɔ Gaza, Kafitɔɔnu lé wo si Kafitɔɔ, ’bɛnu wo gyɛ, yé ’bɛnu nyana wo pa gi.

²⁴ Gakelebale lé an lɛ léé, ’ko nwa, ’ko go, yé ’ko Aanɔn yuu kini. Naa, Amoré mi Sioni lé ke Esibɔn nwiinzan nya, ’é ’bɛ valé ’bɛlé tɛrɛ nɔ ko lɛ. É léé, ’ko guli vɔ wo lɛ, ’ko guli dan wo va.

²⁵ É léé, a péli ’é sia ’bɛ yi la bɛ, é dan ko lee kana zén lɛ tɛrɛlamunu faa gi, yé di é dan kini lɛ wo gi; dé wo ko tɔ blɛn ’ma, wo ma é dan nyɔɔn lɛ yé nyɛ é dan zén lɛ wo gi kolé we ma. A zo lé Gakelebale a fe an lɛ.

Wo Esibɔn mununwiinzan lé tɛrɛ si

²⁶ Ko a Kɛdémɔt bwi la bléyian va, maa munu nwunvɔ Esibɔn munu nwiinzan Sioni va, dére drɔɔ nya.

²⁷ Maa we pa wo ’léé léé, ’wo go, ’wa fe a lɛ léé, ’é zi nɔ an lɛ, an gié alé tɛrɛ la; ko dan tawo lɛ gbéin ta, ko ’ka dan mane lɛ kalé fɛ do kpen ma lo.

²⁸ É dan fɛblele nɔ lɛ ko lɛ, yé ko banwo; yé é dan ’yi nɔ lɛ ko lɛ yé ko banwo; ko dan gié lɛ ko gane la é pla.

²⁹ Ézau lé nénu lé wo ke é nyanale Séii tɛrɛ la, a zo lé wa kɛlɛ ko lɛ, yé Moab munu lé wo ke é nyanale Aa, a zo lé wa kɛlɛ ko lɛ é ziin. ’Kaa é ziin, ’ka zi nɔ ko lɛ, fɔɔ yé ko Juudɛn yuu kini yé ko bɔ tɛrɛ lé Gakelebale, kolé Bale a nɔ ko lɛ, ana.

³⁰ Naa, Esibɔn munu nwiinzan Sioni ’ka a nyi si lɛ léé, ko gié ’élé fɛna lo; Gakelebale, kalé Bale a bli dɔ kpɛɛn yé é a bli dɔ plɛplɛ a pale ka lee we gi, fɛan zo lé ka ye kyɔ, a zo.

³¹ Gakelebale lé an lɛ léé, é sia bléyi ’ko va, ’é Sioni valé élé tɛrɛ nɔ ka lɛ sin.

³² Sioni valé élé munu faa da zi dɔ lɛ ko ’lɛ, gulidanle ko va we gi Jaas.

³³ Gakelebale, kolé Bale a pa ko lee, yé ko a kele, yee valé é benu koo, ’élé munu faa koo, wo nya.

³⁴ Yé ko alé flanu faa si yé ko ana munu faa gyɛ, gɔnénu koo, lomu koo, né kiénénu koo, woo faa lé; a do kpen ’ka so lɛ a ta ko lee lo.

³⁵ Winu saa lé ko wo tadɔ kozé nya; yé flanu lé ko wo si bɛ, ko wo ta gulizarafɛnu si é ziin.

³⁶ É sia Aroɛɛ lé ke Aanɔn yuu gɔ la, ’bɛ valé fla lé ke gɔnu worona, fɔɔ yé é bɔ Galaad ma, fla lé é ko kele, ’bɛ ’ka lo. Gakelebale, kolé Bale a faa pa ko lee.

³⁷ Naa, Amɔn lé nénu lé tɛrɛ koo, Jabɔk yuu gɔ la flanu koo, gɔ ma flanu koo, fɛna faa lé Gakelebale, kolé Bale a yi ga ko lee léé, té ko guli dan wo va lo, ko ’ka bié lɛ wo do kpen sɔnɔ lo.