Bélidɔwesɛbɛ Fiézan 18 - Kazambale lé Sebe Sauunu 1979

Balebanmunu valé Lévinu dɔna

¹ Balebanzannu, Lévinu, Lévi bɛn gi munu faa, wozé fɛ ’ka dan kɛlɛ lɛ Izraɛl munu zé va lo, yé wo ’ka dan ’wozé tɔnɔ ye lɛ wo va lo; Gakelebale banfɛ lé wa kyɛ blé Gakelebale tɔbɔfɛ nya, ’té é ke Gakelebale lé tɔnɔ nya bɛ, wozé fɛblele éé sié ’bɛ va.

² Wo ’ka dan tɔnɔfɛ ye lɛ ’wo bwenu zé va lo; Gakelebale a wolé tɔnɔfɛ nya, é a fe wo lɛ fɛan zo, a zo.

³ Fɛ lé Balebanzannu é dan a si lɛ balebanfɛ lé munu é dan Bale ban lɛ a nya bɛ, a va, yee lé ke ’ko: dé wo Bale ban diri nya, ɛɛ, dé ’blané léé, a bɛapaboro koo, a puo koo, a suiɛ koo, woo lé.

⁴ Kalé ’sa vinin koo, kalé dɔrɔ’yi vinin koo, kalé nyɔnɔ vinin koo, kalé ’blanu kyɛɛ lé ka bɔi é vinin koo, ’ka wo nɔ Balebanzannu lɛ;

⁵ wo lé Gakelebale, kalé Bale a si a va ka bɛnnu faa gi, nyanama pale Gakelebale tɔ gi we ma, wo valé ’wo benu nya, yifaama.

⁶ Dé Lévi mi do si fɛofɛana lé é nyana Izraɛl tɛrɛ la, ana, yé é go ébo blibɔmale yɛrama fɛna do lé Gakelebale a si a va, ana,

⁷ yé é nyanama pa Gakelebale, kalé Bale tɔ gi, bélé é bwenu Lévinu faa lé woo dɔa Gakelebale ’lɛ, wo zo,

⁸ wo faa blefɛ a do wo nya, yé a ta loru a ti lé fɛnu lé é wo dan, a magɔɔli é dan vo lɛ a lee.

’Monédɔle — Yokɛlɛle — Balelayezannu

⁹ Dé ka bɔ tɛrɛ lé Gakelebale, kalé Bale a nɔ ka lɛ, a ta, té ka ’bɛna bɛnnu lé bozowenu zuosona lo.

¹⁰ Té ka va mi do kpen é be valé é lu gié kyɛ va lo; ’monédɔzan koo, monéné va ’monédɔzan koo, wi va ’monédɔzan koo, gyɛzorowe kɛlɛzan koo,

¹¹ yo kɛlɛzan koo, milélilaazan valé mi lé éé tɛlɛ tɛlama we néné fé koo, mi lé éé we laan mi galenu lee koo, té wo do kpen é kɛlɛ ka va lo.

¹² Mi lé é ’bɛ zo wenu kɛla, é a bélé bo zo Gakelebale yuɛ gi; bozowenu ’ko lé we ma lé Gakelebale, kalé Bale é dan bɛn ’konu bin lɛ ka ’lɛ.

¹³ Ka a Gakelebale, kalé Bale zé nya é ta lé kɔn‐an.

¹⁴ Naa, bɛnnu ’ko lé ka dan wo bin lɛ, woo tɔné dɔa monéné va ’monédɔzan valé ’monédɔzan lɛ; naa, Gakelebale, kalé Bale ’ka ’bɛ zi nɔ lɛ ka lɛ lo.

¹⁵ Gakelebale, kalé Bale é dan balelayezan do nwa lɛ ka bwenu méléna bélé maa zo; ’ka tɔné dɔ ’bɛ lɛ.

¹⁶ Yian nya lé ka zén ékeva Orɛb gɔ ma, ka léé, té ’wo Gakelebale, ’wolé Bale dére ’ma lo, té ’wo kyɛ blɛn ’ko ye é dɛrɛ lo, dé ’wo da ga. Yee balelayezan ’ko, é dan ’bɛ we lɛ sɔɔ lɛ.

¹⁷ ’Bɛ yi la bɛ, Gakelebale lé an lɛ léé, we lé wa fe, é a é zima.

¹⁸ É léé, ’é dan balelayezan do nwa lɛ ka lɛ ka bwenu méléna bélé maa zo, ’é dan ’é dére pa lɛ ’bɛ ’léé, yé we faa lé ’é a fé ’bɛ lɛ, ’bɛ é dan a fe lɛ ka lɛ.

¹⁹ Yé dére lé yee balelayezan ’ko é dan a fe lɛ ’yee Gakelebale tɔ gi, dé mian ’ka é tɔné dɔ lɛ ’bɛ lɛ lo, ’yee Bale bozen é dan we ’ko zuo laa lɛ ’bɛzan lee.

²⁰ Naa, balelayezan‐an é bli si ébo lɛ yé dére lé ’yee Gakelebale ’ka a fe lɛ a lɛ léé, é a fe lo, dé é ’bɛ dére fe ’é tɔ gi, ɛɛ, dé bale bɛ tɔ gi lé é a fe, balelayezan ’ko, wo dan we lɛdɔ lɛ a gi ga nya.

²¹ Dé ka fe ka bli gi léé, dé ’yee, Gakelebale, ’ka dérean fe lɛ lo, ko ’bɛ gi dɔɔan kaa? a gi lé ke ’ko:

²² We lé balelayezan a fe, dé é ’ka bɔ lɛ lo, dé a lɛ ’ka sɔɔ lɛ lo, ’bɛ gi léé, we ’ko, ’yee Gakelebale ’ka ’bɛ fe lɛ lo; ’té balelawe lé é a fe bɛ, ’té abo ’wuogiwe lé; té ka kana a lee lo. A zo lé Gakelebale a fe an lɛ yi la koo.