Bélidɔwesɛbɛ Fiézan 17 - Kazambale lé Sebe Sauunu 1979

Miyili bɔle valé weblele

¹ Dé é a diri nyaoo, dé é a ’bla nyaoo, dé fɛ do a a ma, ɛɛ, dé a fɛ do sɛrɛ, té i Gakelebale, ilé Bale ban a nya lo; ’bɛ a bélé bo zo Gakelebale, ilé Bale yuɛ gi.

² Flanu lé Gakelebale, kalé Bale a nɔ ka lɛ bɛ, dé gɔné do lé, dé le do lé, dé ’bɛ a ka va wo va fla do ta yé we lé ké naané Gakelebale, kalé Bale yuɛ gi, dé azan a kɛlɛ yé é Bale lé gipawe sɛrɛ,

³ dé é go bale bɛnu zuo yé é wo bɔ yé é dia é bli la wo ’lɛ, yiri koo, moné koo, lagifɛ gbaunu koo, dé é go wo zuo, maa ’ka ka béli dɔ lɛ léé, ’ka ’bɛnu bɔ lo.

⁴ Dé ka we ’ko ’ma, dé ka gi dɔɔ tɔɔn, ’ka we ’ko va gini tegele. Dé we ’ko a a zo, dé é kɛlɛ sɔbɛlawe nya, yé wo bozowe ’ko kɛlɛ Izraɛlnu va weboen nya,

⁵ mi lé é we naané ’ko kɛlɛ, dé gɔné léé, dé le léé, ’ka da a nya kalé fla gɔrɔ ’léé yé ’ka gɔlɛ vuli a va, dé ’bɛ kaan lo, ’ka ga bɛ dɔ a nwiin. Dé é a le nyaoo, dé é a gɔné nyaoo, a zo lé wa kɛlɛ a lɛ.

⁶ Mi lé a ga yara lé, wo dan a gyɛ lɛ wenayezan fié valé yaa dére ta; té ’wa gyɛ wenayezan do kpen dére ta lo.

⁷ Wenayezannu ’é nwa fɛ vulile nya é vinin, yé ’bɛ zuo mi pɔnénu faa zén a gyɛle va. ’Bɛ zo lé ka dan wenaané si lɛ ka méléna.

⁸ Dé we do bɔ, dé migyɛwe léé, dé wesiale léé, dé mituowe léé, dé a blele kɛlɛ tɔntɔn ka ma, yé é a kɛlɛna zɔdɔwe nya kalé fla, ’ka nwa yé ’ka go fɛna lé Gakelebale, kalé Bale é dan si lɛ a va, ana.

⁹ ’Ka go Lévinu va, Balebanzannu va, yé mi lé é ke weblezan nya ’bɛ bléyi va, ’ka go azan va; ’ka a zuo fe wo lɛ, yé wo dan a we ble lɛ.

¹⁰ Fɛna lé Gakelebale é dan si lɛ a va, we lé wa fe ka lɛ ’bɛna, ’ka dɔ a ta, yé we faa lé wa paa ka gi, ’ka yuɛ pa kabo va, ’ka we kɛlɛ ’bɛ yɛrama.

¹¹ Bélidɔwe lé wo dan a paa lɛ ka gi, ’bɛ valé we ’wuodɔdére lé wo dan a fe lɛ ka lɛ we blena, ’ka kɛlɛ a zo ’kyɛ, té ka a buu lo; we lé wa fe ka lɛ, té ka diéra, dé ka bɛyilazia léé, dé ka bɛbolazia léé, ana lo.

¹² Balebanzan lé Gakelebale, kalé Bale a dɔ Gakelebale bɔle we gi, dé mi do ébo kɛla blɛn yé é ’ka ’é tɔné dɔa ’bɛzan dére lɛ lo, dé é ’ka ’é tɔné dɔa weblezan dére lɛ lo, ’wo ga dɔ a nwiin.

¹³ ’Bɛ zo lé ka dan wenaané si lɛ Izraɛlnu va, munu lé a ’male valé wo kanale we ma, yé wo ’ka ’wobo kɛla blɛn é dɛrɛ lo.

Minwiinzan blɛn lé we

¹⁴ Tɛrɛ lé Gakelebale, kalé Bale a nɔ ka lɛ, dé ka wɔra ana, dé ka a kɛlɛ kazé nya, dé ka nyana a ta, dé ka fe léé, é sɔ ’wo lɛ léé, ’wo mi do dɔ ’wo nwiinzan nya bélé ’wo zi bɛnnu faa zé zo,

¹⁵ mi lé Gakelebale, kalé Bale é dan a si lɛ a va ka bwenu méléna, ’ka ’bɛzan dɔ ka nwiinzan nya; bɛn bɛ mi lé é ’ka ka bwe nya lo, té ka ’bɛzan si lo.

¹⁶ Naa, té élé wisoonu kɛlɛ kiɛre lo; té é go munu nya Éjipiti tɛrɛ la wisoo kiɛre sile we gi lo; naa, Gakelebale lé ka lɛ léé, té ka nɔla zi ’ko la é ziin monomono lo.

¹⁷ Té a nanu é kɛlɛ kiɛre lo, té a bli é nɔla lo we gi; té é gɔɔlifu valé kyan téé lo.

¹⁸ Dé é nyana élé webleblin ta, é a lé é bélidɔwe ’ko gyɛ sɛbɛ gi yé é goan Balebanzannu, Lévinu va.

¹⁹ É a lé sɛbɛ ’ko é vo a va yé ’é a ta fe yi do do ma élé tɛrɛla faa gi, élé kanale Gakelebale lee draanle we gi yé é tawo bélidɔwe dére ’ko faa ta yé é a déretawenu faa kɛlɛ.

²⁰ ’Bɛ zo lé é ’ka dan ébo kɛlɛ lɛ blɛn é bwenu ma lo, yé é ’ka dan si lɛ bélidɔwe ’konu va yé é nɔla, dé a bɛyilazia léé, dé a bɛbolazia léé, ana lo, yé é dan mɔn lɛ élé plale mi nwiin zi, yé yee valé élé nénu é dan mɔn lɛ Izraɛl.