Bélidɔwesɛbɛ Fiézan 16 - Kazambale lé Sebe Sauunu 1979

Taboyi lé fɛti

¹ ’Sasola moné nya lé Gakelebale, kalé Bale ka si Éjipiti tɛrɛ la é béli, amalé ’ka ’sasola moné lé fɛti kɛlɛ yé ’ka Taboyi lé fɛti kɛlɛ Gakelebale, kalé Bale tɔ bɔle we ma.

² Ka dan Gakelebale, kalé Bale ban lɛ, mitabo dirinu valé ’blanu valé bolinu nya, fɛna do lé Gakelebale é dan ana si lɛ a va yé ’é tɔ pa a ma, ana.

³ Buru lé lévɛn ke a va, té ka a ble fɛti yinu la lo; buru lé lévɛn ’ka a va lo, kalé nyanébleburu, ’ka ’bɛ ble yi sɔrafié wuo, naa, ka si Éjipiti tɛrɛ la fiaa, ’bɛzama; ’ka kɛlɛ a zo, yi lé ka si Éjipiti tɛrɛ la a nya, a sele dɔle ka gi we ma kalé tɛrɛla faa gi.

⁴ Yi sɔrafié wuo, té wo lévɛn ye ka va lo, kalé tɛrɛ faa la; winu lé ka Bale ban wo nya a yi vininzan nya nyanadi, té tu é kini a wi do kpen ma lo.

⁵ Fɛnanu lé Gakelebale, kalé Bale a nɔ ka lɛ ka nyanana nya, té ka saraka bo Tabowi nya ’bɛ do kpen na lo;

⁶ naa, fɛna lé Gakelebale, kalé Bale é dan a si lɛ a va yé é tɔ pa a ma, ka dan saraka bo lɛ Tabowi nya yee ɛ na; ’ka a bo nyanadi, yiri vɔ bléyi va, bléyian va lé ka si Éjipiti tɛrɛ la, ’bɛ bléyi nya.

⁷ ’Ka Tabowi dɔne yé ’ka a ble, fɛna do lé Gakelebale, kalé Bale é dan ana si lɛ a va, ana. ’Bɛ é tu kini ’ka nɔla yé ’ka go kalé fla.

⁸ Buru lé lévɛn ’ka a va lo, ’ka ble yi suiɛdo; yi sɔrafiézan nya, ka dan zénle ékeva plɛplɛ do kɛlɛ lɛ, Gakelebale kalé Bale bɔle we gi; té ka nyanama do kpen pa lo.

Fɛ sile féi lé fɛti

⁹ ’Ka flɛyi sɔrafié nɔnɔ; yian nya lé ka ’sa gyɛle pélisia kɔblané nya, ’ka flɛyi sɔrafié nɔnɔle pélisia ’bɛ yi nya.

¹⁰ ’Bɛ zuo ’ka flɛyinu lé fɛti kɛlɛ yé ’ka blidrɔɔblɛ kɛlɛ, Gakelebale, kalé Bale ka drɔɔ vo fɛan zo, a yɛrama.

¹¹ I gi é dan nana lɛ Gakelebale ilé Bale ’lɛ, fɛna do lé Gakelebale, ilé Bale é dan a si lɛ a va ’é tɔ pale a ma we gi, ana; bii koo, i be koo, i lu koo, i wuogɔné koo, i wuole koo, Lévi mi lé é ke é nyanale ka va koo, bɛn bɛ mi koo, ti valé bugalazan valé zanagalale lé ke ka va koo, ka faa gi ’é nana wo nya.

¹² A sele é dan dɔ lɛ ka gi léé, ’wa luu nya é vinin Éjipiti tɛrɛ la, yé ka dan bélidɔwe ’ko faa kɛlɛ lɛ.

Fɛti lé wa kɛla faa wuo

¹³ Fɛti lé wa kɛla faa wuo, ka dan a kɛlɛ lɛ yi sɔrafié, bléyian va lé ka ’sa sunwo ’té ka dɔrɔporo boroan, ’bɛ bléyi va.

¹⁴ Ka koo, ka benu valé ka lunu koo, ka wuogɔnénu valé ka wuolomu koo, Lévi mi koo, bɛn bɛ mi koo, ti valé bugalazannu valé zanagalalomu lé wo ke ka va koo, ka faa gi é dan nana lɛ fɛti ’ko yinu la.

¹⁵ Ka dan fɛti ’ko kɛlɛ lɛ yi sɔrafié, Gakelebale, kalé Bale bɔle we gi, fɛna do lé Gakelebale, kalé Bale é dan a si lɛ a va, ana; naa, Gakelebale, kalé Bale é dan kalé féinu faa valé kalé nyanama faa drɔɔ vo lɛ, yé ka dan kabo faa nɔ lɛ gi nanale lɛ.

¹⁶ Lɛɛ do gɔnɔ yaa ka va gɔnénu faa é dan da lɛ Gakelebale, kalé Bale ’lɛ, fɛna do lé é dan a si lɛ a va, ana; buru lé lévɛn ’ka a va lo, ’bɛlé fɛti a do; flɛyinu lé fɛti a do; fɛti lé wa kɛla faa wuo, ’bɛ a do. Té ’wo da Gakelebale ’lɛ wo lee koro nya lo.

¹⁷ Mi faa do do ’é fɛ nɔ, élé fɛ yebɛ yɛrama, Gakelebale, kalé Bale a drɔɔ vo fɛan zo, a yɛrama.

¹⁸ ’Ka weblemunu valé dutinu dɔ, fla faa lé Gakelebale, kalé Bale a nɔ ka lɛ, wo ta, ka bɛn lɛgɔnɔnu faa gi; é a lé wo munu lé we ble tegele.

¹⁹ Té ka we tegele bɛ gi plɛn lo; té ka dɔ mi zuo é leefɛ ma lo, té ka fɛ si munu lee weblele we gi lo, naa, éé wedɔɔmunu yuɛ ’wiié yé éé mi tegelenu dére sɛra.

²⁰ ’Ka we tegele kɛlɛ é boen ma, ka vole é yuɛma we gi yé tɛrɛ lé Gakelebale, kalé Bale a nɔ ka lɛ, yé é kɛlɛ kazé nya.

Miyilinu valé fɛ fotonu

²¹ Bale banna lé ka dan a kɛlɛ lɛ Gakelebale, kalé Bale zé nya, té ka miyili dɔ a sɔnɔ lo.

²² Té ka yowɔlɛnu kɛlɛ lo; Gakelebale, kalé Bale léabo ’bɛ ma.