Bélidɔwesɛbɛ Fiézan 15 - Kazambale lé Sebe Sauunu 1979

Lɛɛ sɔrafiézan gi we

¹ Lɛɛ suiɛdo a sɔrafiézan nya, ka dan mivoébomawe kɛlɛ lɛ.

² We lé ka dan a kɛlɛ lɛ, yee lé ke ’ko: dé ka zana dɔɔ léé, ka dan mivoébomawe kɛlɛ lɛ Gakelebale tɔ bɔle we ma, vɛɛnzannu faa lé ’wolé vɛɛn ke mi do ma, wo dan ’wolé vɛɛn vo lɛ é pla; vɛɛnzan ’ka dan ’é bɔluzan valé é bwe tunu lɛ léé, ’bɛ ’élé vɛɛn banwo lo.

³ A se a i lɛ léé, i bɛn bɛ mi tunu, naa, ilé fɛ lé ke i bwe va, i dan a vo lɛ.

⁴ Duowo, nyanégyɛzan ’ka dan kɛlɛ lɛ ka va lo, naa, Gakelebale é dan ka drɔɔ vo lɛ, tɛrɛ lé Gakelebale, kalé Bale é dan a kɛlɛ lɛ kazé tɔnɔfɛ nya, a ta,

⁵ ’té dé ka Gakelebale, kalé Bale dére lɛdɔma, ’té dé ka tawo é zima, a sɔnné ’konu faa lé maa wo gɔɔn ka lɛ kyɔ, wo ta.

⁶ Gakelebale, kalé Bale é dan ka drɔɔ vo lɛ, fɛan zo lé é a fe ka lɛ, a zo; ka dan vɛɛn pa lɛ bɛn kiɛre gi munu ma, yé ka ’ka dan vɛɛn si lɛ lo; ka dan pla lɛ bɛn kiɛre gi munu nwiin, yé wo ’ka dan pla lɛ ka nwiin lo.

⁷ Kalé tɛrɛ lé Gakelebale a nɔ ka lɛ bɛ, dé nyané ka bwe do gyɛ ana fla do la, té i bli dɔ a ma plɛplɛ lo; té i bɛ ma kɛlɛ plɛplɛ i bwe nyanégyɛzan lɛ lo.

⁸ ’I kɛlɛ bɛ ma wolowolozan nya a lɛ yé a mawe a fɛan gi, bé drɔn pa a ma ’bɛ yɛrama.

⁹ ’I yuɛ pa ibozen va, té i gi kɛlɛ nyané yé bé fe i bli gi léé, lɛɛ sɔrafiézan, mivoéboma lɛɛ bɔ é pu, lo. ’I yuɛ pa ibozen va, té i kɛlɛ gi pɔnpɔnzan nya i bwe nyanégyɛzan ma yé i fɛ nyané kɛlɛ a lɛ lo. É dan siaa lɛ Gakelebale lɛ i tɔ nya, yé i dan wenyané kɔné dɔ lɛ ibo nwiin.

¹⁰ ’I fɛ nɔ a lɛ, té a we é vo ’nana i ma i bli gi lo; naa, ’bɛ we ma lé Gakelebale é dan ilé nyanama faa drɔɔ vo lɛ yé we faa lé bé péli sia, Bale é dan ’bɛ vɔ lɛ a ma.

¹¹ Nyanégyɛmunu é dan kɛlɛ lɛ kalé tɛrɛ la yifaama, bɛwemalé maa bélidɔwe ’ko nɔ ka lɛ: ’i kɛlɛ bɛ ma wolowolozan nya i bwe lɛ, ’té é ke nyanégyɛzan valé tiané nya ilé tɛrɛ la bɛ, a lɛ.

Luunu ma we kɛlɛbɛ

¹² Dé i bwe Ébru mi do ébo dɔ i lee, dé gɔné léé, dé le léé, é dan ilé nyanama pa lɛ lɛɛ suiɛdo; naa, lɛɛ sɔrafiézan nya, i dan a vo lɛ éboma.

¹³ Dé i zi nɔ a lɛ léé, ’é go, té bé pa zia é lee koro nya lo;

¹⁴ fɛnu lé Bale i drɔɔ vo wo nya bɛ, i dan a ke nɔ lɛ a lɛ; i dan fɛ si lɛ ilé ’blanu valé ilé bolinu koo, ilé ’sa sunwona koo, ilé dɔrɔporo borona koo, wo va, yé i dan blɛ kɛlɛ lɛ a lɛ wo nya.

¹⁵ A sele ’é dɔ ka gi léé, ka a luu nya é vinin Éjipiti tɛrɛ la yé Gakalebale, kalé Bale ka tabo; bɛwemalé maa bélidɔwe ’ko nɔ ka lɛ kyɔ.

¹⁶ Dé ilé luu a ye léé, é vole i va a é zima, yé bii valé ilé kɔn ’léé sɔle a lɛ lé we ma lé é a fe i lɛ léé, ’é ’ka a va lé é si i va lo, we lé bé kɛla, yee lé ke ’ko:

¹⁷ ’i foroné si, yé bé tɔné fɔn ilé duoli ma a nya, yé é dan vo lɛ ilé luu nya yifaama. Yee duo lé bé kɛlɛ ilé luudané lɛ.

¹⁸ Té a vole éboma é ’na i ma lo, naa, é ilé nyanama pa lɛɛ suiɛdo; ’bɛ fila vɔ i lɛ é mini nyanamapazan pla banwole ta gɔnɔ fié; yé we faa lé bé kɛla, Gakelebale ilé Bale é dan i drɔɔ vo lɛ a gi.

Winu lé né vininzannu

¹⁹ Ilé dirinu koo, ilé ’blanu koo, ilé bolinu koo, wolé né vinin lé wa yaa gɔné nya, i dan wo faa nɔ lɛ Gakelebale, ilé Bale lɛ. Té i nyanama pa ilé diri lé né vinin nya lo; té ilé ’bla lé né vinin ma kyɛɛ bɔi lo.

²⁰ Lɛɛ faa do do gi bii valé ilé kɔngimunu é dan wo ble lɛ Gakelebale ilé Bale ’lɛ, fɛna do lé é dan ana si lɛ a va, ana.

²¹ Dé fɛ do a a ma, dé é tun boo, dé a yuɛ a ’wiile, dé tɔmase do a a ma, té i Gakelebale, ilé Bale ban a nya lo.

²² Bé ble ibo lé kɔn ’léé; mi lé é ’ka tegele lo koo, mi lé é ke tegele koo, ’ka faa a ble wo nya, plɛn‐an valé yilédiri zo.

²³ Naa, we do ana, té bé ble ’é nyɛ nya lo; bé nyɛ zana tɛrɛ va bélé ’yi zo.