Bélidɔwesɛbɛ Fiézan 14 - Kazambale lé Sebe Sauunu 1979

Tɔmase kɛlɛle mi kɔlɛ ma

¹ Ka a Gakelebale, kalé Bale lé nénu nya. Té ka pɔɔ gyɛ ka kɔlɛ ma lo, té ka nwin puiyɛ ka bɛlo la mi gale lé we ma lo.

² Ka a munu lé Gakelebale, kalé Bale wo pa é yɛrama ’ézé nya, wo nya, ’bɛzama; Yé Gakelebale, kalé Bale ka si munu faa lé wo ke tɛrɛ la, wo va, ka kɛlɛle ’ézé munu nya we gi.

Wi zinzinnu valé wi naanénu

³ Té ka fɛ naané do kpen ble lo.

⁴ Winu lé ka dan wo ble lɛ, wo lé ke ’ko: diri koo, ’bla koo, boli koo,

⁵ yilédiri koo, plɛn‐an koo, gɔrɔ koo, vɔlɛ koo, balo koo, bwi gi boli koo, wi lé wa laama jiraf koo, woo lé.

⁶ Sɔnéwɔlɛwi faa lé wo sɔnéwɔlɛ blan ke, ’té woo puaan fɛ nya, ’ka wo ble.

⁷ Naa, a lɛ do lé ’bɛnu éé fɛ puaan, té ka bɛnu ble lo, yé a lɛ do lé wo ke sɔnéwɔlɛwi nya yé wo sɔnéwɔlɛ blan ke, té ka bɛnu ble lo. ’Bɛ zo lé nyɔgɔmé koo, gwené koo, wi lé wa laama daman koo, té ka wo ble lo; woo puaan fɛ nya, naa, wo ’ka sɔnéwɔlɛwi nya lo, azama; ’ka wo ye fɛ tiridɔle nya.

⁸ Té ka suru ble lo, é a sɔnéwɔlɛwi nya, naa, é ’ka puaan fɛ nya lo; ’ka a ye fɛ tiridɔle nya. Té ka wo wi ble lo, té ka mane wo gale ma lo.

⁹ ’Yi va winu faa lé ka dan wo ble lɛ, wo lé ke ’ko: fɛnu faa lé wo lalabi ke, é valé wo makɔlɛ ke, wo lé.

¹⁰ Naa, wo lé wo lalabi valé wo makɔlɛ ’ka lo, té ka wo do kpen ble lo; ’ka wo ye fɛ tiridɔle nya.

¹¹ Ka dan miané zinnu faa ble lɛ.

¹² Naa, wonu lé ka ’ka dan wo ble lɛ lo, wo lé ke ’ko:

¹³ gola koo, vaa koo, wɛyi la gola koo, woo lé; kanwéi koo, plén koo, boblekwa valé é bɔlunu koo,

¹⁴ kwa valé é bɔlunu faa koo,

¹⁵ miané lé duo koo, kurubéli koo, yilablaséi koo, gyɛɛnplén valé é bɔlunu koo,

¹⁶ banblégunbɛ koo, pɔrɔkurubéli koo, pɔblekuu koo,

¹⁷ valusanbla koo, yilagamian valé burulu koo,

¹⁸ bwibalo koo, gyɛɛsunani valé é bɔlunu koo, daliwé koo, ban koo, woo lé; té ka wo ble lo.

¹⁹ Fɛ kénénénu faa lé woo sié, ’ka wo ye fɛ naané nya, wo ’ka wo blé lo.

²⁰ Ka dan miané zinnu faa ble lɛ.

²¹ Té ka wi gale do kpen ble lo; ’ka a nɔ bɛn bɛ mi lé ke ka va, a lɛ, dé ’bɛ kaan lo, ’ka a dan bɛn bɛ mi lee; ka a munu lé Gakelebale, kalé Bale wo pa é yɛrama ézé nya, wo nya, ’bɛzama. Té ka boliné dɔné é bu nyɔyi nya lo.

Fɛvuzan nɔle

²² ’Ka fɛvuzan si kalé féifɛnu faa va lɛɛ faa do do ma.

²³ Fɛna do lé Gakelebale, kalé Bale é dan a si lɛ a va yé ’é tɔ pa a ma, ka dan go lɛ kalé fɛvuzannu nya ’bɛna; kalé ’sa vuzan koo, kalé dɔrɔ’yi vinin vuzan koo, kalé nyɔnɔ vuzan koo, kalé diri valé kalé ’blanu valé kalé bolinu lé né vininnu koo, ka dan wo ble lɛ ’bɛna; ’bɛ zo lé ka dan kanale Gakelebale, kalé Bale lee draan lɛ lɛɛfaama.

²⁴ Fɛna do lé Gakelebale, kalé Bale é dan ana si lɛ a va yé ’é tɔ pa a ma, dé ’bɛ a i ma baa, dé Bale ilé féi drɔɔ vo yé zi grɔgrɔ lé we ma lé i ’ka bɔa gole lɛ ilé fɛvuzan nya ana lo, we lé i dan a kɛlɛ lɛ, yee lé ke ’ko:

²⁵ i dan ilé fɛvuzan tavɔɔ lɛ gɔɔli nya yé i dan go lɛ fɛna do lé Gakelebale kalé Bale é dan ana si lɛ a va, ana, yee gɔɔli nya i lee.

²⁶ Dé i bɔ ’bɛna, i dan ilé blibɔmafɛ faa lɔ lɛ gɔɔli ’ko nya, dé diri léé, dé ’bla léé, dé nwɛ léé, dé dɔrɔ léé, fɛ faa lé é i gi nana, i dan a lɔ lɛ yé i dan a ble lɛ Gakelebale, ilé Bale ’lɛ, yé i gi é dan nana lɛ, bii valé ilé munu nya.

²⁷ Lévi mi lé é dan kɛlɛ lɛ ka va bɛ, té ka gi é san a ma lo, naa, azé fɛ ’ka ka va lo, yé ka valé wolé tɔnɔfɛ ’ka ékeva lo.

²⁸ Lɛɛ fié a yaazan nya, ka dan kalé lɛɛ yaazan gi féifɛ vuzannu bɔra lɛ yé ka a pla kalé kɔn ’léé.

²⁹ Yé Lévi mi lé é ’ka ’ézé tɔnɔfɛ ye lɛ ka va lo, yee koo, bɛn bɛ gi munu koo, ti valé bugalazannu koo, gyɛzaralomu koo, ’té wo ke ka va bɛ, wo dan a ble lɛ yé wo dan kan lɛ; ’ka kɛlɛ ’bɛ zo, Gakelebale, kalé Bale lé ka bɛ panyanama faa drɔɔ vole we gi.