Bélidɔwesɛbɛ Fiézan 13 - Kazambale lé Sebe Sauunu 1979

Bale bɛ bɔle ma we lɛdɔle

^1-2 Dé balelayezan do nwa ka méléna, ɛɛ, dé nyɛgyɛzan lé, dé tɔmase do léé, ɛɛ, dé we blɛnblɛn lé, dé é a fe ka lɛ yé a lɛ sɔɔ weboen nya, yé ’bɛ zuo é lé ka lɛ léé, kaa go bale bɛnu zuo, kaa wo bɔ, ’té ka ’ka balenu ’ko dɔɔa lo,

³ té ka tɔné dɔ balelayezan ’ko valé nyɛgyɛzan ’ko dére lɛ lo; naa, Gakelebale, kalé Bale a ka gi danna, dé ka Gakelebale, kalé Bale lɔrɔ paan ka bli faa valé kaboen faa nyaa? a gi dɔɔle we gi.

⁴ ’Ka go Gakelebale, kalé Bale ɛ zuo, yé ’ka kana yee ɛ lee; ’ka a sɔnnénu pa, ’ka a dére lɛdɔma, ’ka a bɔ, yé ’ka buvɔ yee ɛ ma.

⁵ Ka ’bɛ balelayezan valé ’bɛ nyɛgyɛzan gyɛ, naa, é a ka nwana Gakelebale, kalé Bale lé é ka si luu gi Éjipiti tɛrɛ la, a ma, yé zi lé Gakelebale, kalé Bale a gɔɔn ka lɛ, é a a va léé, ’é ka si ’bɛ zi ta. ’Ka a gyɛ yé ’bɛ zo lé wenaané si ka méléna.

⁶ Dé i bu lé négɔné léé, dé i be léé, dé i lu léé, i na lé ka yiaan a nya saa do la, dé ’bɛ léé, i béé lé é sɔ i lɛ bélé ibozen zo, dé ’bɛ léé, dé wo va mi do da kyeen gi yé é lé i lɛ léé, kaa go, kaa bale bɛ bɔ, dé é a bale lé bii valé i tinu ’ka a dɔɔa é kyɛn lo, a nya,

⁷ dé wa ka zi munu lé balenu nya, dé wa ka sɔnɔoo, dé wa baaoo, é sia tɛrɛ glɛ do ma yé é bɔ tɛrɛ glɛ koɛ ma, dé é a fe ka lɛ léé, ’wo go ’bɛ balenu bɔ,

⁸ té ka a nyi si a lɛ lo, té ka tɔné dɔ a lɛ lo; té ka nyanai é zén a ta lo, té bé vo lo, té bé ta yɔɔ lo.

⁹ ’Bé gyɛ; bii ɛ i bɛ nwa é vinin a gyɛle we gi, yé ’bɛ zuo munu faa é pa i va;

¹⁰ ’ka gɔlɛ vuli a va yé é ga, é a kwa kulina léé, ’é ka si Gakelebale, kalé Bale lé é ka si luu gi Éjipiti tɛrɛ la, a zuo, ’bɛzama.

¹¹ ’Wa kɛlɛ a zo, Izraɛl munu faa lé a we ’male valé kanale we gi, yé wo ’ka ’bɛ zo wenaané kɛla ka méléna é dɛrɛ lo.

¹² Flanu lé Gakelebale, kalé Bale a nɔ ka lɛ ka nyanalaflanu nya bɛ, dé ka wo va fla do tawe ’ma léé,

¹³ mi sɛrɛlenu nwa wo méléna, yé wo flamunu ’wuo sɛrɛ a fele nya léé, kaa go, kaa bale bɛnu bɔ, ’té ka ’ka ’bɛ balenu dɔɔa lo,

¹⁴ ’ka we ’ko zuoi kuli; ’ka a va gini, ’ka we gi laa é zima. Dé we ’ko a a zo weboen nya, dé wa gi dɔɔ é zima, dé wo bozowe ’ko kɛlɛ ka va weboen nya,

¹⁵ é a lé ka fla ’ko la munu gyɛ gwɔun nya, ’ka bale pa fla ’ko valé é tafɛnu faa ma, yé ’ka winu gyɛ gwɔun nya.

¹⁶ ’Ka gulizarafɛnu faa zun dɔ fla vuun la, yé ’ka wo kyɛ ble, woo valé fla nya, Gakelebale, kalé Bale ’lɛ. Fla ’ko é dan vo lɛ é ’bin nya lɛɛfaama, té wa pa é pa gi monomono lo.

¹⁷ Fɛ lé wo bale pa a ma bɛ, té a do kpen é vo ka lee lo, Gakelebale bli dɔralale koo, alé nyanai zénle ka ta valé zin kɛlɛle ka lɛ koo, ka fanle koo, wo faa we gi, é ’ébo ’nyɔɔn ka tranu lɛ fɛan zo, a zo.

¹⁸ Dé ka Gakelebale, kalé Bale dére ’ma, yé a sɔnnénu lé maa wo gɔɔn ka lɛ kyɔ, dé ka wo pa, yé we lé é ke é drɔle Gakelebale, kalé Bale yuɛ gi, dé ka ’bɛ kɛlɛ, Gakelebale é dan we ’konu faa kɛlɛ lɛ ka lɛ.