Bélidɔwesɛbɛ Fiézan 12 - Kazambale lé Sebe Sauunu 1979

Wolé Bale bɔna do kpen

¹ Bélidɔwenu valé ka gɔnɔlawenu lé ka dan wo lɛdɔ lɛ a ma yé ka dan wo ta tawo lɛ, bléyi faa lé ka nyanaan tɛrɛ lé Gakelebale, ka tranu lé Bale a nɔ ka lɛ, a ta, a bléyi va, wo lé ke ko:

² Bɛnnu lé ka dan wo bin lɛ bɛ, fɛ faa lé woo ’wolé balenu bɔa ana, ’ka wona sɛrɛ; dé wa gɔ grɔgrɔ nwiin‐oo, dé wa gɔpanénu nwiin‐oo, dé wa yilinu wuooo, ’ka wo sɛrɛ.

³ Ka dan wolé yobannanu zana lɛ a gi, ’ka wolé yowɔlɛnu sɛrɛ, ’ka wolé miyilinu kyɛ ble, ’ka wolé yoyilinu yéli, yé ’ka wo tɔnu si fɛkonanu ma.

⁴ Ka ’ka dan Gakelebale kalé Bale zé kɛlɛ lɛ ’bɛ zo lo.

⁵ ’Ka a nagini é nyanana, fɛna do lé Gakelebale, kalé Bale é dan a si lɛ ézé nya ka bɛnnu faa va, yé é tɔ pa a ma, ’ka go yee ɛ na.

⁶ ’Bɛna lé ka dan Bale ban lɛ; kalé balebanwinu lé wa kyɛ blé koo, kalé sarakanu koo, kalé fɛvuzannu koo, kalé féifɛ vininzannu koo, kalé bale kunle lɛ sɔɔ sarakanu koo, kalé bli drɔɔ blɛnu koo, kalé dirinu valé kalé bolinu lé né vininnu koo, ka dan wo nɔ lɛ yee ɛ na.

⁷ Ka koo, kalé munu koo, ka dan fɛ ble lɛ Gakelebale ’lɛ yee ɛ na, yé ka gi é dan nana lɛ fɛ zinnu faa lé Gakelebale, kalé Bale ka drɔɔ vo wo nya, wo ma.

⁸ Ka ’ka dan kɛlɛ lɛ bélé fɛan zo lé ka ke a kɛlɛna kyɔ ’ko, a zo lo; naa, sin, mi faa do do a kɛlɛna, é dɔ a bli gi fɛan zo lé é a é zima, a zo;

⁹ kalé tɔnɔtɛrɛ lé ke ka flinna nya, ’té Gakelebale, kalé Bale a nɔ ka lɛ bɛ, ka ’ka tan bɔ lɛ ’bɛna lo, azama.

¹⁰ Naa, ka dan Juudɛn yuu kini lɛ, yé ka dan nyana lɛ tɛrɛ lé Gakelebale, kalé Bale é dan a kɛlɛ lɛ kazé nya, a ta. Ka nyanézannu lé wo ka zi lɛ sɔɔ, é dan ka si lɛ wo lee, yé é dan flinle nɔ lɛ ka lɛ yé ka dan nyana lɛ duaa.

¹¹ Yé Gakelebale, kalé Bale, é dan fɛ do na si lɛ yé é dan ’é tɔ pa lɛ a ma. Fɛ faa lé maa a fena ka lɛ kyɔ, ka dan da lɛ wo nya yee ɛ na; kalé winu lé wa kyɛ blé koo, kalé sarakanu koo, kalé fɛvuzannu koo, kalé féifɛ vininnu koo, kalé bale kunle lɛ sɔɔ sarakanu koo, ka dan da lɛ wo nya yee ɛ na.

¹² ’Bɛna lé ka koo, ka benu valé ka lunu koo, ka wuogɔnénu valé ka wuolomu koo, ka gi é dan nana lɛ Gakelebale, kalé Bale ’lɛ; dé Lévimi a ka va, yee koo é ziin, naa, azé fɛ do ’ka ka va lo, yé ka valé wonu lé tɔnɔ ’ka ékeva lo, ’bɛzama.

¹³ ’Ka yuɛ pa kabozen va, winu lé wa kyɛ blé, té ka wo nɔ fɛna planu na lo;

¹⁴ naa, winu lé wa kyɛ blé, ka dan wo nɔ lɛ fɛana lé Gakelebale é dan ana si lɛ ka bɛn do va, ana; we faa lé maa wo fe ka lɛ, ’bɛna lé ka dan wo kɛlɛ lɛ.

¹⁵ Duowo, dé wiblelɔrɔ a ka gyɛna, a se a ka lɛ léé, ka wi gyɛ, ka ble, kalé fla faa la, Gakelebale, kalé Bale lé ka drɔɔ vole yɛrama; dé mi a tegeleoo, dé é ’ka tegele looo, ’é a ble bélé plɛn‐an valé yilédiri blele zo.

¹⁶ Naa, we do ana, té ka nyɛ ble lo; ’ka a zana tɛrɛ va bélé ’yi zo.

¹⁷ Kalé ’savuzan koo, kalé dɔrɔ’yi vinin vuzan koo, kalé nyɔnɔ koo, kalé dirinu lé né vinin zannu koo, kalé ’bla valé kalé boli lé né vininzannu koo, kalé bale kunle lɛ sɔɔ sarakanu koo, kalé bli drɔɔ blɛ koo, kalé féifɛ vininnu koo, té ka wo do kpen ble fla lo.

¹⁸ Naa, ka dan ’bɛnu ble lɛ Gakelebale, kalé Bale ’lɛ, fɛ lé Gakelebale, kalé Bale é dan a si lɛ a va, ana; ka koo, ka benu valé ka lunu koo, ka wuogɔnénu valé ka wuolomu koo, Lévimi lé ke ka va koo, ’ka a ble wo nya; Gakelebale, kalé Bale ’lɛ lé ka gi é dan nana lɛ, fuafɛnu faa lé ke ka lee, wo ma.

¹⁹ Dé ka mɔn kalé tɛrɛ la kaaoo, ’ka yuɛ pa kabozen va, té ka gi é san Lévinu ma lo.

²⁰ Dé Gakelebale, kalé Bale kalé tɛrɛ glɛ buru so é zuo, é a fe ka lɛ fɛan zo, a zo, dé wiblelɔrɔ ka gyɛ yé ka léé, é sɔ ’wo lɛ léé, ’wo wi ble, a se a ka lɛ léé, ka a ble, é sɔ ka lɛ fɛan zo, a yɛrama.

²¹ Fɛna do lé Gakelebale, kalé Bale é dan a si lɛ a va, yé é tɔ pa a ma, dé ’bɛ a baa ka ma, a se a ka lɛ léé, ka diri valé ’bla gyɛ, maa a fe ka lɛ fɛan zo, a zo, yé ka a ble kalé fla, é sɔ ka lɛ fɛan zo, a yɛrama.

²² ’Ka a ble bélé plɛn‐an valé yilédiri blele zo; dé mi ’ka tegele looo, dé mi a tegeleoo, ’é a ble.

²³ Naa, we do ana, ’ka yuɛ pa kabozen va, té ka a nyɛ ble lo; nyɛ a fɛ vo é yuɛmafɛ nya; té ka fɛ wi valé é vo é yuɛmafɛ ble ékeva lo.

²⁴ Té ka a ble lo, ’ka a zana tɛrɛ va bélé ’yi zo.

²⁵ Té ka ble lo, ka gi nanale we gi ka valé kalé nénu nya ka zuo, naa, we lé ke we drɔle nya Gakelebale yuɛ gi, dé mi ’bɛ kɛlɛ, ’bɛzan gi é dan nana lɛ.

²⁶ Naa, fɛnu lé ka wo pa é yɛrama Bale zé nya, ’bɛ valé kalé bale kunle lɛ sɔɔ sarakanu nya, ka dan wo nɔ lɛ fɛ do lé Gakelebale é dan ana si lɛ a va, ana.

²⁷ Wi lé wa kyɛ blé, ’ka ’bɛ valé é nyɛ nɔ Gakelebale lɛ, Gakelebale, kalé Bale banna ta; naa, saraka bɛnu, ’wo wo nyɛ zana Gakelebale, kalé Bale banna ta, yé ’ka a wi ble.

²⁸ We faa lé maa a fena ka lɛ, ’ka tɔné dɔ wo lɛ yé ’ka wo tawe kɛlɛ, ka gi nanale lɛɛfaama we gi, ka valé kalé nénu nya ka zuo; naa, we lé ke é zima valé é drɔle Gakelebale, kalé Bale yuɛ gi, dé ka ’bɛ kɛlɛ, ka gi é dan nana lɛ.

Miyili banle ma we plale

²⁹ Bɛnnu lé ka dan go lɛ wo bin lɛ, dé ka wo bin, dé Gakelebale, kalé Bale wo si ana tata, ’té dé ka suni wɔra wolé tɛrɛ la,

³⁰ ’ka yuɛ pa kabozen va, kalé wo kulu gale zuo, té ka wo zuosona yé ka vɔ san ’léé lo. Té ka wolé balenu gi laa léé, bɛnnu ’ko, wo ’wozé balenu bɔa kaa? lo. É sɔ ’wo lɛ léé, ’wo ’wozé kɛlɛ a zo. Té ka fe lo.

³¹ Té ka kɛlɛ ’bɛ zo Gakelebale, kalé Bale vazia lo; naa, wo ’wozé balenu bɔa, bozowe lé a gin éé dɔa Gakelebale nyé gi, a kɛlɛle nya; dé é a wo benu valé wo lunu kyɛblele nya wolé balenu bɔle we gioo, wa kɛla.

³² We lé maa a fena ka lɛ, ’ka wo lɛdɔma, ’ka wo ta tawo; té ka wo taa do kpen pa lo, té ka a do kpen si wo va lo.