Bélidɔwesɛbɛ Fiézan 11 - Kazambale lé Sebe Sauunu 1979

Drɔɔvole valé balepale

¹ ’Ka Gakelebale, kalé Bale lɔrɔ pa; ’ka alé weplale ka lɛ nyi si, ’ka alé bélidɔwenu ta tawo, ’ka a gɔnɔlawenu kɛlɛ, ’ka a sɔnnénu pa.

² Wenu lé kalé nénu ’ka a ye lɛ lo yé wo ’ka a gi dɔɔa lo, a sele ’é dɔ ka gi ma. Gakelebale, kalé Bale lé welɛdɔle mi gi koo, é a blɛn fɛan zo koo, a bɛ plɛplɛ soile koo,

³ wenu valé tɔmasenu lé é a kɛlɛ Éjipiti tɛrɛ la, Éjipiti mununwiinzan Faraɔn valé alé tɛrɛ faa ma koo, a sele ’é dɔ ka gi ma.

⁴ We lé é a kɛlɛ Éjipiti lé sunyanu valé wolé goronu valé wisoonu lɛ koo, wa ka zuo binna aan wo yé é Wɛyi Sɔɔn zén wo ta yé é wo gyɛ do ’té fɛan zo koo, a sele ’é dɔ ka gi ma.

⁵ We faa lé é a kɛlɛ ka lɛ bwi gi fɔɔ yé ka bɔ fɛkona ’ko, a sele ’é dɔ ka gi ma;

⁶ we lé é a kɛlɛ Rubɛn be Éliab, ’bɛ benu Datan valé Abiram lɛ, tɛrɛ ’é lɛ so yé é wo mini fɛan zo, ’wo valé wolé kɔnnu valé wolé fɛnu faa nya Izraɛl munu méléna, a sele ’é dɔ ka gi ma;

⁷ naa, we blɛnblɛnnu faa lé Gakelebale a kɛlɛ, ’ka ana ye.

⁸ Amalé, a sɔnnénu faa lé maa wo gɔɔn ka lɛ kyɔ, ’ka wo pa, yé ka plɛplɛ ye, yé tɛrɛ lé ka dan go lɛ a kɛlɛ lɛ kazé nya bɛ, yé ka bɔalɛ léé, ka a si,

⁹ yé ka bɔalɛ léé, ka mɔn, tɛrɛ lé Gakelebale a fe ka tranu lɛ ébo ’nyɔɔnle nya léé, é dan a nɔ lɛ wo valé wo kulunu lɛ, a ta; é a tɛrɛ nyɔnɔzan nya.

¹⁰ Naa, tɛrɛ lé ka dan a si lɛ kazé nya, é ’ka bélé Éjipiti tɛrɛ lé, ka fwi ana, a zo lo; ’bɛna lé ka fɛ vɔa kalé féi ’té ka ’yi zén‐é a ta ka gane nya bélé zianféi zo.

¹¹ Naa, tɛrɛ lé é dan kɛlɛ lɛ kazé nya, gɔnu ana yé pɛngurunu ana, yé éé lɛɛ’yi minian;

¹² é sia lɛɛ dɛrɛ bɔ bléyi va fɔɔ yé lɛɛ é nyaa a zo, Gakelebale, kalé Bale éé tɛrɛ ’ko paan, ’té a yuɛ a a va bléyi faa va.

¹³ Bale sɔnnénu lé maa wo fe ka lɛ kyɔ, dé ka wo pa, dé ka Gakelebale kalé Bale lɔrɔ pa, dé ka a bɔ ka bli valé kaboen faa nya,

¹⁴ Gakelebale léé, é dan lɛɛ da lɛ kalé tɛrɛ la é dabléyi va, lɛɛ vininzan valé lɛɛ voélazan nya; ka dan kalé ’sa gyɛ lɛ, ka dan kalé dɔrɔ’yi vinin kɛlɛ lɛ, ka dan kalé nyɔnɔ kɛlɛ lɛ;

¹⁵ Gakelebale léé, é dan lu tuu lɛ kalé trubɛnu zé nya; ka dan fɛ ble lɛ yé ka dan kan lɛ.

¹⁶ ’Ka yuɛ pa kabozen va é zima, dé Bale é da sɛrɛ ka gi yé ka nɔla yé ka bale bɛnu bɔ yé ka dia wo wuo.

¹⁷ Gakelebale bli é dan fli lɛ ka ma; é dan la lɛ tan lɛ yé lɛɛ ’ka dan da lɛ lo; tɛrɛ ’ka dan fɛ dɔ lɛ ka lɛ lo; yé ka dan zamaga wo lɛ, tɛrɛ zin lé Gakelebale a nɔna ka lɛ bɛ, a ta.

¹⁸ Dérenu lé maa a fena ka lɛ, ’ka wo pa ka bli gi, ’ka wo pa ka bɔn‐in. ’Ka wo vɔ ka bɛ ma tɔmase nya; wo dan kɛlɛ lɛ ka yarapɛla sɛbɛwɔlɛ nya.

¹⁹ ’Ka wo paa kalé nénu gi, dé ka a kɔn gioo, dé ka a ta laoo, dé ka yiaoo, dé ka nwaoo, ’ka vo wo gle wona.

²⁰ ’Ka wo gyɛ kalé duolivɔgi yili valé kalé duoli ma.

²¹ Dé ka kɛlɛ, ka valé kalé nénu é dan mɔn lɛ, tɛrɛ lé Gakelebale a nɔle fe ka tranu lɛ ébo ’nyɔɔnle nya, a ta, bélé la mɔn é dunle tɛrɛ la loru fɛan zo, a zo.

²² Naa, sɔnnénu faa lé maa wo fe ka lɛ, dé ka wo pa, dé ka wo ta tawo, yé ka Gakelebale, kalé Bale lɔrɔ pa, yé ka tawo alé zinu faa ta, yé ka buvɔ a ma,

²³ Gakelebale é dan bɛn ’konu faa bin lɛ ka ’lɛ, yé bɛnnu lé wo blɛn mini ka ta, ’té wo plɛplɛ mini ka lɛ, ka dan kɛlɛ lɛ wozannu nya.

²⁴ Fɛ faa lé ka dan ka gane zun lɛ ana, é dan kɛlɛ lɛ kazé nya; kalé tɛrɛ glɛ do é dan kɛlɛ lɛ Liban lé bwi nya, yé kalé tɛrɛ glɛ do é dan kɛlɛ lɛ Yufrat yuu nya, yé kalé tɛrɛ é dan go lɛ fɔɔ yé é bɔ wɛyi lé ke yirivɔnazia, a ma.

²⁵ Mi do kpen bɛ ’ka dan mini lɛ ka lɛ lo. Tɛrɛ faa lé ka dan tawo lɛ wo ta, Gakelebale é dan ka kana zén lɛ ana munu gi, yé é dan di kini lɛ wo gi kalé we ma, é a fe ka lɛ fɛan zo, a zo.

²⁶ Ka ye, maa drɔɔvole valé balepale dɔ ka lɛ kyɔ;

²⁷ Gakelebale, kalé Bale sɔnnénu lé maa wo fe ka lɛ kyɔ, dé ka wo pa, ka drɔɔ é dan vo lɛ;

²⁸ dé ka ’ka Gakelebale, kalé Bale sɔnnénu pa lɛ lo, zi lé maa a gɔɔn ka lɛ kyɔ, dé ka si ’bɛ ta yé ka go bale bɛnu lé, ka ’ka wo dɔɔ lɛ é kyɛn lo, wo zuo, ’té bale a é pale ka ma.

²⁹ Dé Gakelebale, kalé Bale ka wɔra tɛrɛ lé ka dan a si lɛ kazé nya, a ta, ’ka mi drɔɔ vo dére fe, ’té ka a é dɔle Garizim gɔ nwiin, yé ka bale pa dére ’konu fe, ’té ka a é dɔle Ébal gɔ nwiin.

³⁰ Gɔ ’konu a Juudɛn yuu zi, zi lé é go yirivɔnazia, a zuo. Kanaan munu lé woo nyanaan fɛna pɛblɛɛna, Gilgal yara, sɛnéyilinu lé ke Moré, wo sɔnɔ, wa wolé tɛrɛ la.

³¹ Naa, ka dan Juudɛn yuu kini lɛ yé tɛrɛ lé Gakelebale, kalé Bale a nɔ ka lɛ, ka dan a si lɛ; é dan kɛlɛ lɛ kazé nya, yé ka dan nyana lɛ ana.

³² Bélidɔwenu valé gɔnɔlawenu lé maa wo gɔɔn ka lɛ kyɔ, ’ka wo lɛdɔma yé ’ka wo ta tawo.