Bélidɔwesɛbɛ Fiézan 10 - Kazambale lé Sebe Sauunu 1979

Gakelebale bélidɔwe vu nɔ é ziin

¹ ’Bɛ bléyi va, Gakelebale lé an lɛ léé, ’maa gɔlɛfén fié nyaa é ziin bélé a vininnu zo, yé ’maa go ’é va gɔ nwiin; yé ’maa kɛsu do kɛlɛ yili nya é ziin;

² é léé, dére lé ke gɔlɛfén vinin lé maa wo ’wii bɛ, wo ta, é dan yee dére duo gyɛ lɛ gɔlɛfén koɛnu ta yé maa wo pa kɛsu gi.

³ Yé maa kɛsu do kɛlɛ akasiayili nya; yé maa gɔlɛfén fié nyaa bélé a vininnu zo, yé maa gɔ gié, ’té gɔlɛfén fié a an lee.

⁴ We lé ke é gyɛle gɔlɛfén vininnu ta, we gɔ vu lé Gakelebale a fe ka lɛ gɔ nwiin kyɛ méléna, ’té ka a é zénle ékeva yi la bɛ, é wo gyɛ gɔlɛfén fié ’konu ta, yé é wo nɔ an lɛ.

⁵ Maa nɔla yé maa gɔ zun; kɛsu lé maa a kɛlɛ bɛ, maa gɔlɛfén fié pa a gi, yé wo vo a gi, Gakelebale a fe an lɛ fɛan zo, a zo.

⁶ Izraɛl lé nénu si Béérɔt‐Bɛné‐Jaakan yé wo go Mozéra. ’Bɛna lé Arɔn ga yé wa pa; wo a be Éléazaa bɛ pa Bale banle ta a pa gi.

⁷ Wo si ’bɛna yé wo go Gugoda, yé wo si Gugoda yé wo go Jotibata, tɛrɛ lé ’yiyoro kiɛre ke ana, a ta.

⁸ ’Bɛ bléyi va Gakelebale Lévi bɛn si a va yé é lé wo lɛ léé, ’wo ’élé gipawe pagikɛsu kɔné si, yé ’wo dɔ ’é ’lɛ ’é bɔle we gi, yé wo munu drɔɔ vo ’é tɔ nya; yé Lévinu vo ’bɛ kɛlɛna fɔɔ kyɔ.

⁹ Bɛwemalé Lévinu lé tɔnɔ ’ka wo bwenu zé va lo; Gakelebale ɛ ke wolé tɔnɔfɛ nya, Gakelebale, kalé Bale a fe wo lɛ fɛan zo, a zo.

¹⁰ An vo gɔ nwiin bélé é vinin zo, yiéyi yɔ fié valé béli yɔ fié. Gakelebale ’é tɔné dɔ an lɛ é ziin; é ’ka a va léé, ’é ka gyɛ lo.

¹¹ Gakelebale lé an lɛ léé, ’an nwa, ’an go, ’an tawo munu ’lɛ. Tɛrɛ lé yee a fe wo tranu lɛ ébo ’nyɔɔnle nya lé é dan a nɔ lɛ wo lɛ, ’wo go a si ’wozé nya.

We lé Bale ke a va

¹² Amalé, sin, Izraɛl munu, Gakelebale a a va léé, ka mɛ kɛlɛɛ? É ’ka a va léé, ’ka kana é lee, yé ’ka tawo élé zinu ta, yé ’ka ’é lɔrɔ pa yé ’ka ’é bɔ ka bli faa valé kaboen faa nya loo?

¹³ É ’ka a va léé, ’ka ’é sɔnnénu pa yé bélidɔwenu lé maa wo gɔɔn ka lɛ kyɔ ’ko, ’ka wo lɛdɔma, ka gi nanale we gi loo?

¹⁴ Ka ye, la koo, é zi lanu koo, tɛrɛ koo, é tafɛnu koo, wo faa a Gakelebale, kalé Bale zé nya.

¹⁵ Naa, duowo, ka tranu saa ɛ sɔ a lɛ yé é buvɔ wo ma; yé wo é zuo, ka lé ka ke wo kulu nya, é ka é si munu faa va, ka yé kyɔ fɛan zo ’ko, a zo.

¹⁶ Amalé ’ka bli si wenyané lɛ é ziin, yé té ’ka kɛlɛ wemaplɛplɛzannu nya é dɛrɛ lo.

¹⁷ Naa, Gakelebale, kalé Bale a balenu lé Bale nya, é a mizannu Zan nya, é a Bale blɛn nya, é a Bale plɛplɛ valé mitadanmawe kɛlɛ Bale nya, yé é ’ka glɛ dɔa mi gi lo, yé é ’ka dɔa mi zuo mi leefɛ ma lo;

¹⁸ éé we tegele kɛla bugalazannu valé tigalazannu valé gyɛzaralomu lɛ; éé bɛn lɔrɔ paan yé éé fɛblele valé sɔ no wo lɛ.

¹⁹ Ka a é vinin bɛnnu nya Éjipiti tɛrɛ la, amalé ’ka bɛn lɔrɔ pa.

²⁰ ’Ka kana Gakelebale, kalé Bale lee, ’ka a bɔ, ’ka buvɔ a ma, ’ka bale ’nyɔɔn a tɔ nya.

²¹ É a kalé fua nya, é a kalé Bale nya; yee ɛ we blɛnnu valé mitadanmawenu kɛlɛ ka méléna yé ka ana ye.

²² Ka tranu go Éjipiti tɛrɛ la, ’té wa mi yɔ yaa wɔlɛ vu; sin, Gakelebale, kalé Bale ka kɛlɛ mi gu blɛn nya, kiɛre bélé lagi monénénu zo.