Bélidɔwesɛbɛ Fiézan 1 - Kazambale lé Sebe Sauunu 1979

Moizi kun Izraɛlnu lé tawole zuo fele ma

¹ Dérenu lé Moizi a fe Izraɛlnu lɛ, ’té wa Juudɛn bwi la, a zi ’ko, fɛna pɛblɛɛna, Sufi yara zia, ’té wa Paran koo, Tofɛl koo, Laban koo, Asérɔt koo, Di‐Zaab koo, wo méléna, wo lé ke ’ko.

² Dé wo si Orɛb yé wo gié Séii gɔ lé zi ta yé wo bɔ Kadɛs‐Baanéa, wo tawo yi vu ta do.

³ Wolé tawo lɛɛ yɔ fiézan gi, ’bɛlé moné vu ta dozan lé yi vininzan nya, Moizi we fe Izraɛl lé nénu lɛ. We faa lé Gakelebale a pa a ’léé, léé, ’é a fe, é a fe wo lɛ.

⁴ Amorénu nwiinzan Sioni lé éé nyanaan Esibɔn, ’bɛ valé Bazan munu nwiinzan Ɔg lé éé nyanaan Asitarɔt valé Édréi, Izraɛlnu guli dan wo va yé Izraɛlnu wo kele faa yé we ’ko kɛlɛ.

⁵ Izraɛlnu a Juudɛn yuu zi ’ko, Moab tɛrɛ la yé Moizi bélidɔwe ’ko gi fele péli sia wo lɛ yé é léma:

⁶ Gakelebale, kolé Bale lé kaa lɛ Orɛb a yi la léé, kaa nyanale gɔ ’ko ma sɔ.

⁷ É léé: ’Ka nwa, ’ka zi sia. ’Ka go Amorénu lé gɔ valé é zi tɛrɛ faa la; fɛna pɛblɛɛna koo, gɔ ma koo, pɛngurunu koo, yirinwana bɛyilazia koo, wɛyi vazia koo, Kanaan munu lé tɛrɛ valé Liban tɛrɛ koo, ’ka go wo faa na, fɔɔ yé ka bɔ yuu blɛn Yufrat ma.

⁸ É lé yi la léé, ’é tɛrɛ ’ko faa nɔ ka lɛ; ’ka go, tɛrɛ lé ’yee Gakelebale a fe ébo ’nyɔɔnle nya léé, é dan a nɔ lɛ ka tranu Abraam koo, Izak koo, Jakɔb koo, wo lɛ, wo valé ’wo kulunu lɛ, ’ka go a si kazé nya.

Wo weblemunu si a va

⁹ ’Bɛ yi la maa a fe ka lɛ léé, maa do kpen ’ka bɔa ka kɔné sile lɛ lo.

¹⁰ Gakelebale, kalé Bale, ka fan, yé kyɔ ka a kiɛre bélé lai monénénu zo.

¹¹ Gakelebale, ka tranu lé Bale, ’é ka fan kiɛre é ziin gɔnɔ wuru soru ma, yé ’é ka drɔɔ vo, é a fe ka lɛ fɛan zo, a zo ma.

¹² Wo ka bɛ pa an lee, ’bɛ koo, ka kɔné valé kalé zavɔlenu koo, maa do kpen é bɔa ’bɛ sile lɛ kaa?

¹³ Munu lé ke wedɔɔzannu valé wuoatazannu nya, ’té kalé munu wo dɔɔ, ’ka wo si ka bɛn lɛgɔnɔnu gi yé maa dan wo dɔ lɛ ka nwiinzannu nya.

¹⁴ Yé ka lé an lɛ ’bɛ yi la léé, we lé maa a fe bɛ, é a é zima.

¹⁵ Yé maa mi blɛnnu si ka bɛn lɛgɔnɔ faa gi, ’té wa wedɔɔmunu nya, ’té munu wo dɔɔ, yé maa wo dɔ ka nwiin; maa wo kɛlɛ mi wuru soru soru koo, mi yɔ soru soru koo, mi yɔ fié wɔlɛ vu vu koo, mi vu vu koo, wo nwiinzannu nya, yé maa a se kɛlɛ wo lɛ ka bɛn lɛgɔnɔnu gi.

¹⁶ ’Bɛ yi la maa lé kalé weblemunu lɛ léé, ’wo tɔné dɔ ’wo bwenu lɛ; dé we bɔ mi do valé é bwe mélénaoo, dé é bɔ mi do valé bɛn do mélénaoo, ’wa yuɛ gi bo tegele.

¹⁷ Dé wa we blena, té wo glɛ dɔ munu gi lo; ’wo tɔné dɔ mi kiéné lɛ bélé fɛan zo lé woo tɔné dɔa mi blɛn lɛ, a zo; té wo kana mi do kpen lee lo, naa, weblele a Bale zé nya. Dé we do wo kele, ’wo da a nya an va yé maa a gi ’ma.

¹⁸ ’Bɛ zoan maa fe ka lɛ yi la loo? Yé maa ka kɛlɛwe faa gɔɔn ka lɛ.

Wo mi vu ta fié pa zia Kanaan tɛrɛ naginile we ma

¹⁹ Ko si Orɛb, yé bwi blɛn lé a ta éé kana zén‐é mi gi, ’té ka a ye ’ko, ko gié ana fɛfaana; ko Amorénu lé gɔ ma zi sia, Gakelebale, kolé Bale a fe ko lɛ fɛan zo, a zo, yé ko bɔ Kadɛs‐Baanéa.

²⁰ Yé maa lé ka lɛ léé, ka bɔ Amorénu lé gɔ lé Gakelebale, kaalé Bale, a nɔ kaa lɛ, a ma.

²¹ Ka yua, sin, Gakelebale, kalé Bale tɛrɛ nɔ ka lɛ; ’ka go, ’ka a si kazé nya, Gakelebale, ka tranu lé Bale a fe ka lɛ fɛan zo, a zo; té ka kana lo; té di ’é kini ka gi lo.

²² Yé ka faa da maa va, yé ka léé, ’wo munu nwunvɔ ’wo ’lɛ, yé ’wo go tɛrɛ nagini, yé dé zi kyɛn ta lé ’wo dan gié lɛɛ? yé dé fla kyɛnnu ma lé ’wo dan bɔ lɛɛ? yé ’wo da a zuo fe ’wo lɛ.

²³ Yé maa a ye léé, ’bɛ a é zima; yé maa mi vu ta fié si ka va, ka bɛn lɛgɔnɔnu gi do do.

²⁴ Wo go, yé wo gɔ gié yé wo bɔ pɛnguru lé wa laama Esikɔl, ana, yé wo ana nagini.

²⁵ Yé wo tɛrɛ ’ko la féifɛnu si yé wo da a nya ko lɛ; yé wo ana tɛrɛlawe zuo fe ko lɛ yé wo léé, tɛrɛ lé Gakelebale, kolé Bale a nɔ kaa lɛ, é a tɛrɛ zima nya.

²⁶ Naa, é ’ka sɔ lɛ ka lɛ léé, ’wo go ana lo, amalé dére lé Gakelebale, kalé Bale a fe ka lɛ, ka sɔn vɔ a ma.

²⁷ Ka gun gyɛ kalé sɔkɔnnu gi, yé ka léé, ’wo za a Gakelebale gi, amalé é ’wo si Éjipiti tɛrɛ la, léé, ’é ’wo nɔ Amorénu lɛ, yé ’wo kulu ’é ga.

²⁸ Yé ka léé, ’wo go ana kaa? ’Wo bwenu léé, ana munu a blɛɛn yé wo torole mini kaa ta; ana flanu a blɛn yé wo zi gɔrɔ a é torole fɔɔ wo bɔ la ma, yé ’wo Anak munu ye ana é ziin, amalé ’wo fuu faa si ’wo ta. A zoan ka fe an lɛ loo?

²⁹ Yé maa lé ka lɛ léé, té ka gi nyɛ ’é kini lo; té ka kana wo lee lo.

³⁰ Gakelebale, kalé Bale lé éé tawoo ka ’lɛ, yeebozen é dan ka ta guli dan lɛ, we faa lé é a kɛlɛ ka yuɛ va Éjipiti tɛrɛ la, a yɛrama;

³¹ yé bwi gi é ziin, ka a ye léé, Gakelebale kalé Bale ka si bélé mi é élé né sié fɛan zo, a zo, ta faa lé ka wo, a gi fɔɔ yé ka bɔ fɛkona ’ko.

³² Dé Gakelebale, kalé Bale ’bɛ faa kɛlɛoo, ka ’ka pa lɛ ’bɛ ta lo;

³³ kalé Bale lé éé goo ka ’lɛ yifaama ka nyanana nagini lɛ, ’té é a ka ’lɛ é béli kyɛ gi, ’té éé zi gɔɔn‐an ka lɛ, ’té é a ka ’lɛ é yiéyi lati gi, ka bli ’ka pa lɛ ’bɛ lɛ lo.

³⁴ Gakelebale kalé gun gyɛle ’ma. A bli fli yé ébo ’nyɔɔn yé é léé:

³⁵ Tɛrɛ zin lé maa anbo ’nyɔɔn léé, maa dan a nɔ lɛ wo tranu lɛ, bléyi ’ko vamunu nyané ’ko, wo va mi do kpen ’ka dan ’bɛ tɛrɛ ye lɛ lo,

³⁶ ’té dé é ’ka Jéfuné be Kalɛb nya lo; é dan a ye lɛ, yé tɛrɛ lé é tawo a ta, maa dan a nɔ lɛ yee valé élé nénu lɛ; é maa, Gakelebale, dére tawe kɛlɛ tegelee, ’bɛzama.

³⁷ Kalé we ma lé Gakelebale bli fli maa ma é ziin, yé é léé, maa é ziin, maa ’ka dan wɔra lɛ ana lo.

³⁸ É léé, ’é wuozan, Nɛn be Jozué, é dan go lɛ ana; é a lé maa a dɔ gligli, naa, yee lé we ma lé Izraɛl munu é dan tɛrɛ ’ko ye lɛ ’wozé nya.

³⁹ Kalé né kiénénu lé ka wo mawe fe léé, wo dan kɛlɛ lɛ gulizarafɛnu nya, wo ɛ dan wɔra lɛ ana; ka benu lé wo ’ka wezin valé wenyané va sina dɔɔa tan lo, wo ɛ dan wɔra lɛ ana; maa dan a nɔ lɛ wo ɛ lɛ; é dan kɛlɛ wo ɛ zé nya.

⁴⁰ Naa, ’kaa, ’ka nɔla, ’ka go bwi gi Wɛyi Sɔɔn vazia.

⁴¹ Yé ka lé an lɛ léé, ’wo wenyané kɛlɛ Gakelebale ma; ’wo dan go lɛ yé ’wo dan guli dan lɛ, Gakelebale, ’wolé Bale a fe ’wo lɛ fɛan zo, a zo. Yé ka faa kalé gulidanfɛnu si yé ka boyuɛvawe kɛlɛ yé é dɔ ka gi léé, ’wo go gɔ mazia.

⁴² Gakelebale lé an lɛ léé, maa fe ka lɛ léé, té ka go guli dan lo; yee ’ka ka va lo; té ka nyanézannu ’é ka gyɛ é pla lo.

⁴³ Maa a fe ka lɛ, naa, ka ’ka ka tɔné dɔ lɛ lo; dére lé Gakelebale a fe, ka a lɛgama, yé ka bli si kabo lɛ yé ka go gɔ mazia.

⁴⁴ Yé Amorénu lé wo ke é nyanale gɔ ’ko ma, wo da guli dan lɛ ka va, yé ka da ka nwunzi lé zɔrɔfuru nya; wo ka gyɛle sia Séii tɛrɛ la, fɔɔ yé ka bɔ Ooma.

⁴⁵ Ka da ka pa gi yé ka wuvɔ Gakelebale lɛ; naa, Gakelebale ’ka é tɔné dɔ lɛ ka dére lɛ lo, é ’ka ka ban lɛ é tɔné nya lo.

⁴⁶ Ka vo Kadɛs, yé ka mɔn ana é baba.