Daniɛl 9 - Kazambale lé Sebe Sauunu 1979

Daniɛl bazoro élé munu lé we ma

¹ Mɛdenu bɛn gi mi do lé wa laama Asuérus be Darius, yeean é kɛlɛ Kaldé munu nwiinzan blɛn nya;

² a plale mi nwiin lɛɛ vininzan nya, maa Daniɛl, maa a ye sɛbɛ gi léé, é a lé Jérusalɛm é vo é ’bin nya lɛɛ yɔ yaa wɔlɛ vu wuo, lɛɛ lé Gakelebale a ’léé fe balelayezan Jérémi lɛ, a yɛrama.

³ An yara nɔla Mizambale va bazorole valé we laale a lee we gi, ’té maa lɔrɔ sɔn‐o, ’té bɔlɔ valé kyɛyee a é zénle an ta.

⁴ An bazoro Gakelebale anlé Bale lɛ, yé an wenyané ’ko fe a lɛ léé: Mizan, Bale blɛn lé éé kana zén‐é mi gi, biian i dɔa ilé gipawe ta, yé munu lé i sɔ wo lɛ yé woo ilé bélidɔwe sɔnnénu paan, i nyanai ’é zén ko ta.

⁵ Ko wenyané kɛlɛ; ko weplenu kɛlɛ; ko a mi nyanénu valé nwamimazannu nya. Ko sɔn vɔ ilé bélidɔwe sɔnnénu valé i déretawenu ma.

⁶ Balelayezannu lé wo we fe i tɔ gi, ko nwiinzan blɛnnu koo, ko nwiinzannu koo, ko tranu koo, kolé tɛrɛlamunu faa koo, wo lɛ, ko ’ka ko tɔné dɔ lɛ woo, i wuozannu lɛ lo.

⁷ Mizan, kɛlɛle tegele a bii ɛ zé nya; yé yaragyɛwe a kozé nya kyɔ, Juda munu koo, Jérusalɛm munu koo, Izraɛlnu faa koo, dé wa é puoo, dé wa baaoo, yaragyɛwe a wo faa zé nya. Wo yuɛ gi blanle lé we ma lé wo kɛlɛ weanwiinzannu nya, amalé i wo bin yé wo sɔɔla tɛrɛ faa la.

⁸ Mizan, ko koo, ko nwiinzan blɛnnu koo, ko nwiinzannu koo, ko tranu koo, ko wenyané kɛlɛ i ma, amalé yara ko gyɛ.

⁹ Mizan, kozé Bale, ko nwa i ma, naa, bii a nyanaizénzan valé mimawe?-?vozan nya.

¹⁰ Ko ’ka ko tɔné dɔ lɛ Gakelebale kolé Bale dére lɛ lo; bélidɔwenu lé é a nɔ ko lɛ a wuozannu balelayezannu lɔlu nya, ko wo sɛrɛ.

¹¹ Izraɛlnu faa ilé bélidɔwe sɛrɛ yé wo ’ka i dére ’ma lɛ lo. Amalé balepalenu valé bale ’nyɔɔnlenu lé wo ke é gyɛle Bale wuozan Moizi lé bélidɔwe gi, wo wo kun. Naa, ko wenyané kɛlɛ Bale ma, azama.

¹² Dérenu lé é a fe ko valé ko nwiinzannu lé woo zi gɔɔn‐an ko lɛ, kolé we nya, é wo lɛ sɔɔ. É we tɔntɔn blɛn bɔ ko ma. We lé é bɔ Jérusalɛm ma, ’bɛ zo we ’ka bɔ lɛ tɛrɛ la fɛ bɛ do kpen na lo.

¹³ We tɔntɔn ’konu faa bɔ ko ma, we lé Moizi a gyɛ bélidɔwe nya, a yɛrama. Naa, ko ’ka zanté vɔ lɛ Gakelebale kozé Bale lɛ lo; ko ’ka sɔn vɔ lɛ kolé weplenu kɛlɛle ma lo; ko ’ka webozen ban lɛ ko tɔné nya lo.

¹⁴ Amalé Gakelebale we tɔntɔn ’ko bɔ ko ma sɔbɛlawe nya. Naa, Gakelebale kolé Bale a tegele é kɛlɛwenu faa gi, naa, ko ’ka ko tɔné dɔ lɛ a dére lɛ lo.

¹⁵ Yé sin, Mizan, kolé Bale, biian ilé munu si Éjipiti tɛrɛ la i bɛ plɛplɛ nya yé i tɔ kɛlɛ blɛn fɛan zo lé é ke kyɔ, a zo, ko wenyané valé weple kɛlɛ i ma.

¹⁶ Mizan, ilé bliflile valé i wɛwɛ dɔle ’é si ilé fla Jérusalɛm valé ilé gɔ plɛplɛ ma ma, i nyanai zénle blɛn yɛrama. Naa, kolé wenyanénu valé ko tranu lé weplenu kɛlɛle ma lé Jérusalɛm valé ilé munu kɛlɛ serelebomazannu nya munu faa lé ke wo zi, wo yuɛ gi.

¹⁷ Amalé sin, kozé Bale, ’i tɔné dɔ i wuozan lé bazorodére valé alé zantévɔdére lɛ, yé Mizan lé sɔlɛle pli zi ’i yara soi ilé fɛna plɛplɛ lé é vo é ’bin nya, a vazia.

¹⁸ Anzé Bale, ’i an ban i tɔné nya; ’i tɔné dɔ an lɛ; ’i yuɛ fuo yé ilé fla lé é vo é ’bin nya, bé nagini. Fla lé wo i tɔ laan ana, bé nagini. É ’ka lé ko a tegele amalé ko a zanté vɔna i lɛ lo; i nyanai zénle blɛn lé we ma lé ko a kɛlɛna.

¹⁹ Mizan, ’i tɔné dɔ! Mizan, ’i ko ma we vo! Mizan, bé ’ma ma! Anzan Bale, bé kɛlɛ, té i mɔn lo, i tɔ kɛlɛle blɛn lé we ma! Naa, i tɔ a ilé fla valé ilé munu ma.

Gabriɛl balelawe gi fe

²⁰ An vo wefena ’té an bazoroan, yé anlé wenyanénu valé anlé munu Izraɛl munu lé wenyanénu fe, yé maa anlé zanté vɔ Gakelebale anlé Bale lɛ, anlé Bale lé gɔ plɛplɛ lé we ma.

²¹ Maa a tan anlé bazoro dére fena tɔɔn, mi lé wa laama Gabriɛl, ’té maa a ye é vinin yuɛzi gi, é da sile plɛplɛ nya yé é bié an sɔnɔ nyanadi balebanbléyi va.

²² É we paa an gi yé é glewo an va. É lé an lɛ léé: Daniɛl, an dan sin i bɔn gi kini lɛ.

²³ I kun bazorole ma bléyian va, Gakelebale dére fe yé an da a fe lɛ i lɛ. Naa, i sɔ a lɛ é baba. I tɔné dɔ dére ’ko lɛ yé i yuɛziwe gi ’ma.

²⁴ Wo flɛyi yɔ yaa wɔlɛ vu dɔ ilé munu valé ilé fla plɛplɛ lɛ; ’bɛ nyaale nya ’té wolé weple kɛlɛle valé wolé wenyané kɛlɛle nyaa; yé Bale é wolé weple ’yibofɛ nɔ, yé webozen lé éé voo ana lɛɛfaama a glɛ ’ka lo yé é da, yé yuɛziwe valé balelawefele lɛ é sɔɔ, yé wo nyɔnɔ zén mi sauunnu va Mi Sauun ta.

²⁵ Bɛwemalé, ’i we ’ko ’ma, yé bé gi ’ma ma. Dére lé é a fe léé, wo dan Jérusalɛm pa lɛ é ziin, a febléyi va fɔɔ yé é bɔ Nyɔnɔzénnwiinzan, Zigɔɔnzan bléyi ma, é a flɛyi sɔrafié nya. Flɛyi yɔ yaa wɔlɛ fié gi, wo dan vuunlanu kɛlɛ lɛ yé wo dan gurunu bo lɛ, naa bléyi tɔntɔnnu lé.

²⁶ Flɛyi yɔ yaa wɔlɛ fié ’konu giéle zuo, wo dan Nyɔnɔzénnwiinzan gyɛ lɛ yé a pagizan ’ka dan ye lɛ lo. Minwiinzan do é dan da lɛ yé alé munu é dan fla valé fɛna plɛplɛ kɛlɛ lɛ é ’bin nya yé azé nyaale é dan kɛlɛ lɛ bélé ’yiyoro plɛplɛ zo. Naa wa fe léé, wo dan vo lɛ é sɛrɛle fɔɔ yé gulidanle é nyaa, a zo.

²⁷ Minwiinzan ’ko é dan gipawe gligli do kɛlɛ lɛ mi kiɛre va flɛyi do wuo. Yé flɛyi ’ko méléna, é dan saraka bole valé blɛ kɛlɛle yi ga lɛ. Fɛsɛrɛzan é dan bozowenu kɛlɛ lɛ fɔɔ yé a sɛrɛle valé wean wa ma’lɛrɛ azé nya, yé é bɔ a ma.