Daniɛl 8 - Kazambale lé Sebe Sauunu 1979

Daniɛl ’blagɔné valé boligɔné ye yuɛzi gi

¹ Minwiinzan blɛn Bɛlsasaa plale mi nwiin lɛɛ yaazan nya, maa Daniɛl, maa yuɛziwe do ye, yuɛziwenu lé maa wo ye é vinin, wo zuo.

² Maa yuɛziwe ’ko ye bléyian va, ’té é a bélé maa a Élam tɛrɛ la fla blɛn lé wa laama Suz, a ta. Anlé yuɛzi gi, ’té maa a Ulai yuu sɔnɔ.

³ An yuɛ vɔ yé maa nagini, ’té ’blagɔné do a é dɔle yuu ma yé a bélinu a. A bélinu a é torole, naa, a do torole mini é bɔlu do ta yé yee ɛ bɔra é voéla.

⁴ Yé maa a ye léé, ’blagɔné a winu gyɛna é bélinu nya, yirivɔnazia koo, yirinwana bɛbolazia koo, yirinwana bɛyilazia koo, wona, yé wi do kpen ’ka bɔa dɔle lɛ a ’lɛ lo, yé mi do kpen ’ka bɔa yee winu sile lɛ a lee lo. Wean é sɔ a lɛ, yee lé éé a kɛla, yé alé plɛplɛ gi gyɛ.

⁵ Dé maa a naginina téiin, bé ye, boligɔné do si yirivɔnazia yé é gié tɛrɛ faa la, ’té é ’ka manean tɛrɛ ma lo; boligɔné ’ko, a béli a do blɛn é dɔle a yuɛnu méléna.

⁶ É da fɔɔ yé é bɔ ’blagɔné lé a bélinu ke, ’té maa a ye é dɔle yuu ma bɛ, a ma. Yé é vlanburu a vazia é bli faa flile nya.

⁷ Maa a ye léé, é bié ’blagɔné sɔnɔ yé é bli fli a ma. É ’wuo zun ’blagɔné ma, yé é a béli fiénu yéli, ’té plɛplɛ do kpen ’ka ’blagɔné lee yé ’bɛ é dɔ a ’lɛ lo. É ’blagɔné bo tɛrɛ va yé é a zɔn é gane nya, yé mi lé ’bɛ é ’blagɔné sié a lee, ’bɛzan ’ka ye lɛ lo.

⁸ Boligɔné lé plɛplɛ gi gyɛ é baba, naa, dé alé plɛplɛ lɛ sɔɔ, a béli blɛn yéli. Yé a béli blɛn ziɛn bɔra a pa gi, yé wo yara dɔ fu sina ziɛnna.

⁹ Yé béli kiéné do bɔra a béli ziɛn va béli do ma, yé é kɛlɛ blɛn yirinwana bɛyilazia koo, yirinwanazia koo, tɛrɛnu faa va tɛrɛ zima koo, wo vazia.

¹⁰ A béli kiéné ’ko nwa fɔɔ lai sunyanu va. É wo lɛ do dia tɛrɛ va, yé é monénénu lɛ do dia tɛrɛ va yé é wo zɔn é gane nya.

¹¹ É nwa fɔɔ lai sunyanu nwiinzan va, yé balebanwi lé wa kyɛ blé, ’té wa no lɛɛfaama, é a nɔle yi ga, yé é alé fɛna plɛplɛ zana a gi.

¹² Lai sunyanu valé balebanwi lé wa kyɛ blé, ’té wa no yifaama, wa pa yee béli ’ko lee wenyané lé we ma; yee a béli ’ko webozen sɛrɛ. Wenu faa lé é wo kɛlɛ, wo nyian wo a lee.

¹³ An mi sauun do dére ’ma wefena, yé mi sauun do lé wefezan lɛ léé: Balebanwi lé wa kyɛ blé ’té wa no yifaama, é valé wenyané lé éé we sɛra, yuɛziwe lé wa ye wolé we ma, a lɛ é dan sɔɔ lɛ bléyi kyɛɛn vaa? Wo dan daan lɛ fɛna plɛplɛ valé lai sunyanu zɔnle ma wo gane nya bléyi kyɛɛn vaa?

¹⁴ Yé é lé an lɛ léma: Nyanadi valé bladi baa do wuru do yɔ soru giéle zuo lé fɛna plɛplɛ gi é dan kɛlɛ lɛ tegele.

Lanje Gabriɛl yuɛziwe gi fe Daniɛl lɛ

¹⁵ Maa Daniɛl, maa yuɛziwe ’ko ye bléyian va, ’té maa a kwa kulina léé, maa a gi ’ma, bé ye, fɛyuɛmale do lé é ke bélé mi zo, é dɔ an ’lɛ.

¹⁶ ’Bɛ zuo an mi do dére ’ma Ulai yuu va yé é siaa léé: Gabriɛl, ’i yuɛziwe ’ko gi fe a lɛ.

¹⁷ É da an va, fɛana lé an ke é é dɔle, ana. Dé é bié, di blɛn kini an gi yé an dia an bli la. Yé é lé an lɛ léé: Blami be, ’i we ’ko ’ma ma; naa, yuɛziwe ’ko a bléyi voéla we nya.

¹⁸ É a we fena an lɛ bléyian va, ’té maa a é diale tɛrɛ va é zɔrɔle. É bɛ mane an ma yé é an dɔ loru fɛana lé an ke é vinin, ana.

¹⁹ ’Bɛ zuo é lé an lɛ léé: We lé é dan bɔ lɛ bléyi voélazan lé ke bliflibléyi nya, a nya, maa dan a paa lɛ i gi. Naa, wo bléyi do dɔ bléyi voélazan nya.

²⁰ ’Blagɔné lé bé ye, ’té a bélinu a, é a Médi munu valé Pɛɛs munu nwiinzan blɛn nya.

²¹ Boligɔné lé bé ye, é a Javan nwiinzan blɛn nya. A béli blɛn lé ke a yuɛnu méléna, é a wo nwiinzan blɛn vininzan nya.

²² A béli ziɛn lé wo bɔra a béli blɛn lé é yéli, a pa gi bɛ, wa bɛngɔnɔ ziɛn lé wo dan nwa lɛ bɛntɛrɛ ’ko la, wo nya; naa, wozé plɛplɛ ’ka bélé a vininzan zé zo lo.

²³ Wozé plale mi nwiin nyaabléyi va, bléyian va lé wolé wenyané fan, minwiinzan blɛn do é dan nwa lɛ, ’té é a é fanle we blɛnblɛn fele valé dabli kɛlɛle nya.

²⁴ Alé plɛplɛ gi é dan gyɛ lɛ, naa, abo lé gla ma kaan lo; é a fɛsɛrɛzan nya fɛan zo, é gié é glɛ la. Wenu lé é dan wo kɛlɛ lɛ wo nyian é dan wo lɛ a lɛ. É dan mi plɛplɛnu valé Bale lé munu sɛrɛ lɛ tata.

²⁵ A bɛ ma kɛlɛle néné valé alé dabli kɛlɛle nyian wole lé we ma, a bli é dan fan lɛ bo blɛn wenu nya, yé munu lé wo ke é nyanale drɔɔ, é dan wo kiɛre gyɛ lɛ za ma, yé é dan nwa lɛ minwiinzannu nwiinzan ma; naa, é dan ’wii lɛ, dɔlé ’té mi do ’ka we do kɛlɛ lɛ a lɛ lo.

²⁶ Nyanadinu valé bladinu lé yuɛziwe lé bé ye bɛ, é a webozen nya. Naa bii, ’i yuɛziwe ’ko tadɔ i bli gi. Naa, é a bléyi baanu zé nya.

²⁷ We ’konu zuo, maa Daniɛl, maa yi kiɛre gié, ’té an yuɛgi zun, ’té gyɛ a an ma. ’Bɛ zuo yé an nwa yé an kun minwiinzan blɛn lé wenu kɛlɛle ma. Yuɛziwe lé maa a ye, é an gi vuru, yé mi do kpen ’ka a gi dɔɔ lɛ lo.