Daniɛl 7 - Kazambale lé Sebe Sauunu 1979

Daniɛl wenu ye yuɛzi gi

¹ Babilɔn minwiinzan blɛn Bɛlsasaa plale mi nwiin lɛɛ vininzan nya, Daniɛl nyɛ gyɛ yé é yuɛziwenu ye, ’té é a é yiale. ’Bɛ zuo yé é yee nyɛ gyɛ sɛbɛ ta, yé é a va we blɛnnu zuo fe.

² Daniɛl wefele péli sia yé é léé: Yuɛziwenu lé maa wo ye é béli, maa a wo naginina aan wo, yé bé ye, lagi fu ziɛn wɛyi blɛn nwa fiaa.

³ Yé wi blɛn ziɛn bɔra wɛyi va. Wo dɔbɛ a do do;

⁴ a vininzan a bélé golizra zo yé a bɛanu a bélé gola bɛanu zo. Maa a naginina fɔɔ yé wa bɛanu so. Wa nwa tɛrɛ va yé wa dɔ é ganenu ta bélé blami zo, yé wo mi bli vɔ a gi.

⁵ Yé a wi fiézan a bélé wi lé wa laama urisi, a zo, ’té é a é dɔle a bɛ do la; wi sɛewɔlɛ yaa a a ’léé, ’té a suiɛnu a é dɔrale wo ta, yé wo lé a lɛ léé: ’I nwa. ’I wi nɛ ble kiɛre.

⁶ ’Bɛ zuo maa a naginina, yé an wi yaazan ye; é a bélé kua zo, yé a bɛa ziɛn a é dɔle a lala bélé miané zé zo. Wi ’ko ’wuo a ziɛn, yé wo plale mi nwiin se kɛlɛ a lɛ.

⁷ ’Bɛ zuo yé yuɛziwenu lé maa wo ye é béli, maa a wo naginina, yé wi ziɛnzan lé maa a ye, éé di kinié mi gi, éé mi ta daan é ma, yé a plɛplɛ gié é glɛ ta; a suiɛnu a blɛnblɛn; wa foliɛwɔlɛ nya. Éé fɛ blé, ’té éé fɛ ’wiié, ’té a pɔné lé ’bɛ voo, é a zɔn‐o é gane nya; a dɔbɛ a é sile wi vininzannu ma. A béli a vu.

⁸ An vo a bélinu naginina, yé a béli kiéné do bɔra é ziin a bélinu méléna, yé wa béli yaa so a béli kiéné ’ko ’lɛ; yé a yuɛ a bélé blami yuɛ zo, yé a ’léé a we blɛnblɛn fe ’léé nya.

⁹ Maa a naginina bléyian va, ’té woo webleblinnu dɔraan. Yé mi kwa lé ke yinu ’lɛ, é nyana. Alé sɔ a fu tata bélé tɔrɛ zo. A nwiin nwinnu a bélé ’blakyɛɛ zima zo. Alé webleblin a bélé kyɛnɛnɛnu zo, yé alé webleblin ganenu a bélé kyɛnyɛ zo.

¹⁰ Kyɛ éé bɔraan a ’lɛ, ’té éé yoroan bélé yuu zo. Mi wuru é wuru a bɔa, yé mi baa é wuru é wuru a é dɔle a ’lɛ. Weblezannu nyana, yé wo sɛbɛnu fuo.

¹¹ ’Té maa a naginina, dére blɛnblɛnnu lé wo ke bɔrana wi béliné ’ko ’léé, a we ma. Maa a naginina tɔɔn, wo wi ’ko gyɛ yé wa gale sɛrɛ; wa vɔ kyɛ va a kyɛblele we ma.

¹² Wo wi koɛnu lé plɛplɛ si ’wo lee, naa, wo wo vo é yuɛma bléyi ke nya.

¹³ Yuɛziwenu lé maa wo ye é béli, maa a wo naginina aan wo, ’té mi do lé é ke bélé blami be do zo, ’té é dan latinu nya, yé é bié mi kwa lé ke yinu ’lɛ, a vazia, yé wa bié a sɔnɔ.

¹⁴ Kɛlɛle minwiinzan nya koo, fuablele koo, plale mi nwiin koo, wa se kɛlɛ a lɛ, yé migɔnɔ faa koo, bɛnnu koo, dére faa do do vɔmunu koo, wa bɔ. Alé plale mi nwiin a plale mi nwiin lé a glɛ ’ka lo, ’té é ’ka giéan lo, a nya, yé a plale mi nwiin ’ka nyaan monomono lo.

Wo yuɛziwenu gi fe

¹⁵ Gibɔrɔ pa maa Daniɛl ma, yé yuɛziwenu lé maa wo ye, wo di kini an gi.

¹⁶ Munu lé wo ke ana bɛ, an bié wo vazan do sɔnɔ, yé we lé é ke we ’konu faa va we zin nya, maa a gi laa a lee. É a gi fe an lɛ léé:

¹⁷ Wi blɛn ziɛn ’ko, wa minwiinzan blɛn ziɛn lé wo dan bɔra lɛ tɛrɛ la, wo nya.

¹⁸ Naa, lagi Loruzan lé munu é dan pla lɛ munu nwiin, yé plale munu nwiin é dan vo lɛ wozé nya lɛɛfaama, a glɛ ’ka lo, ’té ’bɛ glɛ ’ka dɔa monomono lo.

¹⁹ ’Bɛ zuo, é sɔ an lɛ léé, an wi ziɛnzan ’ko lé we gi ’ma pɛnpɛn, ’té a dɔbɛ ke é sile é bɔlunu faa ma, ’té éé di kinié mi gi, ’té a suiɛnu a foliɛwɔlɛ nya, ’té a sɔnéwɔlɛnu a zéné nya bɛ, ’té éé fɛ blé, ’té éé fɛ ’wiié, ’té a pɔné lé ’bɛ vo, éé ’bɛ zɔn‐o é gane nya bɛ,

²⁰ yé a béli vu lé wo ke a nwiin bɛ, ’té a béli koɛzan bɔra yé wa béli yaa so a ’lɛ, ’té a yuɛnu ke, ’té a ’léé ke we blɛnblɛn fe ’léé nya bɛ, yé ’té a blɛn mini é bɔlunu ta bɛ, é sɔ an lɛ léé, maa we ’konu gi ’ma.

²¹ Maa a béli ’ko ye gulidanna Bale lé munu va, yé é wo kele,

²² fɔɔ yé mi kwa lé ke yinu ’lɛ, é da yé é weblele se kɛlɛ Loruzan lé munu lɛ yé a bléyi bɔ yé é a se kɛlɛ wo lɛ léé, wo pla munu nwiin.

²³ Lanje lé an lɛ léé: Wi ziɛnzan ’ko, é a bɛngɔnɔ ziɛnzan lé é dan bɔra lɛ tɛrɛ la, a nya, ’té a dɔbɛ a é sile bɛngɔnɔnu faa ma, yé tɛrɛ faa é dan vo lɛ a lɛ, yé é dan ana munu zɔn lɛ é gane nya yé é dan wo ’wii lɛ.

²⁴ A béli vu ’ko a minwiinzan blɛn vu lé wo dan nwa lɛ bɛngɔnɔ ’ko gi, wo nya. A do é dan nwa lɛ ’bɛnu zuo; a dɔbɛ é dan si lɛ a vininzannu zé ma, yé é dan minwiinzan blɛn yaa zun lɛ.

²⁵ É dan dére naanénu fe lɛ Loruzan ma; é dan kele pa lɛ Loruzan lé munu ta, yé é a a gi léé, é dan bléyinu valé bélidɔwenu nɔla lɛ, yé wo dan Loruzan lé munu pa lɛ a lee lɛɛ yaa é buu.

²⁶ ’Bɛ zuo we ble bléyi é dan bɔ lɛ, yé wo dan alé plale mi nwiin si lɛ a lee, yé wa sɛrɛ tata, yé wa yi ga lɛɛfaama.

²⁷ Plale mi nwiin koo, munu plale a wuo koo, tɛrɛ la bɛngɔnɔnu faa lé fua koo, wo dan wo nɔ lɛ Loruzan lé munu lɛ. ’Bɛnu lé plale mi nwiin a plale mi nwiin lé é vo ana lɛɛfaama, a glɛ ’ka lo, a nya, yé minwiinzannu faa é dan a bɔ lɛ yé wo dan a lɛdɔ lɛ a ma.

²⁸ Dérenu ’wuo dɔ ’ko. Maa Daniɛl, an ’wuogibɔrɔlenu gibɔrɔ blɛn pa an ma. An kɔlɛ fuola yé an dére ’konu tadɔ an bli gi.