Daniɛl 6 - Kazambale lé Sebe Sauunu 1979

Wo Daniɛl vɔ golizranu yɛrɛ gi

¹ É sɔ Darius lɛ léé, ’é minisinu yɔ suiɛdo dɔ, ’té wa élé tɛrɛ faa nwiinzannu nya.

² Yé é mi yaa pla ’bɛnu nwiin. Mi yaa ’ko, Daniɛl a wo vazan do nya. É a lé minisi pɔnénu lé wo vo bɛ, wozé we zuo fe mi yaa ’konu lɛ, té we tɔntɔn ’é bɔ minwiinzan blɛn ma lo.

³ Lélibozen ɛ ke Daniɛl gi, amalé a tɔ mini minwiinzannu valé minisinu zé ta. Yé é dɔ minwiinzan blɛn gi léé, ’é Daniɛl plaan tɛrɛ faa nwiin.

⁴ Yé minwiinzannu valé minisinu a zi ginina léé, ’wo we dɔ Daniɛl nwiin, plale mi nwiin lé we ma. Naa, wo ’ka a kunmawe do kpen ye lɛ lo; wo ’ka gun do kpen ye lɛ a ma lo, naa, Daniɛl a yarapawelazan nya, azama. Dé é a saanwe nyaoo, dé é a wenaané nyaoo, wo ’ka a do kpen ye lɛ a ma lo.

⁵ Yé munu ’konu léé: Ko ’ka dan Daniɛl kunmawe do kpen ye lɛ lo, ’té dé é ’ka alé Bale lé bélidɔwe va we do nya lo.

⁶ Yé minwiinzannu ’ko valé minisinu ’ko go minwiinzan blɛn va é kele yé wo lé a lɛ léma: Minwiinzan blɛn Darius, ’i vo é yuɛma lɛɛfaama, té a glɛ é dɔ lo.

⁷ Minwiinzannu faa koo, minwiinzan blɛn bɛgizannu koo, minisinu koo, weplamilɛzannu koo, gbɔrɔnamanu koo, wo faa dére kɛlɛ do léé, ’wo minwiinzan blɛn lé bélidɔwe zana dɔɔ léé, yi yɔ do wɔlɛ vu wuo, dé miomian é bazoro, dé bale bɛ léé, dé mi bɛ léé, ’té dé é ’ka bii minwiinzan blɛn do kpen nya lo, a lɛ, ’wo ’bɛzan vuli golizranu guru gi ma. ’É kɛlɛ glawe nya ma.

⁸ Sin, minwiinzan blɛn, ’i glawe ’ko dɔ gligli; ’i bélidɔwe ’ko gyɛ léé, té wa yi ga lo, Mɛdenu valé Pɛɛsnu lé bélidɔwe lé é ’ka nɔlaan lo, a yɛrama.

⁹ Amalé minwiinzan blɛn Darius bélidɔwe ’ko valé glawe ’ko gyɛ.

¹⁰ Daniɛl a ’ma aan wo léé, wo bélidɔwe ’ko gyɛ, é go élé kɔn gi kɔn ta loru kɔnmi lé alé fɛnɛtinu lɛ ke é sole Jérusalɛm vazia, a gi; yé yi do gɔnɔ yaa éé zunwo é powuo la, ’té éé bazoroan, ’té élé Bale tɔ zin fé bélé fɛan zo lé éé a kɛla é kyɛn, a zo.

¹¹ Yé munu ’konu wɔra é kele, yé wo bɔ Daniɛl ma bazorona, ’té élé Bale tɔ laan.

¹² Yé wo go minwiinzan blɛn ’lɛ, yé wo we fe a lɛ minwiinzan blɛn lé glawe lé we ma léé: Minwiinzan blɛn, glawe lé wa fe léé, yi yɔ do wɔlɛ vu wuo, dé miomian é bazoro dé bale bɛ léé, dé mi bɛ léé, ’té dé é ’ka bii do kpen nya lo, a lɛ, ’wo ’bɛzan vuli golizranu guru gi bɛ, i ’ka a gyɛ lɛ loo? Minwiinzan blɛn a zi pa léé: É a a zo weboen nya, Mɛdenu valé Pɛɛsnu lé bélidɔwe lé é ’ka nɔlaan lo, a yɛrama.

¹³ Wo lé minwiinzan blɛn lɛ é ziin léé: Minwiinzan blɛn, Daniɛl lé é ke Juda munu lé wo ke luunu nya, wo vazan do nya bɛ, é ’ka i ye lɛ mi nya lo. Glawe lé bé gyɛ, é ’ka a yuɛ gi bɔ lɛ lo, yé éé bazoroan yi do gɔnɔ yaa.

¹⁴ Minwiinzan blɛn we ’ko ’ma aan wo, a bli kyɛ dɔ é baba, yé é bli ta dɔ plɛplɛ léé, ’é Daniɛl sié wo lee, yé é vo kwa kulina léé, ’é Daniɛl si we gi fɔɔ yé yiri vɔ a zo.

¹⁵ Naa, munu ’konu minwiinzan blɛn ma kyɛ dɔ yé wo lé a lɛ léé: Minwiinzan blɛn, ’i we ’ko ’ma ma. Pɛɛsnu valé Mɛdenu lé bélidɔwe yɛrama, glawe faa valé bélidɔwe faa lé minwiinzan blɛn a dɔ gligli, wo ’ka bɔa a nɔlale lɛ lo.

¹⁶ Minwiinzan blɛn léé, ’wo da Daniɛl nya yé ’wa vuli golizranu guru gi. Minwiinzan blɛn lé Daniɛl lɛ léé: Ilé Bale lé bé bɔa yarapalale nya, ’é i si we gi ma.

¹⁷ Wo da gɔlɛ do nya yé wo guru lɛ tan a nya. Minwiinzan blɛn zɔrɔkaanyɔɔ vɔ a ’léé, yé é bɛmafɛ dɔra a ta tɔmase nya, yee valé alé mi blɛnnu bɛmafɛ nya léé, té wo we do nɔla Daniɛl lé we ma lo.

¹⁸ ’Bɛ zuo minwiinzan blɛn go élé fuakɔn gi. É tu kini lɔrɔsɔnle nya, yé é ’ka é bwɛ do kpen laa lɛ é va lo, yé é ’ka ébo nɔ lɛ yigyɛle lɛ lo.

¹⁹ Minwiinzan blɛn nwa bladi tutu, tukinigunu nya, yé é go vlan nya golizranu guru ’léé.

²⁰ É bɔ aan wo guru sɔnɔ, é Daniɛl laa dunuvɔmadére nya. Minwiinzan blɛn lé Daniɛl lɛ léé: Daniɛl, Bale yuɛmale wuozan! Ilé Bale lé bé bɔa yarapalale nya bɛ, é bɔ i sile lɛ golizranu lee?

²¹ Yé Daniɛl lé minwiinzan blɛn lɛ léé: Minwiinzan blɛn, ’i vo é yuɛma lɛɛfaama, té a glɛ é dɔ lo.

²² Anlé Bale élé lanje pa zia yé é golizranu lɔlu lɛ tan, yé wo ’ka we tɔntɔn do kpen kɛlɛ lɛ an lɛ lo. Bale an ye nwiinplazan nya, azama. Yé bii é ziin, minwiinzan blɛn, an ’ka wenaané do kpen kɛlɛ lɛ i ma lo.

²³ Yé minwiinzan blɛn gi nana é baba, yé é léé, ’wo Daniɛl bɔra guru gi. Wo Daniɛl bɔra guru gi, yé wo ’ka tuona do kpen ye lɛ a kɔlɛ ma lo; a pale a élé Bale ta, azama.

²⁴ Minwiinzan blɛn léé, munu lé wo we dɔ Daniɛl nwiin, ’wo da wo nya yé ’wo wo vuli golizra guru gi; wo koo, wolé nénu koo, wo nanu koo, woo lé. Dé wo ’ka tan dia lɛ guru wɔlɛ ma lo, golizranu wo kun, yé ’bɛnu wo wɔlɛnu faa ’wii.

²⁵ ’Bɛ zuo, minwiinzan blɛn Darius sɛbɛ gyɛ bɛngɔnɔ faa koo, bɛnnu faa koo, dére faa do do vɔmunu koo, ’té woo nyanaan tɛrɛ faa la, wo lɛ léé: Ka vole drɔɔ gi ’é gyɛ é baba ma.

²⁶ Maa munu béli dɔ anlé tɛrɛ faa la léé, munu ’é kana Daniɛl lé Bale lee, yé di blɛn ’é kini wo gi alé we ma. Naa, yee ɛ ke Bale yuɛmale nya, yé éé voo ana lɛɛfaama, a glɛ ’ka lo. Alé plale mi nwiin ’ka sɛra lo, yé é dan vo lɛ mi nwiin fɔɔ yé é bɔ a ’wuo plana.

²⁷ Yee ɛ mi soo we lee, yé éé mi sié we gi. Yee ɛ tɔmasenu valé we blɛnnu kɛla la gi valé tɛrɛ la. Yee ɛ Daniɛl so golizranu lé plɛplɛ lee.

²⁸ Darius valé Pɛɛs mi Sirus plale mi nwiin bléyinu va, Daniɛl bɛ ma kɛlɛ néné.