Daniɛl 5 - Kazambale lé Sebe Sauunu 1979

Bɛlsasaa lé fɛti blɛn lé we

¹ Minwiinzan blɛn Bɛlsasaa fɛti blɛn kɛlɛ alé mi blɛnnu lé wo ’léé bɔa mi wuru soru, wozé nya. Yé é dɔrɔ mini wo yuɛ va.

² Dé Bɛlsasaa dɔrɔ mini, é léé, ’wo da kyan kananu valé gɔɔlifu kananu lé a ti Nébukanɛsaa a si Bale lé kɔn gi Jérusalɛm, wo nya léé, ’yee minwiinzan blɛn koo, élé mi blɛnnu koo, a nanu koo, a bwɛnu koo, ’wo wo si yé ’wo fɛ mini wo gi.

³ Yé kyan kananu lé wo wo si Kazambale bangikɔn gi Jérusalɛm, wo da wo nya, yé minwiinzan blɛn koo, élé mi blɛnnu koo, a nanu koo, a bwɛnu koo, wo wo si yé wo fɛ mini wo gi.

⁴ Wo dɔrɔ mini, yé balenu lé wo ke kyan koo, gɔɔlifu koo, zéné koo, foliɛwɔlɛ koo, yili koo, gɔlɛ koo, wo nya, wo vo wo tɔ zin fena.

⁵ A bléyi duo va, mi bɛlaa do bɔra yé é sɛbɛ gyɛ fintran nwiin loru, fuakɔn guru ma. Minwiinzan blɛn mi bɛlaa ’ko ye, ’té éé sɛbɛ gya.

⁶ Minwiinzan blɛn kɔlɛ fuola yé é gibɔrɔ pa a ma. A sowɔlɛ so é ke ’léé, yé a powuonu vo tɔɔtɔɔ.

⁷ Minwiinzan blɛn sia plɛplɛ léé, monénénu va ’monédɔzannu koo, Kaldé munu koo, ’monédɔzannu koo, ’wo wo laa ’wo da. Minwiinzan blɛn we fe Babilɔn wedɔɔmunu lɛ yé é léé: Dé miomian sɛbɛ ’ko ta fe yé é a gi fe an lɛ, wo dan galunaa tɔvarɔ zén lɛ a ta yé wo kyan vɔ a bɔrɔ ma, yé wo dan nyanana yaazan nɔ lɛ a lɛ plale mi nwiin gi.

⁸ Minwiinzan blɛn lé wedɔɔzannu faa wɔra, naa, wo ’ka bɔa sɛbɛ ’ko tafele lɛ yé wa gi fe minwiinzan blɛn lɛ lo.

⁹ Amalé di kini minwiinzan blɛn gi, yé a kɔlɛ fuola yé alé mi blɛnnu vo é dɔle ’wo gane ta.

¹⁰ Minwiinzan blɛn valé élé mi blɛnnu dérenu lé we ma mi nwiin le wɔra fɛtikɛlɛkɔn gi yé é léma: Minwiinzan blɛn, ’i vo é yuɛma lɛɛfaama, té a glɛ é dɔ lo ma. Té i ’wuogibɔrɔlenu ’ko é gibɔrɔ pa i ma lo, yé té i yara dɔbɛ é nɔla lo ma.

¹¹ Mi do ana ilé tɛrɛ la ’ko, ’té bale sauunnu léli a a gi. I ti bléyi va, wa ye léé, a va a é kinile, yé a gi kini, yé wedɔɔle lé ke bélé balenu lé wedɔɔle zo, é a a gi. Yé i ti minwiinzan blɛn Nébukanɛsaa, i ti boen, é a dɔ yokɛlɛzannu koo, monénénu va ’monédɔzannu koo, Kaldé munu koo, ’monédɔzannu koo, wo nwiinzan nya.

¹² Daniɛl lé, minwiinzan blɛn a tɔ pa Bɛlsatasaa, wa ye léé, wedɔɔle valé gikinile koo, nyɛ gi fele lé wedɔɔle koo, tɔraléé gyɛle koo, we tɔntɔnnu gi bɔile koo, wo léli bozen a a gi. É a lé wo Daniɛl laa, yé é dan a gi fe lɛ.

Sɛbɛ lé wa gyɛ, Daniɛl a gi fe

¹³ Wo da Daniɛl nya minwiinzan blɛn ’lɛ. Minwiinzan blɛn we fe Daniɛl lɛ yé é léé: Juda munu lé an ti, minwiinzan blɛn wo si luu nya yé é da wo nya ’ko, wovazan do lé wa laama Daniɛl bɛ, bii ɛ ke a nyaa?

¹⁴ Maa a ’ma i ma léé, balenu léli a i gi, yé i va a é kinile, yé i gi kini, yé wedɔɔle lé a glɛ ’ka lo, é a i gi.

¹⁵ Wedɔɔzannu koo, monénénu va ’monédɔzannu koo, wo da wo nya an ’lɛ lao, léé, sɛbɛ lé wa gyɛ, wa ta fe yé wa gi fe an lɛ, naa, wo ’ka bɔ lɛ a va dére do kpen gi fele lɛ an lɛ lo.

¹⁶ Maa a ’ma léé, i bɔalɛ léé, i wenu gi fe, yé i we tɔntɔnnu gi bɔié. Sin, dé i bɔa sɛbɛ ’ko tafele lɛ yé bé gi fe an lɛ, wo dan galunaa tɔvarɔ zén lɛ i ta; wo dan kyan vɔ lɛ i bɔrɔ ma; yé wo dan nyanana yaazan nɔ lɛ i lɛ plale mi nwiin gi.

¹⁷ Daniɛl a zi pa minwiinzan blɛn lɛ léé: ’Ilé fɛ zinnu tadɔ, yé ’i blɛ kɛlɛ mi bɛnu lɛ. Naa, duowo, maa dan sɛbɛ ’ko ta fe lɛ minwiinzan blɛn lɛ, yé maa dan a gi fe lɛ a lɛ.

¹⁸ Minwiinzan blɛn, balenu faa nwiin Bale, plale mi nwiin koo, kɛlɛle blɛn koo, tɔbɔle koo, fua zevɔle koo, é wo nɔ i ti Nébukanɛsaa lɛ. Kɛlɛle blɛn lé é a nɔ a lɛ bɛ,

¹⁹ alé we ma lé bɛngɔnɔnu faa koo, bɛnnu koo, dére faa vɔmunu koo, woo kanaan a lee, ’té wo ma éé nyɔɔn‐an a ’lɛ. Dé é sɔ minwiinzan blɛn lɛ léé, é munuan wo gyɛ, éé wo gya; dé é sɔ a lɛ léé, é munuan vo é yuɛma, éé wo voo. Dé é sɔ a lɛ léé, é munuan wo tɔ nwa, éé a nwaan; dé é sɔ a lɛ léé, é munuan wo zun, éé wo zunwo.

²⁰ Naa, bléyian va lé é bo kɛlɛ blɛn yé a yuɛ ma kɛlɛ plɛplɛ fɔɔ yé é blii boblɛn nya, wa zun gla nya élé webleblin ta, yé wo alé fua si a lee.

²¹ Wa bin blaminu méléna. A bli kɛlɛ bélé winu bli zo, yé é nyana bwi gi sokofalenu va. Wo lu nɔ a lɛ bélé diri zo yé é a ble, yé lagi lolu a kɛlɛ drɔɔdrɔɔ, fɔɔ yé é a gi dɔɔ léé, plale mi nwiin faa a é plale balenu faa nwiinzan Bale wuo, yé dé miomian sɔ a lɛ, éé ’bɛzan plaan munu nwiin.

²² Yé bii, a be Bɛlsasaa, i ’ka ibo kɛlɛ lɛ kiéné we ’ko gi lo, dɔlé ’té i we ’konu faa dɔɔ.

²³ I nwa lanu Nwiinzan ma. Wo da alé kɔn gi kananu nya i lɛ, yé ka wo si dɔrɔminikananu nya, yé bii koo, ilé mi blɛnnu koo, i nanu valé i bwɛnu koo, ka dɔrɔ mini wo gi; balenu lé wo wo kɛlɛ gɔɔlifu koo, kyan koo, foliɛwɔlɛ koo, yili koo, gɔlɛ koo, wo nya, ’té wo ’ka yɛrɛ yé lo, yé wo ’ka we maan lo, yé ’té wo ’ka we do dɔɔa lo bɛ, wo lé i vo wo tɔ zin fena, yé Bale lé ilé flinle valé ilé tawobɛ faa ke a lee, i ’ka ’bɛ tɔ nwa lɛ lo.

²⁴ Amalé é mi bɛlaa ’ko pa zia yé é sɛbɛ ’ko gyɛ.

²⁵ Yee sɛbɛ lé é a gyɛ, yee lé ke ’ko: Méné, méné, tékɛl, yufaasin. (’Bɛ gi léé, wa nɔnɔ, wa nɔnɔ, wa dan kilo la, wa gi bɔi.)

²⁶ Dérenu lé é a gyɛ, a gi lé ke ’ko: Méné, ’bɛ gi léé, Bale i plale mi nwiin nɔnɔ, yé é a glɛ dɔ.

²⁷ Tékɛl, ’bɛ gi léé, wo i dan kilo la, yé wa ye léé, i bɛn ’ka lo.

²⁸ Yufaasin, ’bɛ gi léé, wo dan ilé fuatɛrɛ gi bɔi lɛ, yé wa lɛ do nɔ Mɛdenu lɛ, yé wa lɛ do nɔ Pɛɛsnu lɛ.

²⁹ Kele tɔɔn, Bɛlsasaa léé, ’wo galunaa tɔvarɔ zén Daniɛl ta, yé ’wo kyan vɔ a bɔrɔ ma, yé wa zana dɔɔ léé, wo nyanana yaazan nɔ a lɛ plale mi nwiin gi.

³⁰ ’Bɛ yi duo nya é béli, wo Kaldé munu nwiinzan blɛn Bɛlsasaa gyɛ.

³¹ Yé Mɛde mi Darius plale mi nwiin si gla nya; ’té ’bɛ lɛɛ a yɔ yaa wɔlɛ fié.