Daniɛl 4 - Kazambale lé Sebe Sauunu 1979

Nébukanɛsaa nyɛ fiézan gyɛ

¹ Minwiinzan blɛn Nébukanɛsaa lé bɛngɔnɔ faa koo, bɛnnu koo, dére faa do do vɔzannu lé woo nyanaan tɛrɛ faa la koo, wo lɛ léé: Ka drɔɔ ’é vo kiɛre ma.

² Tɔmasenu valé we blɛnnu lé balenu faa Nwiinzan a kɛlɛ an lɛ, é sɔ an lɛ léé, maa wo zuo fe mi bɛnu lɛ.

³ Alé tɔmase ’konu a blɛɛn! Yé alé we blɛɛnnu ’ko a plɛplɛ! Munu éé plaan a wuo lɛɛfaama, a glɛ ’ka dɔa lo, yé alé plale mi nwiin éé voo ana mi kulu é kulu zé nya.

⁴ Maa, Nébukanɛsaa, an vo anlé kɔn gi drɔɔ, yé an gi nana anlé fuakɔn gi.

⁵ An nyɛ do gyɛ yé é kana blɛn zén an gi. ’Wuogibɔrɔlenu lé wo da an ’wuo gi, ’té maa a é yiale koo, yuɛzi wenu lé maa wo ye koo, wo an zuru va nyɛ kini blɛn.

⁶ Maa léé, é a lé wo Babilɔn wedɔɔmunu faa laa, ’wo da an ’lɛ ’ko, yé nyɛ lé maa a gyɛ, ’wa gi fe an lɛ.

⁷ Yé yokɛlɛzannu koo, monénénu va ’monédɔzannu koo, Kaldé munu koo, ’monédɔzannu koo, wo da. Maa nyɛo fe wo lɛ, yé wo ’ka a gi fe lɛ an lɛ lo.

⁸ É voéla, Daniɛl lé maa a tɔ pa Bɛlsatasaa, anlé bale zié nya, ’té bale sauunnu léli a a gi bɛ, é da an ’lɛ, yé maa nyɛ fe a lɛ.

⁹ Bɛlsatasaa, gyɛzorowekɛlɛzannu nwiinzan, maa a gi dɔɔ léé, i gi lé bale sauunnu léli ke; biian we yɔɔle do kpen gi fele ’ka i lee tɔntɔn lo, yuɛziwenu lé maa a ye nyɛ fla, ’bé gi fe an lɛ ma.

¹⁰ Yuɛziwenu lé maa a ye, ’té maa a é yiale, wo lé ke ’ko. Maa a nagini, ’té yili torole blɛn do a é dɔle tɛrɛ méléna.

¹¹ Yili ’ko kɛlɛ blɛn yé é kɛlɛ plɛplɛ; a torole go fɔɔ yé é bɔ la ma, yé dé mi a tɛrɛ faa glɛ sinaoo, éé a nwiin yé.

¹² A kwɛɛnu a é nɔnɔmi yé a poronu a di. Munu faa lé fɛblele éé yé a va. Bwigiwinu éé yiaan a furɔ va, yé lagi mianénu ’wo kɔn dɔa a bɛnu ta, yé fɛ yuɛmalénu faa wolé fɛblele yé a va.

¹³ Yuɛziwenu lé maa a ye, ’té maa a é yiale, maa a naginina, ’té fɛ yuɛmalenu lé woo fɛnu tabin‐é ’té wa sauun, wo vazan do si la gi yé é zun.

¹⁴ É sia plɛplɛ, yé é léé: ’Ka yili ’ko dia yé ’ka a bɛnu bɔi; ’ka a kwɛɛnu nyɔɔn, yé ’ka a poronu nwɛɛn; winu ’é fwi a wuo ma, yé a bɛnu ta mianénu ’é fwi.

¹⁵ Naa, a pun lé a suninu ke a ma, ’é vo é dɔle ana, yé ’ka gɔgɔbalenu valé zénébalenu vɔ a ma bwi gi lu méléna. Lolu ’é vɔ a ta ma, yé alé fɛblele ’é kɛlɛ lunu nya bélé winu zé zo.

¹⁶ ’Wo alé mi bli si a gi, yé ’wo wi bli vɔ a gi, yé lɛɛ sɔrafié ’é gié a ta ma.

¹⁷ Fɛyuɛmalenu lé woo fɛnu tabin‐é, wo we ’ko ’wuo dɔ; mi sauunnu munu béli dɔ we ’ko nya, léé, munu faa a gi dɔɔ léé, plale mi nwiin faa a é plale Loruzan wuo; dé miomian sɔ a lɛ, éé ’bɛzan plaan munu nwiin, yé éé munu faa va mi kiéné kɛla minwiinzan nya.

¹⁸ Maa, minwiinzan blɛn Nébukanɛsaa, we lé maa a ye nyɛ fla, yee lé ke bɛ. Bii Bɛlsatasaa, ’bé gi fe an lɛ. Naa, anlé tɛrɛla wedɔɔmunu faa ’ka bɔa a gi fele lɛ lo; bii, i bɔalɛ; bale sauunnu léli a i gi, azama.

¹⁹ Yé Daniɛl lé wa laama Bɛlsatasaa, kwakwa vɔ a ta bléyi sɛ nya yé gi bɔrɔ pa a ma. Yé minwiinzan blɛn we fe é ziin yé é léé: Bɛlsatasaa, té nyɛ ’ko valé é gifele é gi bɔrɔ pa i ma lo. Yé Bɛlsatasaa a zi pa a lɛ léé: Anzan, nyɛ ’ko ’é kɛlɛ i nyanézannu zé nya, yé a gi fele ’é kɛlɛ i mazannu zé nya ma.

²⁰ Yili lé bé ye, yé é kɛlɛ blɛn yé é kɛlɛ plɛplɛ yé a torole go fɔɔ yé é bɔ la ma, yé dé mi a fɛofɛana tɛrɛ la, ’té éé a nwiin yé,

²¹ yili ko lé a kwɛɛnu ke é nɔnɔmi, ’té a poro ke di, ’té munu faa lé fɛblele éé yé a va, ’té bwigiwinu éé yiaan a furɔ va yé lagi mianénu ’wo kɔn dɔa a bɛnu ta bɛ,

²² minwiinzan blɛn, bii lé. Bii ɛ kɛlɛ blɛn yé bii ɛ kɛlɛ plɛplɛ. I kɛlɛle blɛn gi gyɛ yé é nwa fɔɔ yé é bɔ la ma, yé i plale mi nwiin bɔ fɔɔ tɛrɛ glɛ sina.

²³ Fɛ yuɛmalenu lé woo fɛnu tabin‐é, ’té wo ke sauun, minwiinzan blɛn wovazan do ye la gi yé é zun. Yé é léé: ’Ka yili ’ko dia yé ’ka a sɛrɛ; naa, a pun lé a suni ke a ma, ’é vo é dɔle ana; ’ka gɔgɔbalenu valé zénébalenu vɔ a ma bwi gi lunu méléna. Lolu ’é vɔ a ta ma, yé alé fɛblele ’é kɛlɛ lunu nya bélé winu zo, fɔɔ yé bléyi sɔrafié é gié a ta.

²⁴ Minwiinzan blɛn, nyɛ ’ko gi lé ke bɛ. Loruzan lé bélidɔwe lé ke bɛ. A lɛ é dan sɔɔ lɛ anzan minwiinzan blɛn zé nya.

²⁵ Wo dan i bin lɛ munu méléna, yé i dan nyana lɛ bwigiwinu va. Wo dan lunu nɔ lɛ i lɛ bélé diri zo, yé bé ble. Lolu é dan i kɛlɛ lɛ drɔɔdrɔɔ, yé lɛɛ sɔrafié é dan gié lɛ i ta fɔɔ yé bé gi dɔɔ léé, plale mi nwiin faa a é plale Loruzan wuo, yé dé miomian sɔ a lɛ, éé ’bɛzan plaan munu nwiin.

²⁶ Wa fe aan wo léé, a pun lé a suni ke a ma, ’bɛ é vo, ’bɛ gi léé, ilé plale mi nwiin é dan vo lɛ, ’té dé bé gi dɔɔ léé, mi lé é dan pla lɛ mi nwiin é a la gi.

²⁷ Bɛwemalé, minwiinzan blɛn, anlé we plale i lɛ ’é sɔ i lɛ ma. ’I daan ilé wenyané kɛlɛle ma; ’i we tegele kɛlɛ. ’Ilé weplenu vo yé i nyanai ’é zén nyanaizénlazannu ta; dé bé kɛlɛ a zo, i dan vo lɛ zin yena.

²⁸ We ’konu faa bɔ minwiinzan blɛn Nébukanɛsaa ma.

²⁹ A moné vu ta fiézan giéle zuo, é ke aan wo dɔwona élé fuakɔn gi Babilɔn tɛrɛ la,

³⁰ minwiinzan blɛn we fe yé é léé: Babilɔn blɛn lé maa a pa yé maa anlé fuakɔn dɔ ana anlé gla valé anlé plɛplɛ nya, anlé fua zevɔle we ma, yeean ke ’ko loo?

³¹ É a tan wefena tɔɔn, dére do si la gi yé é a ’ma. É léé: Minwiinzan blɛn Nébukanɛsaa, ’i we ’ko ’ma ma, wo dan ilé plale mi nwiin si lɛ i lee.

³² Wo dan i bin lɛ munu méléna, yé i dan nyana lɛ bwigiwinu va. Wo dan lunu nɔ lɛ i lɛ bélé diri zo yé bé ble, yé lɛɛ sɔrafié é dan gié lɛ i ta fɔɔ yé bé gi dɔɔ léé, plale mi nwiin faa a é plale Loruzan wuo, yé dé miomian sɔ a lɛ, éé ’bɛzan plaan munu nwiin.

³³ Kele tɔɔn, we lé wa fe, é bɔ Nébukanɛsaa ma. Wa bin munu méléna, é lunu ble bélé diri zo, yé lolu a kɛlɛ drɔɔdrɔɔ fɔɔ yé a nwin tuu bélé gola kyɛɛ zo yé a sɔnéwɔlɛnu toro bélé mianénu sɔnéwɔlɛ zo.

Nébukanɛsaa Bale tɔ zin fe

³⁴ Bléyi lé wa dɔ, a bɔle zuo, maa Nébukanɛsaa an yara nwa lagizia, yé an ’wuo dɔ an ta é ziin. Yé an Loruzan drɔɔ vo; mi lé é ke é yuɛma lɛɛfaama a glɛ ’ka lo, mi lé a plale mi nwiin glɛ ’ka lo, yé mi kulu é kulu faa éé plaan a wuo, maa a tɔ zin fe yé maa a tɔ nwa.

³⁵ Tɛrɛlamunu faa ’ka a yuɛ gi bɔa lo. We lé é sɔ a lɛ léé, éé a kɛla lai sunyanu valé tɛrɛlamunu lɛ, yé mian ’bɛ éé dɔa a lee plɛplɛ yé ’bɛ lé a lɛ léé: Mɛ fɛ lé bé kɛla bɛɛ? ’bɛzan do ’ka ana lo.

³⁶ ’Bɛ bléyi va an ’wuo dɔ an ta é ziin; wo an plale mi nwiin tɔbɔle valé anlé fua valé an tɔ blɛn nɔ an lɛ é ziin; we pla anlɛzannu valé anlé mi segelenu an ma laa é ziin; wo an dɔ minwiinzan nya an pa gi, ’té anlé plɛplɛ gi éé gya saawo.

³⁷ Yé sin, maa Nébukanɛsaa, an lanu Nwiinzan blɛn tɔ zin fé, maa a tɔ biéan, maa a tɔ nwaan. A panyanamanu faa a webozen nya, yé alé wekɛlɛbɛ faa a tegele. Yé munu lé woo tawoo boblɛn nya, éé wo zunwo.