Daniɛl 3 - Kazambale lé Sebe Sauunu 1979

Wo Daniɛl béénu yaa vɔ ’furu gi

¹ Minwiinzan blɛn Nébukanɛsaa miyili kɛlɛ kyan nya. A nwale loru a mɛtrɛ yɔ do wɔlɛ vu yé a laala a mɛtrɛ yaa. É a dɔ gɔworona lé wa laama Dura, ana, Babilɔn tɛrɛ la.

² Minwiinzan blɛn Nébukanɛsaa lé minisinu koo, a bɛgizannu koo, gbɔrɔnamanu koo, weblemunu nwiinzannu koo, gɔɔlitadɔzannu koo, weyuɛgibozannu koo, weblezannu koo, alé tɛrɛnu ta mi blɛnnu faa koo, é wo laa léé, ’wo zén ékeva miyili lé minwiinzan blɛn Nébukanɛsaa a dɔ, a pale é yɛrama we ma.

³ Yé minisinu koo, a bɛgizannu koo, gbɔrɔnamanu koo, weblemunu nwiinzannu koo, gɔɔlitadɔzannu koo, weyuɛgibozannu koo, weblezannu koo, alé tɛrɛnu ta mi blɛnnu faa koo, wo zén ékeva miyili lé minwiinzan blɛn Nébukanɛsaa a dɔ, a ’lɛ.

⁴ We zanadɔɔzan sia dére plɛplɛ nya léé: ’Kaa bɛngɔnɔnu koo, bɛnnu koo, dére faa vɔ munu koo, we lé wo ka béli dɔ a nya, yee lé ke ’ko:

⁵ Béli koo, gobé koo, gitaa koo, séén koo, kpélé koo, kɔnɔ koo, lɛrɛvɔafɛnu gɔnɔ faa koo, dé ka wo dére ’ma bléyian va, ’ka dia ka bli la, yé kyan miyili lé minwiinzan blɛn Nébukanɛsaa a dɔ, ’ka a bɔ.

⁶ Dé é a miomian nya, dé é ’ka dia lɛ é bli la yé é a bɔ lo, wo dan a vuli lɛ a bléyi duo nya ’furu lé kyɛ a tana, a gi.

⁷ Bɛwemalé, béli koo, gobé koo, gitaa koo, séén koo, kpélé koo, kɔnɔ koo, lɛrɛvɔafɛnu gɔnɔ faa koo, dé munu wo dére ’ma bléyian va, é a lé bɛngɔnɔ faa koo, bɛnnu koo, dére faa vɔ munu koo, é a lé wo faa dia ’wo bli la kyan miyili lé minwiinzan blɛn Nébukanɛsaa a dɔ, a ’lɛ, yé wa bɔ.

⁸ Bléyi ’ko duo gi, Kaldé mi kenu bié yé wo we dɔ Juifinu nwiin.

⁹ Wo we fe minwiinzan blɛn Nébukanɛsaa lɛ yé wo léé: Minwiinzan blɛn, ’i vo é yuɛma lɛɛfaama, té ’bɛ glɛ é dɔ lo.

¹⁰ I munu béli dɔ léé, béli koo, gobé koo, gitaa koo, séén koo, kpélé koo, kɔnɔ koo, lɛrɛvɔafɛnu gɔnɔ faa koo, dé wo wo dére ’ma bléyian va, é a lé wo dia ’wo bli la yé wo kyan miyili bɔ.

¹¹ Yé we ’ko yɛrama dé miomian ’ka dia lɛ é bli la yé é a bɔ lo, wo dan a vuli lɛ ’furu lé kyɛ a tana, a gi.

¹² Juifinu lé i Babilɔn tɛrɛ la we bɛ pa wo lee, Sadrak koo, Mésak koo, Abɛd‐Négo koo, woo lé, munu ’ko, wo ’ka i yé mi nya lo, wo ’ka ilé balenu bɔa lo, yé kyan miyili lé bé dɔ, wo ’ka a bɔa lo.

¹³ Tɔɔn, Nébukanɛsaa wɛwɛ dɔ yé a bli fli é baba. Yé é léé, ’wo da Sadrak koo, Mésak koo, Abɛd‐Négo koo, wo nya. Yé wo da munu ’konu nya minwiinzan blɛn ’lɛ.

¹⁴ Nébukanɛsaa we fe Sadrak koo, Mésak koo, Abɛd‐Négo koo, wo lɛ, yé é léma: É a ka gi webozen nya léé, ka ’ka ka ’wuo tuaan anlé balenu lɛ loo? Yé kyan miyili lé maa a dɔ, ka ’ka a bɔa loo?

¹⁵ Sin, ’ka ka ma’lɛrɛ, yé béli koo, gobé koo, gitaa koo, séén koo, kpélé koo, kɔnɔ koo, lɛrɛvɔafɛnu gɔnɔ faa koo, dé ka wo dére ’ma bléyian va, ’ka dia ka bli la kyan miyili lé maa a kɛlɛ, a ’lɛ, yé ka a bɔ. Dé ka ’ka a bɔ lɛ lo, wo dan ka vuli lɛ é nya do ’furu lé kyɛ a tana, a gi. Dé bale kyɛn ɛ dan ka si lɛ an lee?

¹⁶ Sadrak koo, Mésak koo, Abɛd‐Négo koo, wa zi pa minwiinzan blɛn Nébukanɛsaa lɛ léé: Kozé zi pa dére do kpen ’ka we ’ko gi lo.

¹⁷ Minwiinzan blɛn, bé ye, kozé Bale lé ko bɔa, é bɔa ko sile lɛ ’furu lé kyɛ a tana, a gi. Yé é dan ko si lɛ i lee.

¹⁸ Naa, dé ’bɛ kaan lo, é a lé bé gi dɔɔ léé, ko ’ka dan ilé balenu bɔ lɛ lo, yé kyan miyili lé bé dɔ, ko ’ka dan a bɔ lɛ duowo lo.

¹⁹ ’Bɛna tɔɔn, Nébukanɛsaa fan bliflile nya, yé a yara kɛlɛ é nyané Sadrak koo, Mésak koo, Abɛd‐Négo koo, wo ma. Yé é léé, ’wo kyɛ taa zén ’furu gi fɔɔ gɔnɔ sɔrafié.

²⁰ Alé sunyanu lé wo ke nyanazannu nya, é wo va mi kenu béli dɔ léé, Sadrak koo, Mésak koo, Abɛd‐Négo koo, wo wo yere yé wo wo vuli ’furu lé kyɛ a tana, a gi.

²¹ Munu ’ko, wo wo yere, ’té wo mɔnɔnu koo, varɔ blɛnnu koo, sɔ bɛnu koo, wa wo ta; yé wo wo vuli ’furu lé kyɛ a tana, a gi.

²² Minwiinzan blɛn lé bélidɔwe ke aan wo glawe nya yé ’furu a é tanale kaii, amalé munu lé wo Sadrak koo, Mésak koo, Abɛd‐Négo koo, wo wo vuli ’furu gi, kyɛfulu wo gyɛ.

²³ Yé mi yaa ’ko, Sadrak koo, Mésak koo, Abɛd‐Négo koo, wo dia é yerele ’furu lé kyɛ a tana, a gi.

²⁴ ’Bɛna tɔɔn, kana blɛn zén minwiinzan blɛn Nébukanɛsaa gi. Yé é nwa vlan nya, yé é we fe we pla ’élɛzannu lɛ yé é léé: Mi yerelenu lé kaa wo vuli kyɛ méléna, mi yaa kaan loo? Yé wa zi pa a lɛ léé: Minwiinzan blɛn, yee lé.

²⁵ Yé é lé é ziin léé: ’Ka gini do. An mi yé ziɛn, ’té wo ’ka é yerele lo, ’té woo tawoo kyɛ méléna, yé we tɔntɔn do kpen ’ka bɔna wo ma lo. Yé a ziɛnzan yara a bélé bale be do yara zo.

²⁶ ’Bɛ zuo, Nébukanɛsaa bié ’furu lé kyɛ a tana, a sɔnɔ, yé é léé: Sadrak koo, Mésak koo, Abɛd‐Négo koo, balenu faa Nwiinzan wuomunu, ’ka bɔra a gi, ’ka da. Yé Sadrak koo, Mésak koo, Abɛd‐Négo koo, wo bɔra kyɛ méléna.

²⁷ Yé minisinu koo, minwiinzan blɛn bɛgizannu koo, gbɔrɔnamanu koo, we pla minwiinzan lɛzannu koo, wo zén ékeva yé wa ye léé, kyɛ ’ka we do kpen kɛlɛ lɛ munu ’ko kɔlɛ ma lo, yé kyɛ ’ka wo nwiin nwin gɔ do kpen ble lɛ lo, yé wo ma sɔnu kyɛ ’ka ble lɛ lo, yé kyɛ gin boen ’ka wo ma lo.

²⁸ Nébukanɛsaa léé: Sadrak koo, Mésak koo, Abɛd‐Négo koo, wolé Bale drɔɔ ’é vo ma. Yeean é lanje pa zia yé a wuozannu lé wo bli ke a lɛ, ’té woo minwiinzan blɛn lé bélidɔwe lɛganma, yé wo bli si wo kɔlɛ lɛ, yé dé é ’ka wozé Bale do kpen nya lo, wo ’ka a nyi sié léé, wo ’wuo tua bale bɛnu lɛ yé wo ’bɛnu bɔ lo, yee ɛ wo si we gi.

²⁹ Bélidɔwe lé maa a nɔ sin, yee lé ke ’ko: Munu faa lé, dé é a bɛn‐o bɛn‐an gi, dé é a migɔnɔoo gɔnɔan nya, dé é a déreoo dérean vɔzan nya, dé é wenaané fe Sadrak koo, Mésak koo, Abɛd‐Négo koo, wolé Bale ma, wo dan ’bɛzan wi kini lɛ ékema, yé wo dan alé kɔn ’wii lɛ yé wa kɛlɛ é ’bin nya. Naa, bale bɛ ’ka ana yé ’bɛ é mi sié we gi bélé wozé Bale zo lo.

³⁰ ’Bɛ zuo minwiinzan blɛn Sadrak koo, Mésak koo, Abɛd‐Négo koo, é wo tɔ kɛlɛ blɛn Babilɔn tɛrɛ la.