Daniɛl 2 - Kazambale lé Sebe Sauunu 1979

Nébukanɛsaa nyɛ gyɛ

¹ Nébukanɛsaa plale mi nwiin lɛɛ fiézan nya, é nyɛ gyɛ. É gibɔrɔ pa a ma, yé é ’ka bɔa yigyɛle lɛ lo.

² Yokɛlɛzannu koo, monénénu va ’monédɔzannu koo, ’monédɔzannu koo, Kaldémunu koo, minwiinzan blɛn munu nwunvɔ wo laana, léé, ’wo ’élé nyɛ ’konu fe. Wo da, yé wo dɔ minwiinzan blɛn ’lɛ.

³ Minwiinzan blɛn lé wo lɛ léé: An nyɛ do gyɛ yé é gibɔrɔ pa an ma. É sɔ an lɛ léé, maa nyɛ ’ko ’ma.

⁴ Kaldémunu a zi pa minwiinzan blɛn lɛ Aramé dére gi léé: Minwiinzan blɛn, ’i vo é yuɛma lɛɛ faa ma, té ’bɛ glɛ ’é dɔ lo ma. ’I nyɛ ’ko fe i wuozannu lɛ yé ko dan a gi fe lɛ i lɛ.

⁵ Minwiinzan blɛn we fe é ziin Kaldémunu lɛ, yé é léé: We ’ko saan an gi; dé ka ’ka nyɛ ’ko valé ’é gi fe lɛ an lɛ lo, wo dan ka wi kini lɛ ékema yé wo dan kalé kɔnnu ’wii lɛ yé wo vo é ’bin nya.

⁶ Naa, dé ka nyɛ ’ko valé ’é gi fe an lɛ, maa dan fɛ nɔ lɛ ka lɛ yé an dan blɛ kɛlɛ lɛ ka lɛ, yé maa dan ka tɔ kɛlɛ lɛ blɛn. Amalé, ’ka nyɛ ’ko valé ’é gi fe an lɛ.

⁷ Wo lé a lɛ a gɔnɔ fiézan nya léé: Minwiinzan blɛn ’é nyɛ ’ko fe é wuozannu lɛ ma, yé ko dan a gi fe lɛ.

⁸ Minwiinzan blɛn lé é ziin léé: Maa a ye webozen nya léé, ka a mɔnna kabo yuɛ va; ka ye léé, a we saan an gi, azama.

⁹ Dé ka ’ka nyɛ ’ko fé an lɛ lo, wo dan we lɛ do dɔ lɛ ka faa gi. Ka a a va léé ka ka ma’lɛrɛ yé ka viéwenu valé boawenu fe an lɛ. Ka bli a a lɛ léé, an bli é dan nɔla lɛ é voéla. Bɛwemalé ’ka nyɛ ’ko fe an lɛ, yé maa dan a gi dɔɔ lɛ léé, ka bɔa a gi fele lɛ an lɛ.

¹⁰ Kaldémunu a zi pa a lɛ léé: We lé minwiinzan blɛn a laa, mi do kpen ’ka tɛrɛ la ’ko yé ’bɛ é bɔa a fele lɛ lo. Dé é a minwiinzan‐oo zan‐an nyaoo, dé é a blɛn‐oo, dé plɛplɛ faa a a leeoo, é ’ka bɔa ’bɛ zoɛ we ’ko laale lɛ mi lee gla nya lo, dé é a yokɛlɛzan nyaoo, dé é a monénénu va ’monédɔzan nyaoo, dé é a Kaldé mi nyaoo, wo lee lo.

¹¹ We lé minwiinzan blɛn a laa, é a tɔntɔn; mi do kpen ’ka bɔa a fele lɛ minwiinzan blɛn lɛ lo, ’té dé é ’ka balenu lé wo ’ka nyanaan munu va lo, wo nya lo.

Bale nyɛ ’ko gi nagɔɔn Daniɛl lɛ

¹² Tɔɔn, minwiinzan blɛn bli fli yé a yuɛ tana gla nya. É léé: ’Ka Babilɔn wedɔɔmunu faa gyɛ!

¹³ Wo we ’ko zana dɔɔ, yé wo wedɔɔmunu gyɛ, yé wo go Daniɛl valé é bɔlunu ’kun lɛ wo gyɛle zama we ma.

¹⁴ Daniɛl we fe minwiinzan blɛn tabin sunyanu nwiinzan Aajɔk lé, é bɔra Babilɔn wedɔɔmunu gyɛle we ma, a lɛ, dére drɔɔ valé wedɔɔdére nya.

¹⁵ É lé minwiinzan blɛn tabin sunyanu nwiinzan Aajɔk lɛ léé: Mɛmalé minwiinzan blɛn we ’ko ’wuo dɔ plɛplɛ ’bɛ zoo? Aajɔk a we zuo fe Daniɛl lɛ.

¹⁶ Daniɛl go minwiinzan blɛn va, yé é zanté vɔ a lɛ léé, ’é bléyi nɔ ’é lɛ, yé é dan we ’ko gi fe lɛ minwiinzan blɛn lɛ.

¹⁷ ’Bɛ zuo Daniɛl go élé kɔn gi yé é we ’ko zuo fe é bɔlunu Aanania koo, Misaɛl koo, Azaria koo, wo lɛ.

¹⁸ É lé wo lɛ léé, ’wo zanté vɔ lanu lé Bale lɛ léé, ’é é nyanai zén ’wo ta, léé, té wo Daniɛl valé é bɔlunu gyɛ zama Babilɔn lé wedɔɔmunu pɔnénu va lo.

¹⁹ Bale yee we yɔɔleo nagɔɔn Daniɛl lɛ yuɛzi gi é béli. Yé Daniɛl lanu lé Bale drɔɔ vo.

²⁰ Daniɛl léma: ’Wo Bale tɔ drɔɔ vo ma, lɛɛfaama, té a glɛ ’é dɔ lo. Wedɔɔle valé plɛplɛ a yee ɛ zé nya.

²¹ Yee ɛ bléyinu valé mi zi wenu nɔlaan, yee ɛ minwiinzan blɛnnu sié ana ’té éé wo dɔa ana. Yee ɛ wedɔɔle no wedɔɔzannu lɛ, yé yee ɛ gikinile no ’wuoatazannu lɛ.

²² We wɔlɛma lé é ke é yɔɔle, yee ɛ a bɔraan. Yee ɛ gunutinu va wenu dɔɔ, yé yee ɛ va lé san ke.

²³ An tranu lé Bale, maa i tɔ zin fe yé maa i bɔ vɔa léé, i wedɔɔle valé plɛplɛ nɔ an lɛ, yé we lé ko a laa i lee, bé nagɔɔn an lɛ, yé i minwiinzan blɛn lé we yɔɔle gi bɔra ko lɛ.

Daniɛl nyɛ gi fe minwiinzan lɛ

²⁴ ’Bɛ zuo, Daniɛl go Aajɔk lé minwiinzan blɛn a fe a lɛ léé, ’é Babilɔn wedɔɔzannu gyɛ za ma, a va; é go yé é lé a lɛ léé: Té i Babilɔn wedɔɔzannu gyɛ za ma lo. ’I go an nya minwiinzan blɛn ’lɛ, yé maa dan alé we gi fe lɛ a lɛ.

²⁵ Aajɔk go Daniɛl nya minwiinzan blɛn ’lɛ tegele, yé é lé a lɛ léma: Juda munu lé wo wo kun luu nya, an wo va mi do ye, yee ɛ dan we ’ko gi fe lɛ minwiinzan blɛn lɛ.

²⁶ Minwiinzan blɛn we fe Daniɛl lé wa laama Bɛlsatasaa, a lɛ, yé é lé a lɛ léé: Nyɛ lé maa a gyɛ, i bɔa a fele valé a gi fele lɛɛ?

²⁷ Daniɛl a zi pa minwiinzan blɛn yuɛ va yé é léé: We lé minwiinzan blɛn a laa, é a we yɔɔle lé wedɔɔzannu koo, monénénu va ’monédɔzannu koo, yokɛlɛzannu koo, ’monédɔzannu koo, wo ’ka bɔa a gi bɔrale lɛ minwiinzan blɛn lɛ lo, a nya.

²⁸ Naa, minwiinzan blɛn Nébukanɛsaa, Bale do ana lanu gi; yee ɛ we yɔɔlenu bɔraan, yé wean é dan bɔ lɛ bléyi voélanu gi, é a nagɔɔn minwiinzan blɛn lɛ. Nyɛ lé bé gyɛ, é valé yuɛzi wenu lé bé ye, ’té i a é yiale, yee lé ke ’ko.

²⁹ Minwiinzan blɛn, bii a é yiale bléyian va, yé ’wuogibɔrɔlenu lé wo da i ’wuo gi, wa wenu lé wo dan bɔ lɛ bléyi voélanu gi, wo nya. Yé mi lé éé we yɔɔlenu gi bɔraan, we lé é dan bɔ lɛ é voéla, é a nagɔɔn i lɛ.

³⁰ Dé wo we yɔɔle gi bɔra an lɛ, ’té é ’ka kɛlɛ lɛ léé, wedɔɔle lé é mini mi yuɛmalenu faa zé wedɔɔle ta, é a an gi lo, naa, wa gi bɔra an lɛ léé, maa we ’ko gi fe minwiinzan blɛn lɛ, yé ’wuogibɔrɔlenu lé wo ke i bli gi, yé i wo dɔɔ.

³¹ Minwiinzan blɛn, i a fɛna ginina, yé i miyili blɛn do ye; miyili ’ko a blɛɛn, ’té a bile nyananyana gié é glɛ la. É a é dɔle loru i ’lɛ; a yele éé kana zén‐é mi gi.

³² Miyili ’ko ’wuo a kyan bozen tegele nya; a golɛ valé a bɛnu a gɔɔlifu nya; a bɔn valé a boronu a zéné nya;

³³ a ganenu a foliɛwɔlɛ nya, yé a ganelaanu a foliɛwɔlɛ valé bɔtɛrɛ nya é vɔɔle.

³⁴ I a ana ginina tɔɔn yé gɔlɛ do fee so é ma, ’té mi do bɛ ’ka é kunle a ma lo, yé miyili ganelaanu lé wo ke foliɛwɔlɛ valé bɔtɛrɛ nya é vɔɔle, gɔlɛ ’ko duun wo lɛ yé é wo wii.

³⁵ Kele tɔɔn, foliɛwɔlɛ koo, bɔtɛrɛ koo, zéné koo, gɔɔlifu koo, kyan koo, wo faa wii ékeva, yé wo kɛlɛ bélé ’sapun lé éé sié ’sa sunwona yiri bi bléyi va, ’té fu éé goo a nya, a zo. Yé wo ’ka wo pagi do kpen ye lɛ é dɛrɛ lo. Naa, gɔlɛ lé é duun miyili lɛ, é kɛlɛ gɔ blɛɛn lé é tɛrɛ faa fan, a nya.

³⁶ Nyɛ lé ke bɛ. Ko dan a gi fe lɛ minwiinzan blɛn lɛ.

³⁷ Minwiinzan blɛn, bii ɛ ke minwiinzannu nwiinzan blɛn nya. Plale mi nwiin koo, plɛplɛ koo, gla koo, kɛlɛle blɛn koo, lanu lé Bale wo nɔ i lɛ;

³⁸ blaminu koo, bwi gi winu koo, lagi mianénu koo, dé wa fɛofɛana, é wo bɛ pa i lee, yé é i pla wo faa nwiin. Bii ɛ ke miyili ’wuo lé ke kyan nya, a nya.

³⁹ Izé nyaale zuo, mi bɛ é dan pla lɛ munu nwiin, naa, ’bɛzan zé ’ka dan kɛlɛ lɛ blɛn bélé izé zo lo. Yé a yaazan é dan pla lɛ mi nwiin, ’bɛ zé a bélé zéné zo. Yee ɛ dan pla lɛ tɛrɛ faa nwiin.

⁴⁰ Yé mi ziɛnzan é dan pla lɛ munu nwiin, ’té é a plɛplɛ bélé foliɛwɔlɛ zo. Fɛan zo lé foliɛwɔlɛ éé fɛnu faa wiian yé éé wo pun dɔa, a zo lé é dan fɛnu faa wii lɛ yé é wo pun dɔ, bélé foliɛwɔlɛ lé éé fɛ faa soo é ke ’léé, a zo.

⁴¹ Bé ganelaanu valé a ganewɔlɛnu ye bɔtɛrɛ valé foliɛwɔlɛ nya é vɔɔle bɛ, ’bɛ gi léé, wo dan plale mi nwiin ’ko gi bɔi lɛ fié; naa, bé ye léé, foliɛwɔlɛ a é vɔɔle bɔtɛrɛ nya, ’bɛ gi léé, plɛplɛ do lé ke bélé foliɛwɔlɛ zé zo é dan kɛlɛ lɛ plale mi nwiin ’ko zé nya.

⁴² Bé ye léé, a ganewɔlɛnu a foliɛwɔlɛ valé bɔtɛrɛ nya é vɔɔle, ’bɛ gi léé, plale mi nwiin ’ko, a lɛ do é dan kɛlɛ lɛ plɛplɛ yé a lɛ do é dan kɛlɛ lɛ é bubu.

⁴³ Bé ye léé, foliɛwɔlɛ a é vɔɔle bɔtɛrɛ nya, ’bɛ gi léé, wo dan gipawe kɛlɛ lɛ bɛn nya ékeva, yé ’bɛ é kɛlɛ we vɔɔle nya. Naa, wo ’ka dan kɛlɛ lɛ do lo, fɛan zo lé bɔtɛrɛ valé foliɛwɔlɛ ’ka kɛlɛ lɛ do lo, a zo.

⁴⁴ Minwiinzan blɛn ’konu bléyi va, lanu lé Bale é dan plale mi nwiin lé é ’ka dan sɛrɛ lɛ monomono lo, a dɔ lɛ, ’té mi bɛ ’ka dan pla lɛ ’bɛ nwiin monomono lo. Yee ɛ dan plale mi nwiin ’konu faa ’wii lɛ yé é wo sɛrɛ tata, yé yeebozen é dan vo lɛ ana lɛɛfaama, ’bɛ glɛ ’ka lo.

⁴⁵ Gɔlɛ lé bé ye sona gɔ ma bɛ, ’té mi bɛ ’ka a ma lo, yé foliɛwɔlɛ koo, zéné koo, bɔtɛrɛ koo, gɔɔlifu koo, kyan koo, yé é wo wii bɛ, ’bɛ gi lé ke bɛ. We lé é dan bɔ lɛ ’bɛ zuo, Bale blɛn a gɔɔn minwiinzan blɛn lɛ. A nyɛ a webozen nya, yé a gifedére a tegele.

Minwiinzan blɛn Daniɛl banwo

⁴⁶ Yé minwiinzan blɛn Nébukanɛsaa dia ’é bli la Daniɛl ’lɛ, yé é léé, ’wo saraka bo Daniɛl lɛ, yé wa ban lasikɔrɔ nya.

⁴⁷ Yé minwiinzan blɛn lé Daniɛl lɛ léé: Ilé Bale a balenu lé Bale nya, yé é a minwiinzan blɛn faa zan nya webozen nya. I we ’ko gi bɔra fɛan zo, ’bɛ gi léé, é bɔa we yɔɔlenu gi bɔrale lɛ.

⁴⁸ ’Bɛ zuo minwiinzan blɛn Daniɛl kɛlɛ blɛn, yé é blɛ wezan kiɛre kɛlɛ a lɛ. É a dɔ Babilɔn tɛrɛ faa nwiinzan nya, yé é a kɛlɛ Babilɔn wedɔɔzannu faa nwiinzan nya.

⁴⁹ Daniɛl zanté vɔ minwiinzan blɛn lɛ léé, Sadrak koo, Mésak koo, Abɛd‐Négo koo, ’é Babilɔn tɛrɛ la wenu bɛ pa wo ɛ lee. Yé Daniɛl vo minwiinzan blɛn lé gɔrɔ gi.