Daniɛl 12 - Kazambale lé Sebe Sauunu 1979

Bléyi voélazan

¹ ’Bɛ bléyi va Mikaɛl lé é ke mi blɛn nya, ilé munu ta gulidanzan nya, é dan nwa lɛ. Bléyi ’ko é dan kɛlɛ lɛ nyané ble bléyi nya. É sia bɛnnu pélisia bléyi va fɔɔ yé é bɔ bléyi ’ko va, wo ’ka tan ’bɛ zoɛ nyané vinin ble lɛ lo. ’Bɛ bléyi va, ilé munu lé wo tɔ ke é gyɛle sɛbɛ gi, wo dan si lɛ we gi.

² Munu lé wo ke yiɛna vun gi, wo va mi kiɛre é dan vuo lɛ, vole é yuɛma lé a glɛ ’ka lo, é dan kɛlɛ lɛ wo va mi kenu zé nya; serelebole valé yaragyɛwe lé é ’ka nyaan lo, é dan kɛlɛ lɛ wo va mi kenu zé nya.

³ Wedɔɔzannu é dan bi lɛ bélé lagi fuasan zo, yé munu lé woo we tegele paan munu gi, wo dan bi lɛ bélé lagi monénénu zo, bléyi faa ma, ’bɛ glɛ ’ka dɔa lo.

⁴ Bii Daniɛl, ’i dérenu ’ko tadɔ yé ’i sɛbɛ ’ko ’léé béé fɔɔ yé bléyi voélazan é bɔ. Mi kiɛre é dan a ta fe lɛ, yé wedɔɔle gi é dan gyɛ lɛ.

⁵ Yé maa Daniɛl, maa nagini, ’té mi fié a é dɔle yuu gɔ fié la é ziin.

⁶ Wo va mi do we fe mi lé lɛnsɔ ke a ta, ’té é a é dɔle yuu ta loru, a lɛ léé: We blɛnnu ’ko é dan nyaa lɛ mɛ bléyi vaa?

⁷ Yé mi lé, lɛnsɔ ke a ta, ’té é ke é dɔle ’yi ta loru, maa a dére ’ma; yé é bɛyi valé é bɛbo nwa lagi zia, ’té Bale lé éé voo é yuɛma lɛɛfaama, a glɛ ’ka lo, éé a ’nyɔɔn‐an a tɔ nya yé é léé: É dan kɛlɛ lɛ lɛɛ yaa é buu giéle zuo ma. Yé dé Bale lé munu lé plɛplɛ faa nyaa tata bléyian va, yé we ’konu faa é nyaa.

⁸ An we ’ko ’ma, naa, maa ’ka a gi ’ma lɛ lo. Yé maa léé: Anzan, we ’konu ’wuo é dan pla lɛ kaa?

⁹ É a zi pa léé: Daniɛl, ’i go. Naa, dére ’konu é dan vo lɛ ana é yɔɔle ’kyɛ, ’té wo ’léé a é bééle fɔɔ yé a nyaabléyi é bɔ.

¹⁰ Mi kiɛre é dan kɛlɛ lɛ sauun, yé wo gi é bɔ, yé wo kɛlɛ wéiin. Weplekɛlɛmunu é dan wenaané kɛlɛ lɛ, yé wenyané kɛlɛmunu va mi do kpen ’ka dan we ’ma lɛ lo. Naa, munu lé wo ’wuo ke wo ta, wo dan we ’ma lɛ.

¹¹ É sia bléyian va lé balebanwi lé wa kyɛ blé yifaama, wa nɔle yi ga, fɔɔ yé fɛ naané lé mi ’ka é yuɛ vɔa a ta lo, yé wa dɔ fɔɔ bléyi ’ko va, yi wuru suiɛdo yi yɔ ziɛn wɔlɛ vu é dan gié lɛ.

¹² Mian é a lɛbɛn fɔɔ yé a yi wuru suiɛdo yɔ suiɛdo wɔlɛ vu ta soruzan bɔ, ’bɛzan zé a néné.

¹³ Yé bii, ’i tawo a ’wuoplana zia. I dan flin lɛ yé i dan nwa lɛ loru ilé zarafɛ yele we ma a yi nyaalanu nya.