Daniɛl 11 - Kazambale lé Sebe Sauunu 1979

¹ Mɛde mi Darius plale mi nwiin lɛɛ vininzan nya, an vo a sɔnɔ bɔle a va valé a dɔle gligli we ma.

² Sin, an dan webozen gɔɔn lɛ i lɛ. Bé ye, minwiinzan blɛn yaa é dan kɛlɛ lɛ é ziin Pɛɛs tɛrɛ la. A ziɛnzan é dan fuafɛnu téé lɛ yé é mini a bɔlunu faa zé ta. Yé bléyian va lé é dan kɛlɛ lɛ plɛplɛ élé fuafɛnu gi, é dan nwa lɛ élé plɛplɛ faa nya Javan tɛrɛlamunu ma.

Éjipitinu valé Sirinu lé we

³ Yé minwiinzan blɛn nyanazan do é dan pla lɛ mi nwiin élé plɛplɛ blɛn nya, yé wɛan é sɔ ’bɛ lɛ, ’bɛ é dan a kɛlɛ lɛ.

⁴ A kɛlɛle blɛn zuo, alé plale mi nwiin é dan sɛrɛ lɛ, yé a gi é dan bɔi lɛ lagi fu ziɛn vazia. É ’ka dan kɛlɛ lɛ a kulunu zé nya lo, yé alé plɛplɛ ta é dan zana lɛ. Naa, wo dan a kini lɛ ékema, yé é dan kɛlɛ lɛ mi bɛnu zé nya.

⁵ Yirinwana bɛyilazia tɛrɛ nwiinzan blɛn é dan plɛplɛ ye lɛ. Naa, a bɛgizan do zé plɛplɛ é dan gié lɛ azé ta. ’Bɛ é dan pla lɛ munu nwiin. ’Bɛ lé plale mi nwiin é dan kɛlɛ lɛ plɛplɛ.

⁶ Lɛɛ kenu giéle zuo, wo dan wo gi pa lɛ do, yé yirinwana bɛyilazia tɛrɛ nwiinzan blɛn lu é dan da lɛ yirinwana bɛbolazia tɛrɛ nwiinzan blɛn va, wo vole drɔɔ ékeva we gi. Naa, ’bɛ ’ka voo plɛplɛ yifaama lo, yé é ’ka dan dɔ lɛ wo ma lo; wo dan yee le pa lɛ munu lee, yee koo, a vamunu koo, a ti koo, mi lé é bɔ a va ’bɛ bléyi va, ’bɛ koo, wo nya.

⁷ A gɔn do é dan bɔ lɛ a suni ma a pa gi. É dan da lɛ sunyanu va, yé é dan wɔra lɛ yirinwana bɛbolazia minwiinzan blɛn lé guliyɔɔkɔnnu gi, yé wean é sɔ a lɛ é dan a kɛlɛ lɛ ’bɛ lɛ, yé é dan ébo kɛlɛ lɛ plɛplɛ.

⁸ Yé minwiinzan blɛn lé balenu koo, alé miyili selelenu koo, alé fɛwezannu lé ke gɔɔlifu valé kyan nya koo, é dan wo si lɛ yé é go wo nya Éjipiti tɛrɛ la. Yé é dan vo lɛ ana mi lɛɛ kenu nya, ’té é a é sile yirinwana bɛbolazia minwiinzan blɛn ma baa.

⁹ Yé mi ’ko é dan nwa lɛ yirinwana bɛyilazia minwiinzan blɛn ma, yé ’bɛ zuo yé é dan da lɛ élé tɛrɛ la é pa gi.

¹⁰ A benu é dan sunyanu kiɛre zén lɛ ékeva yé wo go guli dan; wo vazan do é dan kɛlɛ lɛ wo ’lɛzan nya; é dan sɔɔla lɛ fɛfaana bélé ’yiyoro lé éé bɔraan bwi la, a zo, yé é dan da lɛ é pa gi, yé wo dan guli dan lɛ fɔɔ yé wo bɔ yirinwana bɛyilazia minwiinzan blɛn lé guliyɔɔkɔn plɛplɛ ma.

¹¹ Yirinwana bɛyilazia minwiinzan blɛn bli é dan fli lɛ, yé é dan bɔra lɛ guli danle we gi yirinwana bɛbolazia minwiinzan va. É dan sunyanu gu blɛn zén lɛ ékeva yé yirinwana bɛbolazia minwiinzan blɛn lé sunyanu é dan vo lɛ a lee.

¹² Mi gu blɛn ’ko a boblɛnzannu nya, yé wo nwiinzan blɛn é dan blii lɛ boblɛn nya. É dan mi wuru é wuru gyɛ lɛ, naa, guliwuo ’ka dan vo lɛ a lɛ lo.

¹³ Naa, yirinwana bɛbolazia minwiinzan blɛn é dan da lɛ yé sunya gu blɛn lé wo di mini a vininzannu ta, é dan wo zén lɛ ékeva. Lɛɛ kenu giéle zuo, dé yi do bɔ, é dan nwa lɛ yé é go guli ma sunya gu blɛn nya é va, ’té gulidanfɛnu kiɛre a a lee.

¹⁴ Bléyi ’ko va, mi kiɛre é dan nwa lɛ yirinwana bɛyilazia minwiinzan blɛn ma. Yé glawe kɛlɛmunu é dan bɔra lɛ ilé munu va, yuɛziwenu lɛ sɔɔle we ma; naa, wo dan wo kele lɛ.

¹⁵ Yirinwana bɛbolazia minwiinzan blɛn é dan go lɛ é ’lɛ, é dan tɛrɛ zun dɔ lɛ, yé é dan fla plɛplɛnu si lɛ. Yirinwana bɛyilazia sunyanu valé mi nwiinzan blɛn tɔzannu ’ka dan dɔ lɛ wo ’lɛ lo, plɛplɛ é dan nyaa lɛ wo lee, azama.

¹⁶ Mian é nwaa a ma guli nya, dé wean sɔ a lɛ, éé a kɛla ’bɛzan lɛ. Yé mi do kpen ’ka dan dɔ lɛ a ’lɛ lo. É dan dɔ lɛ tɛrɛnu va tɛrɛ zima ta, yé munu lé wo vɔ a lee, é dan wo gyɛ lɛ.

¹⁷ É dan dɔ lɛ a gi léé, é dan bɔ lɛ a ’wuoplana élé plale mi nwiin lé plɛplɛ faa nya é lee, yé we é nyaa yee valé yirinwana bɛyilazia minwiinzan blɛn méléna. É dan é lu nɔ lɛ ’bɛ na nya, ’bɛ lé we sɛrɛle tata we ma, naa, we ’ko ’ka dan bɔ lɛ lo, yé ’bɛ nyian ’ka dan wo lɛ a ma lo.

¹⁸ É dan é yara dɔ lɛ wɛyi worona tɛrɛnu ta, yé é dan a kiɛre si lɛ ézé nya, naa, serelebomawe lé é sɔ a lɛ léé, é a kɛlɛ minwiinzan do lɛ, ’bɛzan a nɔlaan azé nya.

¹⁹ ’Bɛ zuo é dan é yara dɔ lɛ élé tɛrɛ la guliyɔɔkɔnnu vazia; é dan saanwe do kɛlɛ lɛ yé azé é dan nyaa lɛ, yé wo ’ka dan a ye lɛ é dɛrɛ lo.

²⁰ A pagizan é dan mitablezan do nyana lɛ yee tɛrɛ nɔnɔmi bɛ do la, naa, yi kenu giéle zuo, alé tɛrɛla é dan nyaa lɛ kpɔ; ’bɛ ’ka dan kɛlɛ lɛ bliflizan valé gulidanzannu pagi nya lo.

²¹ Mi lé é ’ka munu yuɛ gi bɔa lo, ’bɛ é dan a pagi si lɛ, naa, minwiinzan dɔbɛ ’ka ’bɛ nyɛɛ lɛ lo. ’Bɛ é dan bɔra lɛ vole drɔɔ bléyi va, yé ’bɛ é dan plale mi nwiin si lɛ dabli kɛlɛle nya.

²² Sunyanu é dan nwɛɛn lɛ yé wo ta é dan saan lɛ yé wo sɛrɛ tata, ’wo valé Bale lé gipawe ’lɛzan do nya.

²³ Dé wo péli vɔ a va faa é dan dabli kɛlɛ lɛ wo lɛ. É dan nwa lɛ yé é go guli ma yé a guliwuo é dan vo lɛ a lɛ, dɔlé ’té alé sunyanu ’ka di lo.

²⁴ Vole drɔɔ bléyi va, é dan nyana lɛ tɛrɛnu ’ko va tɛrɛ zimanu ta; yé wenu lé a tranu koo, a tranu é tranu koo, wo ’ka tan a vinin kɛlɛ lɛ lo, é dan wo kɛlɛ lɛ. Gulizarafɛnu koo, mi pagifɛnu koo, fuafɛnu koo, é dan wo guli lɛ. Bléyi kenu wuo, é dan we kenu ma’lɛrɛ lɛ léé, é kɔn plɛplɛnu sié ézé nya.

²⁵ É dan kɛlɛ lɛ sunyanu gu blɛn ’lɛzan nya yé dé élé plɛplɛ valé élé nyana wɔra é ’wuo gi é dan nwa lɛ yirinwana bɛyilazia minwiinzan blɛn ma. Yé yirinwana bɛyilazia minwiinzan blɛn é dan zén lɛ gulidanle va, ’é valé élé sunyanu kiɛre plɛplɛ nya. Wo dan wo bɔn‐in naanénu bɔrɔ lɛ ’bɛ ma, amalé ’bɛ ’ka dan dɔ lɛ a ’lɛ lo.

²⁶ Munu lé woo fɛ blé a va, wo dan a ma we ble lɛ a gyɛle we ma; alé sunyanu é dan nwɛɛn lɛ yé mi galenu é dan kɛlɛ lɛ di.

²⁷ Minwiinzan blɛn fié ’ko wo dan wo ’wuoi bɔrɔ lɛ wenaané kɛlɛle ma, yé wo dan viéwo lɛ wo ke lɛ fɛble pala do zi. Naa, ’bɛ nyian ’ka dan wo lɛ wo lɛ lo. Naa, a nyaabléyi lé Bale a dɔ, é ’ka dan nyaa lɛ ’bɛ bléyi ’lɛ lo.

²⁸ É dan nɔla lɛ élé tɛrɛla fuafɛ kiɛre nya é lee; yé é dan dɔ lɛ gipawe sauun ma é bli gi. É dan we kɛlɛ lɛ a ma, ’bɛ zuo yé é dan go lɛ élé tɛrɛ la é ziin.

²⁹ Dé bléyi do bɔ, é dan nwa lɛ yé é go guli ma é ziin yirinwana bɛyilazia munu ma. Naa, bléyi voéla ’ko nya, wenu ’ka dan kɛlɛ lɛ bélé é vinin zé zo lo.

³⁰ Kitim ’yitagoro gi munu é dan guli dan lɛ a va. A fuu é dan si lɛ a ta, yé é dan nɔla lɛ é pa gi. Yé a bli é dan fli lɛ gipawe sauun ma. Dé é bɔ élé fɛna, é ’ka dan nyana lɛ é pla lo. Munu lé wo sɔn vɔ gipawe sauun ma, é dan ’bɛnu zén lɛ é va.

³¹ A dére ta lé sunyanu é dan da lɛ, wo dan fɛna sauun, kɔn plɛplɛ sɔnné sɛrɛ lɛ, yé balebanwi lé wa kyɛ blé, ’té wa no yifaama, wo dan a nɔle yi ga lɛ, yé fɛ sɛrɛle tata fɛ naané lé mi ’ka é yuɛ vɔa a ta lo, wo dan a dɔ lɛ fɛna sauun na.

³² É dan gipawe sɛrɛzannu saan lɛ blaané dére nya. Naa, munuan wo wolé Bale dɔɔ, wo dan dɔ lɛ gligli wekɛlɛle gi.

³³ Yé wo va wedɔɔmunu é dan we paa lɛ mi kiɛre gi. Gwɔun koo, kyɛnɛnɛ koo, kɛlɛle luu nya koo, fɛ sile wo lee gla nya koo, é dan wo va mi kenu dia lɛ bléyi ke nya.

³⁴ Wo diabléyi va, wo dan bɔ lɛ wo va sɛ, yé mi kiɛre é dan pa lɛ wo va ’wobo drɔle nya.

³⁵ Wedɔɔmunu va mi kenu é dan dia lɛ léé, wo kɛlɛ wéiin, wo kɛlɛ sauun, yé wo gi é bɔ fɔɔ yé bléyi voélazan é bɔ, naa, é ’ka dan bɔ lɛ lo, fɔɔ bléyi lé Bale a dɔ, ’té é bɔ é wo.

³⁶ Wean é sɔ minwiinzan blɛn ’ko lɛ, yee lé é dan a kɛlɛ lɛ. É dan nwa lɛ, é dan ébo tɔ pla lɛ balenu faa tɔ nwiin, yé é dan sɔnɔ dére fe lɛ balenu lé Bale ma; a bɛ ma é dan kɛlɛ lɛ néné fɔɔ yé bliflile lɛ é sɔɔ. Naa, wean wa kɛlɛle béli dɔ, a lɛ é dan sɔɔ lɛ.

³⁷ A tranu lé balenu ’ka dan a yuɛ gi bɔ lɛ lo, yé bale lé é sɔ lomu lɛ, ’bɛ ’ka dan a yuɛ gi bɔ lɛ é ziin lo. Dé é a baleoo balean nya, ’bɛ ’ka dan a yuɛ gi bɔ lɛ lo, naa, é dan ébo tɔ pla lɛ tɔ faa nwiin.

³⁸ Naa, duowo, kɔn plɛplɛnu lé wo gi bale ke é dɔle é dɔlafɛ ta, é dan wo lɛdɔ lɛ a ma. Bale ’ko lé a tranu ’ka a dɔɔ lɛ lo, é dan blɛ kɛlɛ lɛ a lɛ, kyan koo, gɔɔlifu koo, gɔlɛwezannu koo, fɛ vlɛzannu koo, wo nya.

³⁹ Bɛnnu lé bale ’ko pli zi lé é dan we kɛlɛ lɛ fɛna plɛplɛnu ma, yé munu lé wa ye wo yuɛ gi mi nya, é dan wo tɔ bɔ lɛ yé é wo pla mi kiɛre nwiin; é dan wo banwo lɛ tɛrɛnu nya.

⁴⁰ A nyaabléyi va, yirinwana bɛyilazia minwiinzan blɛn é dan ’wii lɛ a ta. Yé yirinwana bɛbolazia minwiinzan blɛn é dan ’wii lɛ a ta gulidangoronu koo, wisootasunyanu koo, ’yitagoro kiɛrenu koo, wo nya, bélé fu plɛplɛ éé giéan fɛan zo, a zo. É dan bié lɛ baa tɛrɛnu va tɛrɛ zima ta. É dan sɔɔla lɛ fɛfaana bélé ’yiyoro lé éé bɔraan bwi la, a zo.

⁴¹ É dan wɔra lɛ tɛrɛnu va tɛrɛ zima ta, yé é dan mi kiɛre gyɛ lɛ; naa Édom munu koo, Moab munu koo, Amɔn munu tɔzannu koo, wo dan so lɛ a lee.

⁴² A bɛ é dan sɔ lɛ tɛrɛ kiɛre nya, naa, Éjipiti tɛrɛ é ziin, ’bɛ ’ka dan so lɛ a lee monomono lo.

⁴³ É dan ébo kɛlɛ lɛ fɛwezannu lé wo wo kɛlɛ kyan valé gɔɔlifu nya koo, Éjipiti lé fɛwezannu faa koo, wozan nya. Libinu valé Étiopinu é dan zén lɛ a zuo.

⁴⁴ Wenu lé wo bɔ yirinwanazia valé yirinwana bɛbolazia dé é wo zuo ’ma, di é dan kini lɛ a gi, yé é dan go lɛ bliflile blɛn nya mi kiɛre sɛrɛle valé wo kulu gale we ma.

⁴⁵ É dan élé fua sɔkɔnnu dɔ lɛ wɛyinu méléna, gɔ tɔbɔle lé é ke plɛplɛ, a vazia. É dan bɔ lɛ ézé ’wuo plana, ’té a bɔavazan ’ka lo.