Daniɛl 10 - Kazambale lé Sebe Sauunu 1979

Daniɛl yuɛziwe ye Idékɛl yuu gɔ la

¹ Pɛɛs munu nwiinzan blɛn Sirus plale mi nwiin lɛɛ yaazan nya, wo we do gɔɔn Daniɛl lé wa laama Bɛlsatasaa bɛ, a lɛ. We ’ko a webozen nya. Yé we tɔntɔn blɛn lé é dan bɔ lɛ, é a nagɔɔn. Daniɛl we ’ko gi kuli, yé a gi kini yuɛziwe ’ko gi ’male we ma.

² ’Bɛ bléyi va, maa Daniɛl, an flɛyi yaa kɛlɛ gyɛbole nya.

³ An ’ka fɛ néné do kpen ble lɛ lo yé an ’ka wi valé dɔrɔ wɔra lɛ an ’léé lo. An ’ka nyɔnɔ gié lɛ an ma lo fɔɔ yé flɛyi yaa lɛ sɔɔ.

⁴ Moné vininzan yi yɔ do wɔlɛ ziɛnzan nya, ’té maa a é dɔle yuu blɛn lé wa laama Idékɛl, a gɔ la.

⁵ Maa yuɛ vɔ, maa a nagini, yé an mi do ye é dɔle, ’té lɛnsɔ a a ta, yé Ufaz kyan kyɛsidi a é dɔle a gyɛn.

⁶ A kɔlɛ yuɛɛ a bélé krisolitegɔlɛ zo, yé a yara éé bié bélé lɛɛ yuɛwuovɔle zo. A yuɛnu a bélé kyɛnɛnɛ zo, a bɛnu valé a ganenu a bélé zéné lé wa ma gɔrɔla, a zo, yé a dére a bélé mi gu blɛn dére zo.

⁷ Maa Daniɛl do kpen ɛ yuɛziwe ’ko ye. Munu lé wo ke an va, wo ’ka a ye lɛ lo, naa, di blɛn kini wo gi é wo yé wo zén vlan nya yé wo go yɔɔ lɛ.

⁸ An vo an do yé an yuɛziwe blɛn ’ko ye. An fuu faa si an ta, an yara sɛrɛ, yé anlé plɛplɛ faa si an lee.

⁹ Maa a dérenu ’ma; maa a dérenu ’ma aan wo, an dia an bli la, yé an zɔrɔ.

¹⁰ Yé bɛ do mane an ma, yé é an powuonu valé an bɛnu nyɔɔn.

¹¹ Yé é lé an lɛ léé: Daniɛl, i sɔ Bale lɛ. Dérenu lé maa dan wo fe lɛ i lɛ, ’i wo ban i tɔné nya. ’I nwa yé fɛana lé i ke, ’i dɔ ana; naa sin, wo an pa zia i va. Dé é nyaa wefele nya an lɛ, an dɔ loru, ’té an nyɔɔn‐an.

¹² É lé an lɛ léé: Daniɛl, té i kana we do lee lo. Yian nya lé i bli bɔ we ’ko gi ’male ma yé ibo kɛlɛ kiéné ilé Bale ’lɛ, Bale i dérenu ’ma a yi nya yé i dérenu ’ko lé we ma lé an da.

¹³ Pɛɛs munu nwiinzan dɔ an ma plɛplɛ yi yɔ do wɔlɛ do wuo. Naa, bé ye, minwiinzannu va mi blɛn do lé wa laama Mikaɛl, é da bɔ lɛ an va yé an vo é nyanale ana Pɛɛs munu nwiinzannu va.

¹⁴ Wean é dan bɔ lɛ ilé munu ma é voéla, an dan a zuo fe lɛ i lɛ sin, naa, yuɛziwe ’ko a ’bɛ bléyi zé nya.

¹⁵ É a we ’konu fena an lɛ bléyian va, an ’wuo vɔ an wuo yé an vo é tadɔle.

¹⁶ Yé bé ye, mi do lé é ke bélé blaminu zo, é mane an lɔlu ma. An ’léé fuo yé mi lé é ke é dɔle an ’lɛ bɛ, maa lé a lɛ léé: Anzan, yuɛziwe ’ko é an gi nyɛ blɛn kini yé anlé plɛplɛ faa si an lee.

¹⁷ Anzan, i wuozan é bɔa wefele lɛ kaa? Sin, an fuu do kpen ’ka an ta lo, an tunu an gi.

¹⁸ ’Bɛ zuo, mi lé é ke bélé blami zo bɛ, é bɛ mane an ma é ziin yé é an fuu dɔ an ta.

¹⁹ Yé é lé an lɛ léé: I sɔ Bale lɛ. Té i kana we do kpen lee lo. ’I vo drɔɔ ma. ’I bli ta dɔ plɛplɛ, ’i bli ta dɔ plɛplɛ ma. É ke aan wo we fena an lɛ, an fuu dɔ an ta é ziin yé maa léé: Anzan, ’i we fe, naa, i an fuu dɔ an ta.

²⁰ É lé an lɛ léma: Wean ma lé an da i va, bé gi dɔɔ? Sin, an dan go lɛ an pa gi gulidanle Pɛɛs munu nwiinzan va we gi. An gole zuo Javan nwiinzan é dan da lɛ.

²¹ Naa, wean é ke é gyɛle webozen lé sɛbɛ gi, é sɔ an lɛ léé, maa a gɔɔn i lɛ. Mian éé bɔa an va gulidanna munu ’ko va, dé é ’ka ’kaa Izraɛlnu nwiinzan Mikaɛl nya lo, ’bɛzan ’ka lo.