Daniɛl 1 - Kazambale lé Sebe Sauunu 1979

Wo go Daniɛl nya Babilɔn

¹ Juda nwiinzan blɛn Jojakim plale mi nwiin lɛɛ yaazan nya, Babilɔn nwiinzan blɛn Nébukanɛsaa nwa Jérusalɛm ma yé alé sunyanu diri yee fla ’ko zi.

² Mizambale Juda nwiinzan blɛn Jojakim pa a lee, ’é valé Balebangikɔn gi nyanamapafɛ kenu nya. Nébukanɛsaa nyanamapafɛ ’konu si yé é go wo nya Sinéaa tɛrɛ la, yé é wo pa ’élé bale lé kɔn gi fɛwezannu pana.

³ Minwiinzan blɛn lé miblalenu nwiinzan Asipénaz lɛ léé, ’é da Izraɛl pɛniɛ kenu lé wo ke minwiinmunu gɔnɔ gizannu valé fuanu benu nya, wo nya ’é lɛ;

⁴ pɛniɛnu lé gyɛ pɔlɛ do kpen ’ka wo ma lo, ’té wo yara ke é nɔnɔmi, ’té wo ke wedɔɔzannu koo, gikinizannu koo, ’wuoatazannu koo, wo nya, ’té woo bɔaléé, wo minwiinzan blɛn lé kɔn gi nyanama pa, yé wo Kaldé dére valé alé sɛbɛwɔlɛnu paa wo gi.

⁵ É sɔ minwiinzan blɛn lɛ léé, ’é wo paan lɛɛ yaa wuo yé ’bɛ zuo wo kɛlɛ ’é va nyanamapazannu nya. Yé fɛ lé wa dɔneé abozé nya, ’té éé a ke no wo lɛ yi faa do do ma, ’té é ’é minidɔrɔ ke no wo lɛ yi faa do do ma.

⁶ Juda pɛniɛnu va mi kenu lé ke ’ko: Daniɛl koo, Aanania koo, Misaɛl koo, Azaria koo, woo lé.

⁷ Miblalenu nwiinzan wo tɔ dɛrɛ pa. É Daniɛl tɔ pa Bɛlsatasaa. É Aanania tɔ pa Sadrak, é Misaɛl tɔ pa Mésak, yé é Azaria tɔ pa Abɛd‐Négo.

⁸ Daniɛl é bli ta dɔ plɛplɛ léé, é ’ka ébo tiri dɔa fɛblele valé dɔrɔ lé minwiinzan blɛn a minian, a nya lo. Yé é zanté vɔ miblalenu nwiinzan lɛ léé, té ’bɛ ’é tunu gla nya léé, ébo tiridɔfɛ ’ko ble lo.

⁹ Bale a kɛlɛ léé, miblalenu nwiinzan é Daniɛl ye mi zin valé nyanaizénlazan nya.

¹⁰ Miblalenu nwiinzan lé Daniɛl lɛ léé: An kanaan minwiinzan lee. Yee ɛ ka blefɛ valé ka minifɛ tɔ pa, naa, dé é kɛlɛ léé, é ka yara ye é kwééle é mini ka yɛrama munu zé ta, ’té ka an kɛlɛ weanwiinzan nya minwiinzan yuɛ gi.

¹¹ Daniɛl koo, Aanania koo, Misaɛl koo, Azaria koo, miblalenu nwiinzan wolé we bɛ pa ’é leezan lee kɔɔn, yé Daniɛl lé yee miblalenu nwiinzan leezan lɛ léé:

¹² ’I i wuozannu gi dan yi vu wuo. ’Wo fɛblele pla nɔ ko lɛ, é valé ’yi nya.

¹³ ’Bɛ zuo ’i ko yara nagini, yé pɛniɛnu lé woo minwiinzan blɛn blefɛ blé, ’i ’bɛnu zé yara nagini. Yé we lé i dan a ye lɛ, ’i i wuozannu lé we kɛlɛ ’bɛ yɛrama.

¹⁴ We lé wa laa a lee, é a nyi si, yé é wo gi dan yi vu wuo.

¹⁵ A yi vu nyaala nya, é a ye léé, wo yara a é buale yé wa é zénle a gi gligli é mini pɛniɛnu faa lé wo minwiinzan blɛn blefɛ blé, wo ta.

¹⁶ Fɛblele valé dɔrɔ lé é a nɔ wo lɛ, miblalenu nwiinzan leezan éé ’bɛ sié yé éé fɛ pla no wo lɛ.

¹⁷ Kazambale pɛniɛ ziɛn ’ko kɛlɛ ’wuoatazannu nya, yé é wo gi kini sɛbɛ lé we nya, yé é wedɔɔle nɔ wo lɛ, ’té Daniɛl éé yuɛzi we faa valé nyɛgyɛle faa gi fé.

¹⁸ Wo nagɔɔn?-?bléyi lé minwiinzan blɛn a dɔ, é bɔ aan wo, miblalenu nwiinzan da wo nya Nébukanɛsaa ’lɛ.

¹⁹ Minwiinzan blɛn vo glewona wo va, yé pɛniɛnu faa va, é ’ka mi do kpen ye lɛ bélé Daniɛl koo, Aanania koo, Misaɛl koo, Azaria koo, wo zo lo. Amalé wo wo si, léé, ’wo minwiinzan blɛn va nyanama pa.

²⁰ We faa lé é a laa wo lee, ’té é a lé wa zi pa gikinile valé wedɔɔle yɛrama, wozé gié yokɛlɛmunu valé monénénu lé wedɔɔzannu lé wo ke alé tɛrɛ la fɛfaana, wozé wedɔɔle ta gɔnɔ vu.

²¹ ’Bɛ nya lé Daniɛl vo fɔɔ yé minwiinzan Sirus plale mi nwiin lɛɛ vininzan bɔ.