Kolɔs munu 4 - Kazambale lé Sebe Sauunu 1979

¹ ’Kaa mi zannu, we lé é ke tegele valé é drɔle, ’ka yee ɛ kɛlɛ ka wuozannu lɛ; ka a gi dɔɔ léé, ka é ziin, kazan a, é a lagi loru.

² ’Ka yara pa bazorole ta, ’ka vo é vuole a gi bɔvɔle nya.

³ ’Ka bazoro é ziin ko tɔ ma léé, Kazambale ’é zi nɔ ko lɛ, ko alé we fe, yé maa Krist lé weyɔɔle gi fe; we ’ko ma lé maa ke bokɔn gi ’ko.

⁴ ’Ka bazoro léé, maa a gi fe kpaklaa, é a lé maa a fe fɛan zo, a zo.

⁵ ’Ka we kɛlɛ béeramunu vazia wedɔɔle nya; té ka bléyi do kpen sɛrɛ é pla lo.

⁶ Ka dére ’é kɛlɛ é zin yifaama, wɛ ’é kɛlɛ a ma ma, é a lé ka we zi paan mi do do lɛ fɛan zo, kalé a dɔɔle we ma.

Weale voélazan

⁷ Kaa sɔlɛbwe Tisik, yarapawela nyanamapazan, an va nyanama pa béé Mizan gi, é dan an tawe faa fe lɛ ka lɛ.

⁸ Maa a pa zia ka va anbo yuɛ va kalé ko tawe ’male we gi, é valé ka bli dɔralale we gi.

⁹ Yee koo, yarapawelazan Onézim, kaa sɔlɛbwe lé é ke ka va mi do nya bɛ, ’bɛ koo, maa wo paan ka lɛ zia. We faa lé éé kɛla ’ko, wo dan a fe lɛ ka lɛ.

¹⁰ Arisaak lé é ke bokɔn gi an va, é we ka va, é valé Banabas buru be Maak nya. Maa alé we fe ka lɛ, dé é go ka va, ’ka a kun é zima.

¹¹ Jézu lé wa laama Jutus, é we ka va é ziin. Juifi mi bɛ do kpen ’ka Kazambale lé plale mi nwiin lé nyanama pana an va lo, woo mi yaa ’ko lé, yé wo ɛ kɛlɛ an bli dɔralazannu nya.

¹² Épafras lé é ke ka va mi do nya bɛ, é we ka va; é a Jézu Krist wuozan nya, yé é ’ka daanma ka ta gulidanle ma bazorole nya lo léé, ’ka dɔ gligli yé gun ’é si ka ma, yé ’ka ’wuo dɔ Kazambale lé blibɔmawe faa wuo.

¹³ Maa a ma we fé léé, ka lé gibɔrɔ a a ma blɛn. Laodisé Krétiɛnnu valé Iérapolis Krétiɛnnu koo é ziin, wolé gibɔrɔ a a ma blɛn.

¹⁴ Dɔtrɔ gɔné Luk lé é sɔ ka lɛ é baba bɛ, yee valé Démas we ka va.

¹⁵ Ko we Laodisé bwenu valé Nimfa va, é valé léglizigimunu lé woo zén‐é ékeva alé kɔn gi bɛ, wo va.

¹⁶ Dé ka sɛbɛ ’ko ta fe ka va faa, ’ka a pa Laodisé munu lɛ zia yé wo é ta fe ’wolé léglizi gi ma. Yé anlé sɛbɛ lé Laodisé munu é dan a pa lɛ ka lɛ zia bɛ, ’ka ’bɛ é ta fe é ziin ma.

¹⁷ Yé ’ka fé Aasip lɛ léé, ’é yuɛ pa ébo va nyanama lé é a ye Mizan va, alé we ma, a lɛsɔɔle é zima we gi.

¹⁸ Maa Pɔl, an we ka va anbozen bɛ nya. An yerebalenu sele ’é dɔ ka gi ma. Kazambale lé zin ’é vo ka ta ma.