Kolɔs munu 3 - Kazambale lé Sebe Sauunu 1979

¹ Bɛwemalé, dé Bale ka nwa ékeva Jézunu nya gamunu va, ’ka lagi loru fɛnu nagini, fɛana lé Krist ke é nyanale Kazambale bɛyila, ana.

² Ka bli ’é bɔ lagi loru fɛnu ma ma, té ka bli é bɔ tɛrɛlafɛnu ma lo.

³ Naa, ka a é gale, yé kalé vole é yuɛma a é yɔɔle Krist va Kazambale gi.

⁴ Krist lé ke kalé vole é yuɛma nya, dé é da, ka dan da lɛ a va é ziin fua gi.

Dɔbɛ kyɛn valé dɔbɛ dɛrɛ

⁵ Bɛwemalé, we lé ke ka gi tɛrɛlawe nya, ’ka wo yi ga, ’bɛ gi léé, leginile koo, pɛnpɛnnégyɛle koo, bli bɔle fɛ ma koo, bli bɔle weple ma koo, bli bɔle gɔɔli ma lé é ke miyili bɔle nya, ’bɛ koo, ’ka wo yi ga.

⁶ We ’konu lé we ma lé Kazambale bli éé flian tɔnégiplɛplɛzannu ma;

⁷ ka tawo wo zo é vinin, bléyian va lé ka ke wenyané ’konu kɛlɛna, a bléyi va.

⁸ Naa, sin, ’ka sɔn vɔ we ’konu faa ma: bliflile koo, zapale koo, we lɛrɛlɛrɛ kɛlɛle koo, mi sɔnɔle koo, zɛɛn vɔ dérenu koo, ’ka sɔn vɔ wo ma.

⁹ Té ka viéwo ka ke lɛ lo. Blami dɔbɛ valé é kɛlɛwenu ’é si ka lee;

¹⁰ yé mi dɔbɛ dɛrɛ lé éé goo é tavɔɔle nya we dɔɔle gi ’é kɛlɛzan yɛrama bɛ, ’ka ’bɛ si.

¹¹ Grɛki koo, Juifi koo, ganedɔzan koo, ganedɔlozan koo, bwigimunu koo, Site mi koo, luu koo, miné koo, wo ’ka ’ko lo, naa, Krist a fɛ faa nya, yé é a we faa gi.

¹² Bɛwemalé, ’kaa lé Kazambale ka si a va ézé nya, mi sauun valé Bale sɔlɛzannu nya, nyanaizénbli koo, wezin koo, bo kiéné koo, bli drɔɔ koo, bli tiéé koo, ’ka wo zén ka ta bélé sɔ zo ma.

¹³ ’Ka ’wuo dɔ ka ke wuo ma, yé dé wesiawe a mi valé é bɔluzan worona, ’wo wo ke ma we vo ma. Fɛan zo lé Krist ka ma we vo, ’ka ka ke ma we vo a zo é ziin.

¹⁴ Naa, we ’konu ta loru, munu ’é sɔ ka lɛ ma; sɔlɛle a we lɛsɔɔle nya yé é a bélé kyɛsidi lé wa dɔ sɔ la, a zo.

¹⁵ Yé Krist lé vole drɔɔ lé wo ka laa a gi, ka kɛlɛle kɔlɛ do kpen nya we gi bɛ, yee ’é kɛlɛ ka kuunzan nya ka bli gi ma. Yé ’ka kɛlɛ bɔvɔmunu nya ma.

¹⁶ Krist dére ’é kɛlɛ ka méléna di ma. ’Ka we paa ka ke gi yé ’ka we pla ka ke lɛ wedɔɔle faa nya, Bale lé Lɛrɛvɔ sɛbɛ gi lɛrɛnu koo, Bale tɔbɔlɛrɛnu koo, lélilɛrɛnu koo, wo nya; ’ka lɛrɛ vɔ ka bli faa nya Kazambale lɛ zin nya ka bli gi.

¹⁷ Yé dé ka a weowean kɛlɛna, dé é a wefele nyaoo, dé é a we kɛlɛle nyaoo, ’ka wo kɛlɛ Mizan Jézu tɔ nya, Tibale bɔvɔle nya alé we ma.

Dɔbɛ dɛrɛ lé wekɛlɛbɛ munu vazia

¹⁸ ’Kaa gɔné nanu, ’ka pla ka zananu wuo; ’bɛ a é zima Mizan wuolomu zé nya.

¹⁹ ’Kaa le zananu, ka nanu ’é sɔ ka lɛ ma, té ka wo pa bli nyané nya lo ma.

²⁰ ’Kaa nénu, ’ka ti valé ’ka bu lɛdɔma we faa gi ma, naa, ’bɛ a wezin nya Mizan lé we gi.

²¹ ’Kaa né tinu, té ka kalé nénu bli fli lo ma, dé wo fuu é da si wo ta.

²² ’Kaa miwuomunu, kazannu lé wo ke tɛrɛlamunu nya, ’ka wo lɛdɔma we faa gi ma; té é kɛlɛ wo yuɛ va saawo kalé we kɛlɛle néné wo yuɛ gi we ma lo; naa, ’ka a kɛlɛ bli tegele nya, kanale Mizan lee nya.

²³ We faa lé ka kɛla, ’ka kɛlɛ ka bli faa nya, bélé fɛan zo lé ka a kɛlɛna Mizan lɛ, yé ka ’ka a kɛlɛna munu lɛ lo, a zo;

²⁴ ka a gi dɔɔ léé, ka dan tɔnɔ ye lɛ ka ban nya Mizan va. ’Ka kɛlɛ Mizan Krist lé luu nya ma.

²⁵ Naa, mian éé weple kɛla wo dan azé lɛgi pa lɛ alé weple kɛlɛle yɛrama; Kazambale ’ka dɔa mi zuo é leefɛ ma lo.