Kolɔs munu 2 - Kazambale lé Sebe Sauunu 1979

¹ Ka koo, Laodisé munu koo, munu faa lé wo ’ka tan an ye lɛ lo koo, ka ta guli lé maa ke a danna é a blɛn fɛan zo, é sɔ an lɛ léé, ka a dɔɔ.

² É sɔ an lɛ léé, wo é bli ’é dɔrala yé ’wo kɛlɛ mi do nya sɔlɛle gi, yé wo gi ’é kini boenwo Kazambale lé weyɔɔle dɔɔle we gi, ’bɛ gi léé, Krist.

³ Gikinile valé wedɔɔle lé fɛwezannu faa a é yɔɔle yee ɛ gi.

⁴ Maa a we ’ko fena léé, té mi do kpen é ka saan dabli dérenu nya lo we ma.

⁵ Naa, dé maa ’ka ka va looo, an bli a ka va, yé maa a ye léé, we bilibili ’ka ka méléna lo, yé ka bli vo Krist lɛ tegele, amalé an gi nana.

⁶ Ka Jézu Krist si kazan nya, amalé, sin, ’ka tawo a gi;

⁷ ka suni ’é wɔra, ’ka tin a gi blɛn, ’ka dɔ gligli blipale gi, wenu lé wa pla ka lɛ, a yɛrama, yé ’ka Bale bɔ vɔ kiɛre.

Kaa kaa mawenu faa yé Krist gi

⁸ ’Ka yuɛ pa kabozen va, té migi?-?vuruzan do é ka saan élé gikinidérenu lé woo sié gɔnɔlawe valé tɛrɛlawe va, ’té é ’ka sié Krist lé we paale va lo bɛ, wo nya lo.

⁹ Naa, Krist kɔlɛ gi lé Kazambale dɔbɛ bozen lɛsɔɔlenu ke,

¹⁰ yé kalé we faa lɛ a é sɔɔle Krist gi; é a la worona wemaplɛplɛzannu valé fɛ faa lé woo wo lɛdɔama, wo nwiinzan nya.

¹¹ Yé Krist gi lé wo ka gane dɔ, ganedɔle lé mi ’ka a kɛlɛ lɛ mi lɛ lo, a nya, naa, Krist lé ganedɔle lé ke kalé sɔnvɔle ka dɔbɛ kyɛn ma nya.

¹² Wo ka pa ékeva wo nya ka batizéwole nya, yé batizé nya lé ka nwa ékeva wo nya gamunu va, Kazambale lé é Jézu nwa gamunu va, ka bli vole alé plɛplɛ lɛ we ma.

¹³ ’Kaa lé ka ke é gale kalé we sɛrɛlenu valé kalé ganedɔlelo we ma, é ka béli ékeva Jézu nya, ka ma we vole nya kalé we sɛrɛle faa ma;

¹⁴ bélidɔwenu lé wo ke é gyɛle sɛbɛ gi, ’té wo ke kaa ma, we dɔle kaa nwiin we ma bɛ, é wo fwi, yé é wo lɛ ga yiliblan ta.

¹⁵ Yé la worona wemaplɛplɛzannu valé fɛnu faa lé wa lɛdɔama, é wo kele, yé guliwuo vo a lɛ a gale yiliblan ta we ma, yé é wo gyɛ yara nya gɔrɔ la.

’Ka lagi loru fɛnu nagini

¹⁶ Bɛwemalé, té ka nyi si léé, mi do é ka béli dɔ fɛblele koo, fɛminile koo, fɛti lé we koo, moné dɛrɛ lé we koo, flinyi lé we koo, wolé we ma lo.

¹⁷ ’Bɛ a wenu lé wo dan bɔ lɛ, wo furɔ nya, naa, kɔlɛ bozen a Krist nya.

¹⁸ Munu lé ’wobo kɛlɛ kiéné mi yuɛ va, ’té woo lanjenu bɔa, té ’wo kalé za kɛlɛle ma ban so ka lee ’wolé blibɔmawe nya lo. ’Bɛ zo mi é ébo no élé yuɛziwenu lɛ, é fan boblɛn nya é pla é dɔbɛ kyɛn lé gibɔrɔle we ma.

¹⁹ Yé Jézu lé é ke ’wuo nya, é ’ka paan ’bɛ ma lo, dɔlé ’té kɔlɛ faa lé é ke é kunle ékema, ’té é ke é zénle ékema plɛplɛ wɔlɛvɔna é ke ’léénu valé miinnu nya bɛ, ’wuo ma lé éé tin‐é, fɛ tinbɛ lé éé sié Kazambale va, a nya.

²⁰ Dé ka a é gale Krist va tɛrɛlafɛnu vazia, mɛmalé wo ke ka bélidɔna bélé fɛan zo lé ka a é yuɛma tɛrɛlamunu vazia, a zoo?

²¹ Wo lé ka lɛ léé: Té ka a sia lo; té ka a dan ka nɛnɛ ma lo; té ka mane a ma lo.

²² Wa fɛnu lé, dé wo wo si, wo dan nyaa lɛ, wo nya, we ’konu a munu lé bélidɔwenu valé wepaalenu nya.

²³ Wezen lé, we ’konu a munu yuɛ gi bélé wedɔɔle zo; woo Bale bɔa ’wobo lé plɛplɛ nya, woo ’wobo kɛla kiéné, woo nyané paan ’wobo kɔlɛ ta, azama. Naa, we ’konu tɔnɔ ’ka lo, wo sɔ mi dɔbɛ kyɛn lɛ é pla.