Kolɔs munu 1 - Kazambale lé Sebe Sauunu 1979

Weale lé

¹ Maa Pɔl lé an ke Jézu Krist lé nwunvɔzan nya Kazambale lé blibɔmale nya, maa valé bwe Timoté, ko ɛ ke sɛbɛ ’ko gyɛna ka lɛ.

² ’Kaa Kazambale lé munu lé ka ke yarapawela bwenu nya Krist gi Kolɔs, ko we ka va; kaa Ti Bale ’é zin kɛlɛ ka lɛ yé ’é ka vo drɔɔ ma.

Pɔl éé bazoroan wolé we ma

³ Ko Kazambale, Kaazan Jézu Krist Ti, bɔ vɔa, ’té ko ’ka daanma bazorole ma kalé we ma lo;

⁴ ko a ’ma léé, ka bli vo Jézu lɛ yé Kazambale lé munu faa va sɔlɛle a ka gi, azama.

⁵ Fɛ lé a ta ke é dɔle kazé nya la gi, ka bli a ’bɛ lɛ, bɛwemalé ka bli a é pale yé sɔlɛle a ka gi. Bli vole we lɛ ’ko, ka a dɔɔ, webozen dére lé ka a ’ma é kyɛn, ’bɛ a gɔɔn ka lɛ, ’bɛ gi léé, Wenéné a gɔɔn ka lɛ.

⁶ Wenéné ’ko, é bɔ ka va, é a tɛrɛ la fɛfaana, ’té a tɔnɔ éé kɛla a ma yé ’té a gi éé gya bélé fɛan zo lé é a kɛlɛna ka va, a zo. É sia yian nya lé ka Kazambale lé zin lé we ’ma yé ka a dɔɔ webozen nya, a yi ma, we ’konu a nyanama pana ka va.

⁷ Épafras lé é ke ko sɔlɛbéé nya nyanama ’ko gi, ’té é ke yarapawelazan nya Krist lé nyanama pana ka lɛ, yee ɛ we ’ko gɔɔn ka lɛ.

⁸ Yé sɔlɛle lé Kazambale Léli a pa ka bli gi, Épafras a zuo fe ko lɛ.

⁹ Bɛwemalé, é sia yian nya lé ko ka tawe ’ma, ko ’ka daanma bazorole ma Kazambale lɛ ka tɔ ma lo; ’té ko a laan Bale lee léé, ’é we dɔɔle faa nɔ ka lɛ yé ’é ka gi kini léliwenu gi, yé ’bɛ zo lé ka alé blibɔmawe dɔɔ,

¹⁰ yé dé ka a dɔɔ yé ka tawo Mizan lé tawobɛ yɛrama yé kalé we ’é sɔ a lɛ bɛ faa ma. Ko a laan a lee é ziin léé, ’é tɔnɔ ye ka ma we zin gɔnɔ faa kɛlɛle nya yé ’ka kɛlɛ segele Kazambale dɔɔle gi;

¹¹ yé ’ka dɔ plɛplɛ we faa gi alé plɛplɛ tɔbɔle nya, yé ’ka kɛlɛ yifaama yarapawelazannu valé bli tiéézannu nya, ’té ka gi éé nanaan.

¹² Ti lé é ka ma’lɛrɛ yé ka kazé tɔnɔ ye Kazambale lé munu va fɛna fu va, ’ka a bɔ vɔ ma.

Kazambale a é fanle

¹³ É kaa si gunuti lé plɛplɛ wuo, yé é kaa pla é sɔlɛbe wuo.

¹⁴ A Be kaa tabo, ’bɛ gi léé, Bale kaa ma we vo kaalé wenyanénu ma.

¹⁵ Jézu valé Bale lé, mi ’ka a yé lo, wo bɔ ékema, yé yee ɛ ke Bale kɛlɛfɛnu faa va né vinin nya.

¹⁶ Naa, fɛnu faa lé wa kɛlɛ la gi valé tɛrɛ la bɛ, Jézu gi lé wa kɛlɛ, fɛnu lé wa yé koo, fɛnu lé wo ’ka wo yé lo koo, webleblinnu koo, tɔmunu koo, wemaplɛplɛzannu koo, fɛ lé wa lɛdɔama koo, woo lé. Yee ɛ wo faa kɛlɛ yé wa kɛlɛ yee ɛzé nya.

¹⁷ É a fɛ faa ’lɛ, yé alé we ma lé fɛ faa a é kunle ékema.

¹⁸ Léglizi lé ke a kɔlɛ nya, é a ’bɛ ’wuo nya. É a we pélisiana nya, é a gamunu va nwazan vininzan nya, a kɛlɛle mi vininzan nya we faa gi we ma.

¹⁹ Bale dɔbɛ faa lɛ a é sɔɔle Jézu gi; é sɔ Kazambale lɛ léé, é kɛlɛ a zo, amalé é kɛlɛ.

²⁰ É sɔ Kazambale lɛ é ziin léé, ’yee valé munu faa ’é zén ékeva, yé Jézu nyɛ lé é zana yiliblan ta, yé ’wo nana ’bɛ ta, dé wa tɛrɛ laoo, dé wa lagioo, ’té yee lé.

²¹ É vinin, ka gi bɔrɔlenu valé ka kɛlɛwe naanénu ka kɛlɛ bɛn valé Kazambale nyanézannu nya.

²² Naa, sin, é ka nana ’é va Krist lé tɛrɛlakɔlɛ gale we ma, léé, ’é da ka nya ’é va mi sauunnu nya, ’té we do kpen ’ka ka ma lo, ’té gun ’ka ka ma lo;

²³ ’té dé ka suni wɔra yé ka tin blɛɛn blipale gi, yé we lé ka bli ke a lɛ Wenéné lé ka a ’ma, alé we ma, ’té ka bli ’ka sié ’bɛ lɛ monomono lo. Wenéné ’ko, wa fe tɛrɛlamunu faa lɛ, yé maa Pɔl, maa kɛlɛ a gi nyanamapazan nya.

Nyanama lé Pɔl a paan léglizigimunu lɛ

²⁴ Kle lé maa a blena kalé we ma, éé an gi nanaan. Krist kɔlɛ lé ke léglizigimunu nya, a ma kleblele lé wo vo, maa a a lɛ sɔɔna an kɔlɛ nya.

²⁵ An kɛlɛ léglizi wuozan nya, we lé Kazambale a bɛ pa an lee kazé nya, a we ma; é léé, maa Kazambale dére faa fe ka lɛ.

²⁶ We lé é ke é yɔɔle lɛɛfaama, migɔnɔ faa ma, Bale a bɔra a gi sin élé munu lɛ.

²⁷ Weyɔɔle ’ko a we tɔbɔle blɛɛn nya bɛnnu faa méléna fɛan zo, é sɔ Kazambale lɛ léé, ’é a gɔɔn élé munu lɛ. Yee weyɔɔle lé ke ’ko: Krist a ka gi, amalé ka bli a a lɛ léé, kazé a Bale lé fua tɔbɔle va.

²⁸ Krist ’ko, alé we lé ko fé, ’té ko we plaan mi faa lɛ, ’té ko wedɔɔwe faa paan mi faa gi, léé, dé ko go wo nya Bale va ’té gun a é sile wo ma Jézu Krist lé we ma.

²⁹ We ’ko ma lé maa nyanama paan, guli boen nya, Krist lé plɛplɛ lé é ke nyanama pana an gi plɛplɛ, a nya.