Bale Lé We Gifezan 9 - Kazambale lé Sebe Sauunu 1979

¹ Iin, an ’bɛ faa bɔrɔ an bɔn‐in, maa wo faa va gini, yé maa ye léé, mi tegelenu valé wedɔɔmunu koo, wo panyanamanu koo, wo faa a Kazambale lee; sɔlɛle valé zapale koo é ziin; blaminu ’ka we do dɔɔa a gi lo; wo fiénu ana.

² We faa éé bɔa mi faa ma; we lé éé bɔa mi tegele ma, yee ɛ bɔa mi nyané ma; mi zin gibɔle valé mi tiridɔle zé a do; sarakabozan valé mi lé é ’ka saraka boo lo, wozé a do; wa kɛla mi zin lɛ fɛan zo, a zo lé wa kɛla wenyanékɛlɛzan lɛ; mi lé éé bɛ nwaan we gi, woo we kɛla a lɛ bélé mi lé éé kanaan é bɛ nwale ma, azé zo.

³ Wenu lé wa kɛla tɛrɛ la, wo va wenaané do lé ke ’ko: yee lé ke léé, mi faa zé bɔ ékema; é ziin, blaminu bli a é fanle wenyané nya, yé ’tugyɛwe a wo bli gi wolé tɛrɛla bléyi faa va; ’bɛ zuo, yé wo go gamunu va. Naa, de ɛ ’ka go loo?

⁴ Mi yuɛmalenu faa bli a we lɛ; blén yuɛmale mini boenwo golizra gale lɛ.

⁵ Mi yuɛmalenu we do dɔɔ, yee lé ke léé, wo dan ga lɛ; naa, migalenu ’ka we do kpen dɔɔa lo; yé wo ban ’ka é dɛrɛ lo, wo sele saan munu gi, azama.

⁶ Wolé sɔlɛle koo, wolé zapale koo, wolé bli bɔle fɛ ma koo, wo faa nyaa kwakwa; yé we faa lé éé kɛla tɛrɛ la, wozé do kpen ’ka a va é dɛrɛ lo.

⁷ ’I go, ’ilé fɛ ble ginanale nya, ’ilé nwɛ mini ginanale nya; naa, Kazambale i kɛlɛwe nyi si é kyɛn.

⁸ ’I sɔ fu zén i ta yifaama, ’i nyɔnɔ gié i nwun ma yifaama.

⁹ Lezan lé é sɔ i lɛ, i gi ’é nana a va, ilé tɛrɛlayinu lé woo giéan é kele, ’té Kazambale a nɔ i lɛ bɛ, wo faa gi, ilé boayinu faa gi; naa, ilé nyanama tɔnɔ lé Bale a nɔ i lɛ ilé tɛrɛlabléyi va, yee lé ke bɛ.

¹⁰ Nyanama faa lé i wo yé, ’i wo pa ilé plɛplɛ nya; naa, i a gona fɛana, migalenu nyanana bɛ, wekɛlɛle koo, ’wuo gi bɔrɔle koo, gikinile koo, wedɔɔle koo, wo ’ka ana lo.

¹¹ Maa ye é ziin tɛrɛ la léé, vlanburuzan baba ’ka bɔraan é vinin vlan za kɛlɛna lo; yé guliwuo ’ka vo nyanazan lɛ lo; wedɔɔzannu ’ka fɛblele yé lo, yé gikinizannu ’ka fua blé lo, yé ’wuoatazan ’ka wezin yé lo; ’bɛ faa éé sié azé bléyi valé a ziwenu va.

¹² Blami ’ka ézé bléyi dɔɔa lo, é a bélé pɔnu lé woo wo gya séli nya, wo zo, bélé mianénu lé woo wo kunwo san nya, wo zo; blami kunséli a wenaané nya, bélé wo kunséli zo, ’té dé é bɔra wo ma fiaa bléyian va.

Wedɔɔle valé tavowe ma gibɔrɔlenu

¹³ Maa wedɔɔwe do ye tɛrɛ la é ziin, yé é a an yuɛ gi blɛn.

¹⁴ Flané kiéné do ana, yé a tamunu ’ka kiɛre lo; minwiinzan blɛn plɛplɛ do nwa a ma, yé é nyana a ma, yé é tɛrɛzun blɛnnu dɔ a ma.

¹⁵ Nyanégyɛzan do lé é we dɔɔ, é a yee fla ’ko ta, yé é fla ’ko so we lee élé wedɔɔle nya. Yé yee nyanégyɛzan sele ’ka dɔ lɛ mi do kpen gi lo.

¹⁶ Yé maa léé: Wedɔɔle fila vɔ é mini plɛplɛ lɛ. Duowo, woo serele boo nyanégyɛzan lé wedɔɔle ma, yé wo ’ka ’wo tɔné dɔa a dére lɛ lo.

¹⁷ Dé mi é tɔné dɔ fleee wedɔɔzan dére lɛ, ’bɛ fila vɔ é mini tɔné dɔle ’tugyɛzannu nwiinzan siaadérenu lɛ.

¹⁸ Wedɔɔle fila vɔ é mini gulidanfɛnu ta; naa, wenyanékɛlɛzan do éé wezin kiɛre sɛra.