Bale Lé We Gifezan 8 - Kazambale lé Sebe Sauunu 1979

¹ De ɛ ke bélé wedɔɔzan zo, yé de ɛ bɔa we gi fele lɛ a zoo? Wedɔɔle éé wedɔɔzan yara soian, yé a yara nwɛnnwɛnné gyɛle éé sié.

Minwiinzan blɛn lɛdɔmale

² Maa lé i lɛ léé, ’i minwiinzan blɛn dére tawe kɛlɛ, i bale kun a we ma, azama.

³ Té ibo tunu léé, i si a ma baa lo, yé té i yara pa wenaané kɛlɛle ta lo; naa, we faa lé é sɔ a lɛ, é bɔa a kɛlɛle lɛ, azama.

⁴ Minwiinzan blɛn dére a plɛplɛ, yé de ɛ dan a fe lɛ a lɛ léé, i a mɛ kɛlɛnaa?

⁵ Mi lé éé bélidɔwe ta tawoo, é ’ka wenaané gi dɔɔa lo, naa, wedɔɔzan éé bléyinu valé weblele dɔɔa é bli gi.

⁶ Naa, fɛ faa zé bléyi a, yé weblebléyi a, ’té dé we tɔntɔn mi zi lɛ sɔɔ.

⁷ Naa, we lé é dan bɔ lɛ, é ’ka a dɔɔa lo, yé é dan bɔ lɛ fɛan zo, de ɛ dan ’bɛ fe lɛ a lɛɛ?

⁸ Blami flinle ’ka ébo lee yé é a tadɔ lo, yé é ’ka é gayi fé lo; mi do kpen ’ka bɔa sole lɛ guli ’ko gi lo, yé wenyané ’ka bɔa é kɛlɛzan sile lɛ we gi lo.

Mi nyané valé mi zin

⁹ Maa we ’konu faa ye, yé we faa lé wo bɔ tɛrɛ la, an gi bɔrɔ wo ma an bli faa nya. Bléyi ke nya, blami éé plaan blami nwiin, a kɛlɛle wenaanébɔmazan nya we ma.

¹⁰ Yé maa a ye léé, mi nyanénu ’wozé pana ye yé wo bɔ ’wo flinna, yé wo lé woo we drɔle kɛla, wo fɛna sauun na gole yi ga wo lee, yé flamunu gi san wo ma. ’Bɛ a é ziin boawe nya.

¹¹ Wo ’ka we lɛdɔa mi gi é kele élé wenyané ma lo, amalé blami bli bɔ wenaané saa kɛlɛle ma.

¹² Duowo, dé wenyanékɛlɛzan wenaané kɛlɛ gɔnɔ yɔ soru, yé é mɔn a kɛlɛnaoo, maa gi dɔɔ é ziin léé, munu lé woo kanaan Kazambale lee, wezin a wozé nya; woo kanaan a lee, azama.

¹³ Naa, wezin ’ka mi nyané zé nya lo, yé é ’ka mɔn‐o tɛrɛ la yé é mini furɔ lɛ lo; Kazambale lee kana ’ka a gi lo, azama.

¹⁴ Boawe do a tɛrɛ la; yee lé ke léé, mi tegelenu ana, ’té we éé bɔa wo ma mi nyanénu kɛlɛwe yɛrama, yé mi nyanénu ana, ’té we éé bɔa wo ma mi tegelenu kɛlɛwe yɛrama. Maa léé, ’bɛ a boawe do nya é ziin.

¹⁵ Amalé an ginanale tɔ bɔ, naa, fɛblele koo, fɛ minile koo, ginanale koo, ’bɛ saa ɛ ke wezin nya blami zé nya tɛrɛ la, azama; fɛnu lé é a yé élé nyanama mafɛ nya alé tɛrɛlayinu lé Kazambale a nɔ a lɛ, wo gi, wo lé ke bɛ.

^16-17 Dé maa kwa kuli an bli faa nya léé, maa we dɔɔ, yé an gi bɔrɔ wenu lé woo kɛla tɛrɛ la, wo ma, maa a ye léé, blami ’ka bɔa Kazambale kɛlɛwe do kpen gi fele lɛ lo, dé é yi kele é yuɛ ma é béli valé é yiéyioo, é ’ka bɔalɛ lo; dé ébo wɔlɛgi nyaa é maoo, é ’ka a gi maan lo; dé é sɔ wedɔɔzan lɛ boenwo léé, é a dɔɔoo, é ’ka bɔa a dɔɔle lɛ lo.