Bale Lé We Gifezan 7 - Kazambale lé Sebe Sauunu 1979

Mi lé tɛrɛla dɔbɛ a fɛan zo

¹ Tɔ zin fila vɔ é mini lasikɔrɔ gin néné ta, yé mi gayi fila vɔ é mini a yaayi ta.

² Gole gyɛbo kɔn gi fila vɔ é mini gole fɛtikɛlɛkɔn gi lɛ, naa, gyɛbokɔn lé ke mi faa zé ’wuoplana nya, azama, yé mi yuɛmalenu woo gi bɔrɔan a ma.

³ Gibɔrɔpale fila vɔ é mini yérisile lɛ; naa, dé mi yara kyɛ a, a gi é bɔalɛ é nana.

⁴ Wedɔɔzannu bli éé bɔa gyɛbokɔn ma, yé ’tugyɛzannu bli éé bɔa fɛtikɛlɛkɔn ma.

⁵ Dé i tɔné dɔ wedɔɔzan lé weplale lɛ, ’bɛ fila vɔ é mini tɔné dɔle ’tugyɛzannu lé lɛrɛvɔle lɛ.

⁶ Naa, fɛan zo lé mane lé zɛzɛyili vun éé wé kyɛ va gunikoro gi, a zo lé ’tugyɛzannu lé yérisile ke. ’Bɛ a boawe nya é ziin.

⁷ Yaale mi ta éé wedɔɔzan kinin‐é ’tugyɛzan nya, yé blɛfɛnu éé mi ’wuo sɛra.

⁸ We do ’wuoplana fila vɔ é mini a pélisiana ta; bli tiéé fila vɔ é mini boblɛn ta.

⁹ Té i bli é fli é kele lo, naa, bliflile nyanana lé ke ’tugyɛzannu bli nya.

¹⁰ Té bé fe léé, é kɛlɛ kaa yé yinu lé wo gié, wo fila vɔ é mini yi ’konu taa? lo. Naa, wedɔɔle nya‐an i we ’ko laa lo.

¹¹ Wedɔɔle a é zima bélé zarafɛ zo, é mini boenwo a ta mi yuɛmalenu lɛ.

¹² Mi éé yɔɔan wedɔɔle gi, fɛan zo lé woo yɔɔan gɔɔli gi, a zo. Naa, ’wuoatawe zé lé é mini, yee lé ke léé, dé mi we dɔɔ, éé voo é yuɛma ’bɛ ma.

¹³ ’I Bale panyanama nagini do; fɛ lé é a plin, de ɛ bɔa a drɔle lɛɛ?

¹⁴ I gi ’é nana zinyeyi nya ma, yé dé we tɔntɔnyi bɔ, ’i gi bɔrɔ; Kazambale wo fiénu kɛlɛ, léé, we lé é dan bɔ lɛ blami pa gi, té ’é a gi dɔɔ lo.

¹⁵ An ’bɛ faa ye anlé boayinu la. Mi tegele ke ana, ’té woo zamaga woo wolé we tegele kɛlɛna, yé mi nyané ke ana, ’té woo mɔn‐o wolé wenyané kɛlɛle gi.

¹⁶ Té i kɛlɛ tegele yé é gié é glɛ la lo, té ibo nagɔɔn wedɔɔzan baba nya lo; mɛmalé é a lé ibo sɛrɛɛ?

¹⁷ Té i kɛlɛ nyané é baba lo, té ’tu i gyɛ lo; mɛmalé é a lé i ga izé bléyi ’lɛɛ?

¹⁸ ’I vo a do kɛlɛna, yé té i yuɛi blan a koɛ kɛlɛle ma lo; naa, mi lé éé kanaan Kazambale lee, é ’ka we ’konu kɛla yé é gié é glɛ la lo.

¹⁹ Wedɔɔle éé wedɔɔzan dɔa plɛplɛ é mini fla yuɛlɛzan vu lɛ.

²⁰ Weboen nya, mi tegele lé éé wezin kɛla, té é ’ka wenyané kɛla pelo, ’bɛzan ’ka tɛrɛ la lo.

²¹ Té i tɔné dɔ we faa lɛ lo, dé i da a ’ma yi do nya léé, i leezan bale pa i ma;

²² bé gi dɔɔ é zima léé, gɔnɔ ke nya biibozen bale pa mi bɛnu ma.

²³ An we ’konu faa gi dan wedɔɔle nya. Maa léé: An dan kɛlɛ lɛ wedɔɔzan nya. Yé wedɔɔle vo an ’lɛ baa.

²⁴ We lé ke baa, ’té a guru ke, de ɛ bɔa a wɔlɛ maa?

²⁵ An kwa kuli an bli faa nya léé, an wedɔɔle gini, maa a dɔɔ, yé maa bɔ a wɔlɛ ma, ’bɛ valé wean ma lé wenu éé kɛla, a nya. Yé an kwa kuli é ziin léé, maa wenyanékɛlɛzan lé ’tugyɛwe dɔɔ, yé an ’wuosɛrɛzan lé gwɛmawe dɔɔ.

²⁶ Yé le lé a bli ke mikunsan valé séli nya, ’té a bɛnu a miyerebale nya, maa a ye léé, a nyanale mini ga lɛ; mi lé éé sɔa Kazambale lɛ, ’bɛzan éé soo a lee, naa, éé wenyanékɛlɛzan kunwo.

²⁷ Bale lé we gifezan léma: Maa a wenu va ginina do do, wo gi ’male we ma, yé we lé maa a ye, yee lé ke bɛ;

²⁸ maa a tan kwa kulina a ma, yé maa ’ka a yena lo. Maa mi tegele ye gɔné wuru soru va do kpen, naa, maa ’ka a do kpen ye lɛ lomu faa va lo.

²⁹ Naa, we lé maa ye, yee lé ke léé, Kazambale munu kɛlɛ tegele, naa, wobozen zi bɛ kiɛre sia.