Bale Lé We Gifezan 5 - Kazambale lé Sebe Sauunu 1979

Té i we fe é kele lo

¹ Té i we fe é kele lo, yé té i bligiwe do fe Kazambale lɛ é kele lo; naa, Kazambale a la gi, yé bii a tɛrɛ la; amalé i dére ’é kɛlɛ sɛ.

² Naa, nyɛgyɛle éé sié ’wuo gi kiɛre bɔrɔle va fɛan zo bɛ, a zo duo lé ’tugyɛwe éé sié dére kiɛre fele va.

³ Dé i Kazambale kun we do gi, té i mɔn a giwe kɛlɛna lo, naa, ’tugyɛzannu ’ka sɔa a lɛ lo, azama; balekundére lé bé fe, bé lɛ sɔɔ.

⁴ Dé i bale kun do yé i ’ka a giwe kɛla lo, a fila vɔ léé, té i bale kun lo.

⁵ Té bé nyi si léé, i lɔlu é i kɛlɛ wenyanékɛlɛzan nya lo, té bé fe Bale lé nwunvɔzan yuɛ va léé, maa ’ka a kɛlɛ lɛ anbo yuɛ va lo lo. Mɛmalé é a lé Kazambale bli é fli i dérenu ma, yé é i bɛ panyanama sɛrɛɛ?

⁶ Naa, dé boawe a nyɛgyɛle kiɛre gi, ’té boawe a dére kiɛre fele gi é ziin; amalé ’i kana Kazambale lee.

Mi lé tɛrɛla a boawe nya

⁷ Dé bé ye léé, tɛrɛ do la woo yaan nyanégyɛzannu ta, ’té woo mi lé se sié é lee, ’té woo weblele gi sɛra, té ’bɛ i gi vuru lo; naa, mi blɛn a é plale mi lé ’bɛ mini a lɛ, ’bɛ wuo, yé mi lé ’bɛ mini wo fiénu lɛ, wa é plale ’bɛzan wuo é ziin.

⁸ Dé tɛrɛ do la munu ’wo nwiinzan tɔ bɔa, ’bɛ tɛrɛ ’ko la wenu nyian é wo bɛ faa ma.

⁹ Mi lé gɔɔli éé sɔa a lɛ, é ’ka kaan gɔɔli nya lo, yé mi lé fuafɛnu éé sɔa a lɛ, é ’ka a gi tɔnɔ yé lo. ’Bɛ a é ziin boawe nya.

¹⁰ Dé mi lé zin a kiɛre, ’té a blemunu a kiɛre; dé é ’ka a yuɛ dɔle a ma nya lo ’naan, mɛ tɔnɔ bɛ lé azan a yé a maa?

¹¹ Nyanamapazan éé yi gya drɔɔ, dé é fɛ sɛ bleoo, dé é fɛ kiɛre bleoo, yee lé; naa, fuablezan kanle zi, é ’ka bɔa yigyɛle lɛ lo.

¹² Maa we tɔntɔn blɛn do ye tɛrɛ la: fuafɛnu lé wozan éé wo tadɔa, wenaané kɛlɛle ébo lɛ we gi, yee lé.

¹³ Dé naanaawe do bɔ tɔɔn, ’té alé fɛ faa san; é né do yaa gɔné nya, yé we do kpen ’ka vo lɛ a lee lo.

¹⁴ É si é bu bɔn gi é porole fɛan zo, a zo duo lé é dan go lɛ é ziin, é ’ka we do kpen sié yé é goan é lee élé nyanama mafɛ nya lo.

¹⁵ We tɔntɔn do lé ke bɛ é ziin. É go, fɛan zo lé é da, a zo. Yé nyanama lé é a pa gwɛ ma bɛ, a tɔnɔ lé ke mɛ fɛ nyaa?

¹⁶ ’Bɛ ta loru élé tɛrɛla sɛrɛ blikyɛdɔle nya, ’té gibɔrɔ kiɛre a a ma, ’té wenaané kiɛre éé bɔa a ma, ’té we kiɛre éé ’naan a ma.

¹⁷ We lé maa a ye, yee lé ke ’ko: we lé ke é zin, ’té é ke é nɔnɔmi blami zé nya, yee lé ke léé, ’é fɛ ble, ’é fɛ mini, a gi ’é nana nyanama lé é a pa tɛrɛ la, a mafɛ zinnu ma, yinu lé Kazambale a nɔ a lɛ tɛrɛ la, wo gi; azé lé ke bɛ.

¹⁸ Naa, dé Kazambale fuafɛnu valé fɛ zinnu nɔ mi do lɛ, dé é a se kɛlɛ a lɛ léé, ’é a ble, ’ézé si a va, yé a gi ’é nana élé nyanama mafɛ ma, ’té Bale blɛ kɛlɛ a lɛ é wo.

¹⁹ Kazambale a gi nana kiɛre, amalé é ’ka é gi bɔrɔan é yinu ma lo.