Bale Lé We Gifezan 4 - Kazambale lé Sebe Sauunu 1979

¹ ’Bɛ zuo kle faa lé wa pana munu ta tɛrɛ la, an gi bɔrɔ ’bɛ ma; kleblezannu a wuvɔna, yé mi do kpen ’ka wo tɔrɔ paan lo; wa ’wo ta klepazannu lé glawe kɛlɛmafɛ nya, yé mi do kpen ’ka wo tɔrɔ paan lo.

² Yé maa a ye léé, gamunu lé wo ga, wozé a néné é mini mi yuɛmalenu lé wo ke é yuɛma, wozé ta.

³ Yé mi lé é ’ka tan bɔra lɛ yé é wenaanénu ye bɔna tɛrɛ la lo, azé néné mini migalenu valé mi yuɛmalenu zé ta.

⁴ Maa a ye léé, nyanama faa valé blabole faa a blami lé maawole nya é wo é bɔluzan ma. ’Bɛ a é ziin boawe valé fuzuobinwe nya.

⁵ ’Tugyɛzan éé bɛ vɔa é ke la, ’té é ébo sɛra.

⁶ Dé i bɛ do fan, ’té i a drɔɔ, ’bɛ fila vɔ é mini i bɛ fié fanle nyanama valé we pla kɛlɛle nya ta.

⁷ An gi bɔrɔ tɛrɛla boawe do ma é ziin.

⁸ Mi do a é do, ’té a lele do kpen ’ka lo; a be ’ka lo, yé a bwe ’ka lo, duowo alé nyanama ’ka nyaan lo, yé fuafɛnu ’ka a kaan lo. De lɛ lé an ke nyanama pana, yé an gi nanale nyané kɛla anboen lɛɛ? ’Bɛ a é ziin boawe valé wenaané nya.

⁹ Mi fié fila vɔ é mini mi do la, wo dan wolé nyanama maban ye lɛ, azama.

¹⁰ Naa, dé a do dia, a bɔluzan a nwaan; naa, dé mi a é do, dé é dia yé é ’ka mi do yé yé ’bɛ a nwa lo, ’té nyanainya we lé.

¹¹ A zo duo lé, dé mi fié yia ékeva, dunu éé sié wo ma; naa, dé mi éé yiaan é do ’naan, dunu éé sié a ma kaa?

¹² Yé dé mi do plɛplɛ mini wo vazan do lɛ, wo mi fié woo bɔa a kelele lɛ; naa, bawɔrɔ yaa lé wa tan, é ’ka kinié é pu lo.

¹³ Nyanégyɛ pɛniɛ lé é we dɔɔ, a fila vɔ é mini minwiinzan blɛn lé ke gɔné segele nya, ’té ’tu a gyɛ, ’té é ’ka weplale ’é lɛ nyi sié é dɛrɛ lo bɛ, a lɛ;

¹⁴ dé é si bokɔn gioo, dé wa yaa nyanégyɛzan nya élé tɛrɛ laoo, é bɔalɛ é pla munu nwiin.

¹⁵ Maa a ye léé, miyuɛmalenu faa lé woo tawoo tɛrɛ ’ko la, woo dirian pɛniɛ lé é dan pla lɛ mi nwiin minwiinzan blɛn pa gi bɛ, a zi.

¹⁶ Munu ’ko lé é pla wo nwiin, wo nɔnɔ ’léé ’ka lo. Duowo, dé wo pagizannu nwa, ’bɛnu gi ’ka nanaan yee minwiinzan blɛn ’ko lé we ma lo. Naa, ’bɛ a é ziin boawe valé we pla nya.

¹⁷ Dé i a gona Kazambale lé kɔn gi, ’i yuɛ pa ilé tawogane va; ’i bié tɔné dɔle we ma, té i ’tugyɛzannu bosaraka bo lo; naa, wo ’ka a gi dɔɔa léé, wa wenaané kɛlɛna lo.