Bale Lé We Gifezan 2 - Kazambale lé Sebe Sauunu 1979

¹ Maa lé an bli gi léé: ’Wo go, ko ginanale gi dan, ko we zin lɛdan, yé bé ye, ’bɛ a boawe nya é ziin.

² Maa yérisile laa, ’tugyɛwe, yé maa lé ginanale ma léé, ’bɛ tɔnɔ lé ke mɛ nyaa?

³ Maa lé an bli gi léé, anbo nɔ dɔrɔ minile lɛ, dɔlé ’té an bli a gona an nya wedɔɔle vazia, yé maa léé, an dan tavowe kɛlɛ lɛ, fɔɔ yé we lé ke é zin blaminu zé nya, ’té é a lé wa kɛlɛ tɛrɛ ’ko la wolé tɛrɛlayinu gi, yé maa ye.

⁴ An nyanama blɛnblɛnnu pa; an kɔnnu dɔ anzé nya; anlé dɔrɔféinu pa;

⁵ anlé zianféinu valé porobaayilinu féi pa, yé an porobaayili gɔnɔ faa suru ana;

⁶ anlé ’yidoonu kɛlɛ, a zénle pɔrɔ ta yé yilinu ’é tin ana we gi.

⁷ An luugɔnénu valé luudanu lɔ, yé wo né yaa anlé kɔn gi; anlé diri valé anlé ’blanu a kiɛre é mini munu faa lé wo ke an ’lɛ é vinin Jérusalɛm, wozé ta.

⁸ Gɔɔlifu valé kyan koo, minwiinzannu lé fuafɛnu valé wolé tɛrɛlafuafɛnu koo, maa wo téé anbo lɛ. An lɛrɛvɔgɔnénu valé lɛrɛvɔlomu si anzé nya; maa blami ginanamafɛnu valé lomu kiɛre si anzé nya.

⁹ An kɛlɛ blɛn, an blɛn mini munu faa lé wo ke an ’lɛ Jérusalɛm, wo ta. Yé anlé wedɔɔle vo an va.

¹⁰ Fɛ faa lé an yuɛ bɔ wo ma, wo ’ka vuru lɛ an ma lo; maa ’ka ginanale do kpen nyané kɛlɛ lɛ an bli lɛ lo; naa, an panyanama faa sɔ an bli lɛ, yé ’bɛ ɛ ke anlé tɔnɔ nya.

¹¹ ’Bɛ zuo, nyanamanu lé maa a pa, ’bɛ valé kwa faa lé maa kuli wo lɛsɔɔle we ma, an gi bɔrɔ ’bɛ ma, yé bé ye, ’bɛ faa a boawe valé fuzuobinwe nya, yé we faa lé wa kɛla tɛrɛ ’ko la, tɔnɔ do kpen ’ka a ma lo.

¹² Yé an nɔla wedɔɔle koo, tavowe valé ’tugyɛwe koo, wo vazia. Naa, minwiinzan blɛn pagizan, é dan mɛ we kɛlɛ lɛɛ? We lé wa kɛlɛ é kyɛn, yee lé.

¹³ Yé maa ye léé, wedɔɔle mini ’tugyɛwe ta, bélé fɛnafu mini gunuti ta fɛan zo, a zo;

¹⁴ wedɔɔzan yuɛ a é fuole, yé ’tugyɛzan éé tawoo gunuti va. Yé maa ye é ziin léé, wo fiénu ’wuoplana a do.

¹⁵ Yé maa lé an bli gi léé, maa valé ’tugyɛzan zé ’wuoplana a do, ’té mɛmalé an kwa kuli léé an we taa dɔɔan? Yé maa lé an bli gi léé, ’bɛ a é ziin boawe do nya.

¹⁶ Naa, wedɔɔzan sele ’ka vo mi gi yé é mini tavozan zé la lo; dé wo si ana tɔɔn, munu gi éé saan wo ma. Wedɔɔzan éé gaan bélé tavozan zo. ’Té mɛ fɛ léé?

¹⁷ Naa, we faa lé wa kɛla tɛrɛ ’ko la, é ’ka sɔa an lɛ lo, a faa a boawe valé fuzuobinwe nya, amalé maa vole é yuɛma za pa.

¹⁸ Nyanama faa lé maa a pa tɛrɛ la, ’té wo dan vo lɛ an pagizan lee, yé a gi é nana wo ma bɛ, maa wo za pa.

¹⁹ Dé an pagizan éé kɛla wedɔɔzan nyaa? ɛɛ, dé éé kɛla tavozan nyaa? de ɛ ’bɛ gi dɔɔ? Duowo, an panyanama faa valé anlé wedɔɔle tɔnɔ faa lé ke tɛrɛ ’ko la ’ko, é dan kɛlɛ lɛ wozan nya. Yé ’bɛ a é ziin boawe do nya.

²⁰ Yé nyanama faa lé maa a pa tɛrɛ la, an bli si a lɛ.

²¹ Naa, mi do nyanama pa wedɔɔle valé gikinile nya, yé a nyian wo a lɛ, yé é élé nyanama ’ko mafɛ vo, mi do lé ’bɛ ’ka a ma nyanama do kpen pa lɛ lo, ’bɛ lɛ. ’Bɛ a é ziin boawe valé wenaané blɛn nya.

²² Nyanama faa lé mi a paan, é valé wenu faa lé wa bli faan, ’té wa wɔlɛgi nyaa a ma tɛrɛ la, wo tɔnɔ kpai lé ke mɛ fɛ nyaa?

²³ Élé yinu faa gié nyanéblele saa nya, yé azé a gibɔrɔpale saa nya; é bélioo, é ’ka vo drɔɔ é bli gi lo. ’Bɛ a é ziin boawe nya.

²⁴ We lé ke é zin blami zé nya, yee lé ke léé, ’é fɛ ble, ’é fɛ mini, a gi ’é nana fɛ zinnu ma alé nyanamapa bléyi va; maa ye léé, ’bɛ é ziin, ’bɛ éé sié Kazambale va.

²⁵ Dé é ’ka maa nya lo, de boen ɛ fɛ blé, ’té a gi éé nanaan?

²⁶ Naa, mi lé é sɔ Bale lɛ, a lɛ lé, éé wedɔɔle koo, gikinile koo, ginanale koo, wo no; naa, éé a kɛla léé, wenyanékɛlɛzan é fɛ ye, ’té éé a tééan, a nɔle munu lé wo sɔ Kazambale lɛ wo lɛ we gi. ’Bɛ é ziin, ’bɛ a boawe valé fuzuobinwe nya.