Bale Lé We Gifezan 12 - Kazambale lé Sebe Sauunu 1979

É we pla pɛniɛnu lɛ

¹ Pɛniɛzan, i gi ’é nana ilé pɛniɛ gyɛle gi, ’ibo nɔ ginanale lɛ ilé pɛniɛ la bléyi va, ’i tawo ilé blibɔmazi ta, fɛnu lé i yuɛ bɔ wo ma, ’i go wo zuo; naa, é a lé bé gi dɔɔ léé, Kazambale é dan i laa lɛ weblele i va we gi, we ’konu lé we ma.

² ’I bli kyɛ dɔle yi ga; té bé nyi si léé, i kɔlɛ é kle ble lo; pɛniɛ gyɛle valé mi boroné la bléyi a boawe nya.

³ I Kɛlɛzan sele ’é dɔ i gi i boroné la bléyi va, yi naané valé lɛɛnu lé wo dan bɔ lɛ yé i dan a fe lɛ léé, wo ’ka sɔ lɛ an lɛ é dɛrɛ lo, wo bɔle ’lɛ.

⁴ Yiri valé fɛnafu koo, moné valé monénénu koo, gunu é dan dɔra lɛ wo yara, yé lagi é dan tié lɛ lɛɛ dale zuo;

⁵ bléyi do é dan bɔ lɛ yé kɔntabinmunu ma é dan nyɔɔn lɛ, yé gɔné plɛplɛnu é dan plin lɛ, yé lomu é dan daan lɛ fɛ zɔnle ma, wolé plɛplɛ nyaa, azama; yé munu lé wo yɛrɛ ginian fɛnɛtinu ta, wo yuɛ gi gunu é dan dɔra lɛ;

⁶ yé kɔn ’léé duoli fee fié lɛ é dan tan lɛ, bléyian va lé wo daan fɛzɔnle ma, ’bɛ bléyi va; wo dan nwa lɛ miané webléyi va, lɛrɛvɔ blɛnnu wɔlɛ gi é dan nyaa lɛ wo ma;

⁷ wo dan kana lɛ gɔsɛnénu giéle lee, yé tawole zi ta di é dan kini lɛ mi gi; mi nwana é dan bɔ lɛ bélé amandéyili vwi bile zo; gangan ma bɛn é dan dɔ lɛ, yé zian va bla ’ka zian kɛla néné é dɛrɛ lo; naa, blami a gona ’é gona, yé wuvɔmunu éé giéan zinu ta;

⁸ gɔɔlifu bale é dan kini lɛ, kyanbɔ é dan ’wii lɛ, bɔ é dan ’wii lɛ ’yi bagi, yé ’yitɔfɛ bale é dan kini lɛ ’yiguru la;

⁹ vungoi é dan nɔla lɛ vun nya, fɛana lé é ke é vini, ana, yé léli é dan go lɛ é ziin Kazambale lé é a nɔ, a va; we ’konu faa bɔle ’lɛ, i Kɛlɛzan sele ’é dɔ i gi ma.

¹⁰ Bale lé we gifezan léma: Boawenu tagɔné, we faa a boawe nya.

We ’wuo dɔna

¹¹ Bale lé we gifezan ’ka wedɔɔzan saa nya é pla lo, é gikinile paa é ziin munu gi, yé é wegɔné kiɛre nagini, yé é wo gi kuli, yé é wo gyɛ ’wo gyɛna.

¹² Bale lé we gifezan kwa kuli kaii léé, ’é dére nénénu ye, yé ’é wo gyɛ é drɔle; webozen dérenu lé.

¹³ Wedɔɔzannu dérenu a bélé foroné zo; dé wa é gyɛle ékeva fɛ dona, wa bélé pɔnténu lé wo wo blin, wo zo; dére ’konu faa si mi do ’léé.

¹⁴ An be, we lé é vo, we konu ’wo we paa i gi ma; sɛbɛpanu kɛlɛle ’ka nyaan lo, yé wedraanle a mi wɔlɛginyaawe nya.

¹⁵ ’Ka tɔné dɔ anlé we ’wuo pla dére lɛ; ’i kana Kazambale lee, yé ’i alé bélidɔwenu tawe kɛlɛ. We lé é a lé blami a kɛlɛ, yee lé ke bɛ.

¹⁶ Naa, Kazambale é dan munu faa lé we ble lɛ wo kɛlɛwe faa yɛrama, yé éé we yɔɔlenu faa yé, dé wezin léoo, dé wenaané léoo, éé a yé.