Bale Lé We Gifezan 11 - Kazambale lé Sebe Sauunu 1979

Wedɔɔzan kɛlɛwenu

¹ ’Ilé fɛblele vuli ’yi yuɛ la, naa, i dan a ye lɛ é ziin é voéla;

² ’bé ke nɔ mi sɔrafié lɛ, mi sɔraa boen‐oo, ’bé nɔ wo lɛ, naa, dé wenaané kyɛn ɛ dan bɔ lɛ tɛrɛ laa? i ’ka a gi dɔɔa lo.

³ Dé latinu boro pa lɛɛ nya, wa nwɛɛn‐an tɛrɛ la; dé yili do dia yirinwana bɛyilazia, ɛɛ, dé é dia yirinwana bɛbolazia, éé voo é diana.

⁴ Mi lé éé gi bɔrɔan fu ma, é ’ka dan fɛ vɔ lɛ lo; yé mi lé éé yuɛ vɔa la gi, é ’ka dan fɛ gyɛ lɛ lo.

⁵ I ’ka fu lé zi dɔɔa lo, yé néwɔlɛ éé kɛla é bu bɔn gi fɛan zo, i ’ka ’bɛ gi dɔɔa lo, a zo duo lé Kazambale lé éé fɛ faa kɛla, i ’ka ’bɛ kɛlɛwe gi dɔɔa é ziin lo.

⁶ ’Ilé fɛ vɔle pélisia bladi, é nyanadi té i flin lo; dé a kyɛn é dan vɔ lɛ a maa? dé a ’ko léé? dé a koɛ léé? i ’ka a gi dɔɔa lo; dé a fiénu a é zimaa? i ’ka ’bɛ gi dɔɔa lo.

⁷ Fɛnafu a néné, yirisan yele a mi gi néné.

⁸ Amalé dé mi lɛɛ kɛlɛ kiɛre tɛrɛ la, a gi ’é nana lɛɛ ’konu faa gi ma, yé ’é gi bɔrɔ gunutinu va yinu lé wo dan kɛlɛ lɛ kiɛre, wo ma ma; we faa lé é dan bɔ lɛ é a boawe nya.