Bale Lé We Gifezan 10 - Kazambale lé Sebe Sauunu 1979

¹ Nyɔnɔtoro galenu éé lasikɔrɔ kɛlɛzan lé nyɔnɔ tɔn dɔa; yé ’tugyɛwe sɛné éé wedɔɔle valé tɔbɔle sɛra.

² Wedɔɔzan bli a é bɛyilazia, yé tavozan bli a é bɛbolazia.

³ Dé tavozan a tawona zia, a ’wuo ’ka a ta lo, yé é ana gɔɔn‐an munu faa lɛ léé, ’tu ’é gyɛ.

⁴ Dé minwiinzan bli nwa i ma, té i si i dɔna lo; bli drɔɔ éé wenyané blɛn yi gaan.

⁵ Maa wenaané do ye tɛrɛ la, é a minwiinzan lé saanle do nya;

⁶ gwɛmazannu woo tɔ blɛn yé, ’té fuablezannu woo tɔ kiéné yé.

⁷ Maa luunu ye tawona wisoonu ta, yé maa mi blɛnnu ye tawona ’wo gane la bélé luunu zo.

⁸ Mi lé éé guru boo, é dan dia lɛ a gi, mi lé éé kɔnguru zanaan, méné é dan suiɛ dɔ lɛ a ma.

⁹ Mi lé éé gɔlɛnu sian, é dan tuo lɛ a nya, yé mi lé éé kyɛ fee gya, éé tuoma.

¹⁰ Dé zaa lɛ ga, yé azan ’ka a lɛ vɔ lɛ lo, é a lé élé plɛplɛ taa pa gɔnɔ fié; naa, we nyian?-?wole éé sié wedɔɔle va.

¹¹ Dé ménéyokɛlɛzan ’ka ana lo, dé méné suiɛdɔ mi ma, ’té ménéyokɛlɛzan ’ka tɔnɔ yé a gi lo.

¹² Wedɔɔzannu ’léé dérenu a zinwe saa nya; naa, tavozan ébo sɛra é lɔlu nya.

¹³ Alé wefele pélisiana a ’tugyɛwe nya, alé wefele ’wuoplana a ’tugyɛwe nyané nya.

¹⁴ Tavozan éé we fé kiɛre. We lé é dan bɔ lɛ, blami ’ka a dɔɔa lo, yé we lé é dan kɛlɛ lɛ a pa gi, de ɛ dan a fe lɛ a lɛɛ?

¹⁵ Tavozan lé nyanama é wɔlɛgi nyaa ’é ma; é ’ka fla zi dɔɔa yé é go fla lo.

¹⁶ Bii tɛrɛ lé i nwiinzan a né kiéné nya, yé ilé mi blɛnnu éé fɛ blé bladi, we tɔntɔn kɛlɛ i lɛ.

¹⁷ Bii tɛrɛ lé i nwiinzan blɛn a bɛn tɔbɔle gizan nya, ’té ilé mi blɛnnu éé fɛ blé é blebléyi va, plɛplɛ yele we ma, dɔrɔ minile we ma kaan lo bɛ, izé a néné.

¹⁸ Dé mi é kun‐anwo, alé kɔngwa éé vɔa a gi; yé dé mi bɛ a tɔɔtɔɔ, alé kɔn éé ’bɔɔan.

¹⁹ Woo fɛ blé zanagyɛle we ma, dɔrɔ éé mi gi nanaan, yé gɔɔli éé we faa lɛ sɔɔan.

²⁰ Té i bale pa minwiinzan blɛn ma lo, dé é a i ’wuogibɔrɔle nyaoo, té i bale pa a ma lo, té i bale pa fuablezannu ma i yiikɔn gi lo; lagi miané é dan go lɛ i dére nya, yé simiané é dan i dére zana dɔɔ lɛ.