Bale Lé We Gifezan 1 - Kazambale lé Sebe Sauunu 1979

Mi lé tɛrɛla a boawe nya

¹ Bale lé we gifezan, David be, Jérusalɛm minwiinzan blɛn, a dére lé ke ’ko.

² Bale lé we gifezan léma: Boawenu tagɔné lé; we faa a boawe nya; boawenu tagɔné lé.

³ Kwa faa lé blami a kulian tɛrɛ la, éé mɛ tɔnɔ yé a maa?

⁴ Mi kulu do éé giéan, yé a do éé bɔraan, ’té tɛrɛ ana yifaama.

⁵ Yiri éé nwaan, ’té yiri éé vɔa, yé é sɔ a lɛ léé, ’é go é ziin é pa gi, yé ’é taa ’é nwa.

⁶ Fu éé goo yirinwana bɛyilazia, yé éé nɔlaan yirinwana bɛbolazia; yé éé nɔlaan é ziin, ’té éé nɔɔan é pa duo gi.

⁷ Yuu faa éé zén‐é wɛyi va, yé wɛyi ’ka fan pelo; fɛana lé wo yara ke, wo vo gona ana.

⁸ Fɛnu faa a nyanama pana, yé mi ’ka bɔa a gi fele lɛ lo; mi yuɛ ’ka kaan yɛrɛ ginile nya lo, yé mi tɔné wɔlɛ gi ’ka nyaan é ma we ’male nya lo.

⁹ Fɛ lé é ke é kyɛn, é dan bɔra lɛ é ziin; we lé é kɛlɛ é kyɛn, é dan kɛlɛ lɛ é ziin. We dɛrɛ do kpen ’ka tɛrɛ la lo.

¹⁰ Dé fɛ do ana, yé wo lé a ma léé, ’i fɛ ’ko ye do, fɛ dɛrɛ lé, ’té fɛ ’ko ana é kyɛn, lɛɛnu lé wo gié kaa ’lɛ é li, wo gi.

¹¹ We kyɛnnu sele ’ka dɔa mi gi lo, yé we lé é dan bɔ lɛ, a sele ’ka dan dɔ lɛ mi voélanu gi lo.

Wenu lé Bale lé we gifezan a ye

¹² Maa, Bale lé we gifezan, maa a Izraɛlnu nwiinzan blɛn nya Jérusalɛm.

¹³ We faa lé éé kɛla tɛrɛ la, maa anbozen nɔ a naginile valé a gi kulile we ma wedɔɔle nya, an bli faa nya; é a nyanama tɔntɔn lé Kazambale a nɔ blaminu lɛ, a nya.

¹⁴ We faa lé woo kɛla tɛrɛ la, maa wo ye; yé bé ye, ’bɛ faa a boawe valé fu zuobinwe nya.

¹⁵ Fɛ plinle ’ka bɔa ébo drɔle lɛ lo, yé fɛ lé é ’ka lo, wo ’ka bɔa a nɔnɔle lɛ lo.

¹⁶ Maa lé an bli gi léé: An tin, yé anlé wedɔɔle mini munu faa lé wo pla Jérusalɛm nwiin an ’lɛ, wozé ta, yé an bli a é fanle wedɔɔle valé ’wuoatawenu kiɛre nya.

¹⁷ Dé mɛ we ɛ ke wedɔɔle nyaa? dé mɛ we ɛ ke tavowe valé ’tugyɛwe nyaa? maa anbo nɔ wo dɔɔle we ma; maa ye léé, ’bɛ é ziin, ’bɛ a fu zuobinle nya.

¹⁸ Naa, dé mi we dɔɔ kiɛre, ’té gibɔrɔ kiɛre a a ma, yé dé mi gikinile lɛ si, ’té alé nyané blele lɛ si.