Amɔs 9 - Kazambale lé Sebe Sauunu 1979

Bale lé mi banwole

¹ Maa Mizan ye é dɔle balebanna ta loru. Yé é léma: ’I fɛ duun wɛyiliwuonu lɛ, fɔɔ yé kɔnpa ma é nyɔɔn, yé wo faa ’wuo ’é ’wii. Maa dan a pɔnénu gyɛ lɛ gwɔun nya za ma; wo va mi do kpen ’ka dan vɔ lɛ fli gi yé é so we lee lo; wo vazan do kpen ’ka dan so lɛ an lee lo.

² Dé wo go fɔɔ gamunu nyananaoo, ’an wo kunwo ana; dé wo go la gioo, maa dan wo zun lɛ.

³ Dé wo yɔɔ Kaamɛl gɔ zoroné ma, maa dan wo gini lɛ ana, yé maa dan wo kun lɛ; dé wo yɔɔ an lee wɛyi wɔlɛ maoo, maa dan a fe lɛ ménénu lɛ léé, ’bɛnu ’é suiɛ dɔ wo ma ’bɛna.

⁴ Dé wo go luu gi ’wo nyanézannu lee, maa dan a fe lɛ léé, gwɔun ’é wo gyɛ za ma ’bɛna. Maa dan an yara dɔ lɛ wo ta, wenyané kɛlɛle wo lɛ we ma, wezin kaan lo.

⁵ Mizan lai sunyanu lé Gakelebale éé bɛ manean tɛrɛ ma yé a ma éé nyɔɔn‐an, ’Té a tamunu faa éé gyɛ boo; Tɛrɛ faa é dan nwa lɛ bélé yuu fanle zo, Yé é dan zun lɛ bélé Éjipiti yuu bélile zo.

⁶ É nyanana kɛlɛ lanu gi, Yé élé fɛna pla kɛlɛ tɛrɛ nwiin; Éé wɛyinu laan, ’Té éé wo sɔɔlaan tɛrɛ yuɛ la; A tɔ lé Gakelebale.

⁷ Gakelebale léma: Izraɛl lé nénu, ka ’ka an lɛ bélé Étiopi munu zo loo? Maa ’ka Izraɛl si lɛ Éjipiti tɛrɛ la bélé fɛan zo lé maa Filisitinu si Kafitɔɔ yé maa Sirinu si Kii, a zo loo?

⁸ Ka ye, Mizan Gakelebale yuɛ a é dɔle bɛntɛrɛ lé we a gyɛ, a ta; maa dan a sɛrɛ lɛ tata tɛrɛ ta, duowo, maa ’ka dan Jakɔb lé munu kulu ga lɛ tata lo. Yee lé Gakelebale a fe.

⁹ Ka ye, maa dan an dére do fe lɛ, yé maa dan Izraɛlnu fɛɛ lɛ bɛngɔnɔnu faa méléna, bélé fɛan zo lé woo ’sa fɛɛan guli ta, ’té a wɔlɛ do kpen ’ka diaan tɛrɛ va lo, a zo.

¹⁰ Anlé munu va wenyanékɛlɛzannu faa lé wa fé léé, we tɔntɔn ’ka dan bɔ lɛ ’wo lɛ lo, wo dan wo faa gyɛ lɛ gwɔun nya.

Izraɛl é dan dɔ lɛ é dɔna é voéla

¹¹ ’Bɛ bléyi va maa dan David kulu nwa lɛ é ziin; maa dan wolé gɔrɔnu burunanu béé lɛ, yé maa dan wolé fɛ sɛrɛlenu dɔ lɛ wo pa gi, yé maa dan wo dɔ lɛ ’wo dɔna bélé é vinin zé zo.

¹² Yé Édom mi pɔnénu valé bɛn faa lé an tɔ ke wo ma, wo dan kɛlɛ lɛ David kulu zé nya. Gakelebale lé é dan we ’konu lɛ sɔɔ lɛ, a zo lé é a fe.

¹³ Gakelebale léma: Ka ye, a yinu é dan bɔ lɛ, Yé fɛ gyɛle tɔɔn, féipazan é dan féi pa lɛ; Dɔrɔyi borole tɔɔn, wo dan fɛ vɔ lɛ. Dɔrɔ dɛrɛ é dan kɛlɛ lɛ di bélé ’yi lé éé yoroan gɔnu nwiin, ’Té éé yoroan gɔpanénu faa nwiin, a zo.

¹⁴ Anlé munu Izraɛl lé wo ke luu gi, maa dan da lɛ wo nya ’wo pa gi; Wo dan fla pa lɛ é ’bin la, yé wo dan nyana lɛ ana. Wo dan dɔrɔ féi pa lɛ, yé wo dan a ’yi mini lɛ; Wo dan féinu pa lɛ yé wo dan a ma fɛnu ble lɛ.

¹⁵ Maa dan wo nyana lɛ kli wolé tɛrɛ la, Yé tɛrɛ lé maa a nɔ wo lɛ, wo ’ka dan wo si lɛ ana lo. A zo lé Gakelebale, ilé Bale a fe.