Amɔs 8 - Kazambale lé Sebe Sauunu 1979

É yiliporo kyɛɛné do ye yuɛzi gi

¹ Mizan Gakelebale we ’ko gɔɔn an lɛ yuɛ zi gi. Ka yua, kyɛɛné do lé ke é fanle yiliporo nya, yee lé.

² É lé an lɛ léé: Amɔs, i mɛ fɛ yéé? Yé maa a zi pa léé: An kyɛɛné do yé, ’té yiliporo a a gi. Yé Gakelebale lé an lɛ léé: Anlé munu Izraɛl bɔ wozé ’wuoplana; an ’ka dan wo ma we vo lɛ é dɛrɛ lo.

³ ’Bɛ yi la, fuakɔn gi lɛrɛvɔle é dan kɛlɛ lɛ dunnule nya. Wo dan migalenu kiɛre vuli lɛ fɛfaana, ’té wo ta a é dɔle tétété. Yee lé Mizan Gakelebale a fe.

Izraɛl zé nyaa

⁴ ’Kaa lé ka tɔnanénu tablé, ’té ka tɛrɛ ’ko la wenaané bɔmazannu zanaan a gi, ’ka tɔné dɔ we ’ko lɛ.

⁵ Ka léma: Yiba, mɛ bléyi va lé moné dɛrɛ yi éé giéan yé ko ’sa daan? Mɛ bléyi va lé flinyi éé giéan, yé ko kolé boonu lɛ soo? Ko dan fɛdangifɛ wɔra lɛ ékeva yé ko dan a vlɛ taa pa lɛ, ko dan kilo kɛlɛ lɛ dabli nya;

⁶ ’bɛ zo lé ko dan nyanaizénlazannu lɔ lɛ gɔɔli nya, yé ko dan nyanégyɛzannu lɔ lɛ sawala ba fié nya, yé ko dan ’sanyénénu dan lɛ.

⁷ Gakelebale Jakɔb tɔbɔmazan ’nyɔɔn léé, wo kɛlɛwe do kpen ’ka dan saan lɛ ’é gi lo.

⁸ We ’konu ma‐an di é dan kini lɛ tɛrɛ ’ko la munu gi loo? Yé a tamunu ’ka dan kɛlɛ lɛ gyɛbozannu nya loo? Ana tɛrɛ faa é dan nwa lɛ bélé yuu fanle zo; é dan nwa lɛ yé é zun é pa gi bélé Éjipiti yuu bélile zo.

⁹ Mizan Gakelebale léma: ’Bɛ yi nya, maa dan yiri vɔ lɛ é yiéyi, yé gunu é dan dɔra lɛ tɛrɛ la yiéyi bléyi va;

¹⁰ maa dan kalé fɛtinu nɔla lɛ gyɛbole nya, yé maa dan kalé lɛrɛnu faa nɔla lɛ wuvɔlenu nya. Maa dan bɔlɔ vɔ lɛ mi faa tɛrɛ la, yé maa dan mi faa gyɛ lɛ palo nya. Maa dan mi faa kɛlɛ lɛ gyɛbozannu nya, bélé mi be wɔlɛ do kpen gyɛbole zo, yé a ’wuo é dan pla lɛ é nyanale bélé ziri zo.

¹¹ Mizan Gakelebale léma: Ka ye, a yinu é dan bɔ lɛ yé maa dan da lɛ lɔrɔ nya tɛrɛ ’ko ta; buru valé ’yian wo dan vuru lɛ wo ma lo, naa, Gakelebale dére ’male ɛ dan vuru lɛ wo ma.

¹² Wo dan nɔɔ lɛ wɛyi fié méléna, ’té woo sié yirinwana bɛbolazia, yé wo go yirinwanazia; wo dan go lɛ ’ko, yé wo da ’ko, Gakelebale dére ’male we ma, yé wo ’ka dan a ’ma lɛ lo.

¹³ ’Bɛ yi nya blɛn nɔnɔminu valé pɛniɛnu é dan ga lɛ ’yiminilɔrɔ nya.

¹⁴ Samarinu lé wenyané lé ke ’wolé yonu nya, woo ’bɛnu ’nyɔɔn‐an yé wo léé: Dan, ilé bale tɔ gi, Bɛɛ‐Sééba zi, i tɔ gi; naa, munu faa lé wa kɛla a zo, wo dan dia lɛ yé wo ’ka dan nwa lɛ é dɛrɛ lo.