Amɔs 7 - Kazambale lé Sebe Sauunu 1979

É gangannu ye yuɛzi gi

¹ Mizan Gakelebale we do gɔɔn an lɛ yuɛzi gi. Ka yua, é gangannu kɛlɛ lu tolu bɔbléyi va, ’té minwiinzan blɛn a vininzan bɔi bɛ, yee lé.

² Yé gangannu ’ko a tɛrɛ la lu faa blena aan wo, maa léma: Mizan Gakelebale, ilé zanté, Jakɔb é dan vo lɛ ana kaa? Naa, é a tɔɔtɔɔ.

³ Gakelebale bli nɔla ’bɛ ma. Gakelebale léma: We ’ko ’ka dan bɔ lɛ é dɛrɛ lo.

É kyɛ ye yuɛzi gi

⁴ Mizan Gakelebale we do gɔɔn an lɛ yuɛzi gi. Ka yua, Mizan Gakelebale a we lɛdɔle mi gi kyɛ nya zana dɔɔna, yé kyɛ a blena guru blɛn gi, yé féi kyɛ a blena.

⁵ Yé maa léé: Mizan Gakelebale, é sɔ. Jakɔb é dan vo lɛ ana kaa? Naa, é a tɔɔtɔɔ.

⁶ Gakelebale bli nɔla ’bɛ ma. Mizan Gakelebale léma: ’Bɛ we ’ko é ziin, ’bɛ ’ka dan bɔ lɛ é dɛrɛ lo.

É nivoo ye yuɛzi gi

⁷ É we do gɔɔn an lɛ yuɛzi gi. Mizan a é dɔle gɔrɔguru lé é ke é drɔle tegelee, a ta, ’té nivoo a a lee.

⁸ Gakelebale lé an lɛ léé: Amɔs, i mɛ fɛ yéé? Maa a zi pa léé: Nivoo do lé. Yé Mizan léé: Maa dan anlé munu Izraɛl dan lɛ nivoo nya. Maa ’ka dan wo ma we vo lɛ é dɛrɛ lo.

⁹ Maa dan Izak lé yobannanu faa sɛrɛ lɛ; maa dan Izraɛl lé yokɔnnu zana lɛ, yé maa dan nwa lɛ Jéroboam lé munu ma, gwɔun nya an lee.

Amɔs valé Amasia

¹⁰ Amasia lé ke yobanzan nya Bétɛl, é we pa zia Izraɛl nwiinzan blɛn Jéroboam lɛ zia léé: Amɔs a i ma we blena Izraɛl munu méléna; dére faa lé é ke a fena, ko ’ka nyi sié é dɛrɛ lo.

¹¹ Naa, we lé Amɔs ke a fena, yee lé ke léé, Jéroboam é dan ga lɛ gwɔun ’léé, yé wo dan go lɛ Izraɛl munu nya luu gi baa.

¹² Yé Amasia lé Amɔs lɛ léé: Yuɛziyezan, ’i fwi ’ko, ’i go Juda tɛrɛ la; ’i fɛ ble ana mi yé ’i balelawe fe ’bɛna.

¹³ Naa, té i vo balelawe fena Bétɛl ’ko lo. Minwiinzan blɛn lé yobanna lé; alé fuakɔn a ’ko.

¹⁴ Amɔs a zi pa Amasia lɛ léé: Maa ’ka balelawefezan nya lo, yé maa ’ka balelawefezan be nya lo; maa a ’blatabinzan nya, yé maa a sikomɔyili féipazan nya.

¹⁵ Gakelebale an si trubɛ zuo, yé é lé an lɛ léé: ’I go, ’i balelawe fe anlé munu Izraɛl lɛ.

¹⁶ Bii lé i ke a fena léé, té an balelawe fe Izraɛl tɔ nya lo, té an we fe Izak lé munu tɔ nya lo bɛ, ’i tɔné dɔ sin Gakelebale dére lɛ.

¹⁷ Gakelebale léma: We ’ko ma lé i na é dan kɛlɛ lɛ bɔrɔdɛ le nya fla; wo dan i benu valé i lunu gyɛ lɛ gwɔun nya; wo dan ilé féi guli lɛ bale ma; naa, bii é dan ga lɛ tɛrɛ lé é ’ka tegele lo, a ta, yé wo dan go lɛ Izraɛl nya luu gi baa.