Amɔs 6 - Kazambale lé Sebe Sauunu 1979

Wo Izraɛl sɛrɛ

¹ Munu lé wo ke é nyanale drɔɔ Siɔn, ’té wa é nyanale wobo ma duaa Samari gɔ nwiin, we tɔntɔn ’é kɛlɛ wo lɛ ma. Bɛntɛrɛnu va bɛntɛrɛ vininzan lé mi blɛnnu lé Izraɛl éé goo wo va bɛ, woo lé.

² Ka go Kalné yé ’ka nagini; ’ka si ’bɛna yé ’ka go fla blɛn Amat la; ’ka go tɛrɛ zia Gat, Filisiti tɛrɛ la. Fla ’konu vɔle a ma mini kalé tɛrɛ fié ’ko, wo lɛɛ? Wolé tɛrɛ blɛn mini kazé lɛɛ?

³ É dɔ ka gi léé, ka a wenaané bɔyi biéna é zuo, dɔlé ’té ka a glawe saa kɛlɛyi biéna é wo.

⁴ Woo yian vwii suiɛ liinu ta; woo gi soian wolé yialafɛ tɔɔtɔɔnu ta; woo trubɛnu va ’blanénu blé, woo diriné nyɔnɔzannu blé.

⁵ Woo boalɛrɛnu vɔa kpélé va. É dɔ wo gi léé, ’wa lɛrɛvɔafɛnu gyɛzannu baba nya, bélé David zo.

⁶ Woo nwɛ minian kana blɛnnu gi; woo nyɔnɔwezan baba giéan ’wo ma, yé wo gi kyɛ ’ka dɔa Jozɛfu guru zanale a gi we ma lo.

⁷ Amalé wo dan go lɛ luu gi é vinin; munu ’konu lé woobo no tɛrɛla ginanale lɛ, wolé gi nana siaalenu é dan nyaa lɛ.

⁸ Mizan Gakelebale ébo ’nyɔɔn, Gakelebale, lai sunyanu lé Bale léma: Maa nyé yélié Jakɔb lé boblɛn ma, yé alé fuakɔnnu za a an gi; maa dan fla valé é tafɛnu faa pa lɛ munu lee.

⁹ Dé mi do gɔnɔlazannu vo vu, wo faa é dan ga lɛ.

¹⁰ Dé alé mi do da a gale sia lɛ a kyɛblele we ma, dé é a a va léé, é a gale si kɔn‐in, é dan a laa lɛ kɔnsorogizan lee léé: Mi do a i va é ziin bɛɛ? Yé mi ’ko é dan a zi pa lɛ a lɛ léé: Mi do ’ka ana lo. Yé é dan a fe lɛ ’bɛ lɛ léé: ’I tadɔ. Gakelebale tɔ fe bléyian ke ’ko lo.

¹¹ Naa, Gakelebale a fe léé: Maa dan kɔn blɛn guru zana lɛ a gi, yé maa dan kɔn kiéné kɛlɛ lɛ é ’bin nya.

¹² Wisoo éé vlanburuwo gɔlɛ taa? Woo nyana woo ana dirinu nyaa? Naa ’kaa, ka we drɔle nɔla migyɛlale nya, yé ka we tegele nɔla koi nyɔnɔ nya.

¹³ Fɛ lé é ke fɛ pla nya, ’bɛ ma lé ka gi éé nanaan, yé ka léé, kobo lé plɛplɛ ma‐an ko ’lɛ dɔ loo?

¹⁴ Bɛwemalé, ’kaa Izraɛlnu, maa dan bɛn do nwa lɛ ka ma, yé é dan yaa lɛ ka ta, é sia Amat gɔrɔ ’léé fɔɔ yé é bɔ bwi la ’yiyoro plɛplɛ ma. A zo lé Gakelebale, lai sunyanu lé Bale a fe.