Amɔs 5 - Kazambale lé Sebe Sauunu 1979

Bale munu laa léé, ’wo bli nɔla

¹ Izraɛlnu, ’ka tɔné dɔ dére ’ko lɛ; ka mawe lé maa a gona a fena, ’ka tɔné dɔ a lɛ.

² Izraɛl blɛnzan dia Yé é ’ka dan nwa lɛ é dɛrɛ lo; É a é yiale tɛrɛ va, Mi do ’ka a nwana lo.

³ Naa, Mizan Gakelebale léma: Fla lé é mi wuru soru pa zia guli danna, wo va mi yɔ soru ɛ dan vo lɛ. Yé fla lé é mi yɔ soru pa zia guli danna, wo va mi vu ɛ dan vo lɛ Izraɛl zé nya.

⁴ Gakelebale we fe Izraɛlnu lɛ yé é léma: ’Ka an nagini, yé ka dan vo lɛ é yuɛma.

⁵ Té ka Bétɛl nagini lo; té ka go Gilgal lo; té ka gié Bɛɛ‐Sééba lo. Naa, wo dan Gilgal si lɛ, yé wo dan Bétɛl sɛrɛ lɛ.

⁶ ’Ka Gakelebale nagini yé ka dan vo lɛ é yuɛma. ’Ka kana, dé é da bi Jozɛfu lé munu ma bélé kyɛ zo, yé kyɛ ’ko a ble, ’té mi do kpen ’ka Bétɛl yé ’bɛ a diri lo.

⁷ Ka lé ka we drɔle nɔlaan weple nya, ’té ka we tegele zɔn‐o ka gane nya, kalé we lé maa fe bɛ.

⁸ É Pléiade valé Orion monénénu kɛlɛ; Éé gunu ti nɔlaan tukinile nya, Éé fɛnafu kɛla gunu nya béli tanle we gi; Éé wɛyi laan, Yé éé wo sɔɔlaan tɛrɛ la; A tɔ lé Gakelebale.

⁹ Yee ɛ mi plɛplɛnu guru ’wiié Yé éé fla plɛplɛnu guru zanaan a gi.

¹⁰ Mi lé é we pla wo lɛ weblena, woo ’bɛzan za paan, yé mi lé éé we fé é boen ma, woo serele boo ’bɛzan ma.

¹¹ É ziin, ka nyanaizénlazannu zɔn ka gane nya; ka ’sa si wo lee gla nya, blɛfɛ tɔ gi; ka kɔn dɔ gɔlɛ nyaalenu nya, naa, ka ’ka dan nyana lɛ wo gi lo. Ka dɔrɔféi nɔnɔminu pa, naa, ka ’ka dan ana dɔrɔ mini lɛ lo.

¹² Naa, maa gi dɔɔ léé, kalé wenyané blɛnnu a kiɛre, kalé wenyanénu gi gyɛ. Ka yaan mi tegelenu ta, ka blɛfɛ sié gla nya, yé ka nyanégyɛmunu lé se sié wo lee weblena.

¹³ Bɛwemalé bléyi ’ko va, wedɔɔzan éé tadɔa; naa, bléyi ’ko a bléyi naané nya.

¹⁴ ’Ka wezin kɛlɛle kwa kuli, té ka wenaané kɛlɛ lo, ka vole é yuɛma we gi, yé ’bɛ zo lé Gakelebale lai sunyanu lé Bale é dan kɛlɛ lɛ ka va, fɛan zo lé ka a fena, a zo.

¹⁵ ’Ka wenyané za pa, yé wezin ’é sɔ ka lɛ ma, ’ka we ble é blena bléyi faa va ma. Dé Gakelebale, lai sunyanu lé Bale nyanai é dan zén lɛ Jozɛfu kulu pɔnénu taa?

¹⁶ Bɛwemalé Gakelebale, lai sunyanu lé Bale, Mizan léma: Wo dan wuvɔ lɛ fla vuun la fɛfaana; wo dan siaa lɛ flaworo dii léé, an bu loo! an ti loo! Wo dan féipazan laa lɛ gyɛ bole we ma, yé wo dan gyɛ wuvɔzannu laa lɛ, wuvɔle we ma.

¹⁷ Dé maa gié ka méléna, wo dan wuvɔ lɛ dɔrɔféi faa la. A zo lé Gakelebale a fe.

¹⁸ Munu lé é sɔ wo lɛ léé, Gakelebale lé yi ’é bɔ, we tɔntɔn a wozé nya. É dɔ ka gi léé, mɛ we ɛ dan bɔ lɛ ka ma Gakelebale lé yi nyaa? É dan kɛlɛ lɛ gunudɔrayi nya, fɛnafu ’ka dan kɛlɛ lɛ lo.

¹⁹ Ka dan kɛlɛ lɛ bélé mi lé é ke vlan buruna golizra lee, yé yee valé kua kee, a zo; bélé mi lé é vɔ élé kɔn gi yɔɔle we ma, yé é bɛ tɛn kɔnguru ma yé méné suiɛ dɔ a ma, a zo.

²⁰ Gakelebale lé yi ’ka gunudɔrayi nya lo ’naan, é a fɛnafu yi nyaa? É ’ka yɛrɛyeyi nya lo, é a gunu tiritiri ɛ dɔrayi nya.

²¹ Maa kalé fɛtinu za paan, maa nyé yélié wo ma; ka zénle ékema ’ka sɔ lɛ an lɛ lo.

²² Dé ka an ban balebanwi lé wa kyɛ blé, ’bɛ valé blɛfɛ nyaoo, é ’ka sɔa an lɛ kiéné boenwo lo; diriné nyɔnɔzannu lé ka bɔvɔ saraka bo wo nya, wo ’ka an yuɛi bɔa lo.

²³ ’Ka si an yuɛi kalé lɛrɛvɔle nya; maa ’ka an tɔné dɔna kalé kpélénu dére lɛ lo.

²⁴ Naa, wedrɔle ’é kɛlɛ bélé ’yiyoro zo, yé we tegele ’é kɛlɛ bélé ’yiyoro plɛplɛ lé é ’ka bélié lo, a zo.

²⁵ Izraɛlnu, lɛɛ yɔ fié wuo bwi gi ka an baan? Ka blɛfɛ nɔ an lɛɛ?

²⁶ Kalé yo lé sɔkɔn koo, kalé miyilinu dɔlafɛ koo, yo monéné foto lé ka kɛlɛ kabo lɛ koo, ’ka wo si

²⁷ yé maa dan go lɛ ka faa nya luu gi Damas zi. A zo lé Gakelebale a fe; a tɔ lé lai sunyanu lé Bale.