Amɔs 4 - Kazambale lé Sebe Sauunu 1979

¹ ’Kaa Bazan diridanu lé ka ke Samari gɔ nwiin, ’kaa lé ka yaan nyanaizénlazannu ta, ’té ka tɔnanénu wiian, ’té ka fé ka zananu lɛ léé, ’ka da a nya, kaa mini, ’ka tɔné dɔ dére ’ko lɛ:

² Mizan Gakelebale ’é kɛlɛle sauun ’nyɔɔn léé, ka ye, kazé yi é dan bɔ lɛ, yé maa dan ka sia lɛ kɔ blɛnnu nya, yé maa dan kalé nénu sia lɛ kɔnu nya.

³ Ka faa dan bɔra lɛ gɔrɔ buruna ékeva yé wo dan ka vɔ lɛ guliyɔɔkɔn gi. A zo lé Gakelebale a fe.

Izraɛl ’ka we maan lo

^4-5 Mizan Gakelebale léma: ’Ka go Bétɛl, ’ka wenyané kɛlɛ. ’Ka go Gilgal, ’ka wenyané taa kɛlɛ. ’Ka saraka bo tu valé é kinile ma, ’kalé fɛvuzanu nɔ yi yaa gɔnɔ do. ’Kalé bɔvɔ sarakanu bo lévɛn nya wo va. ’Kalé bli drɔɔ blɛnu zuo fe, ’ka a zana dɔɔ. ’Bɛ ɛ sɔ ’kaa Izraɛlnu lɛ.

⁶ Yé maa ɛ da lɔrɔ nya kalé fla blɛn faa ta, yé maa fɛblele vuru ka ma ka nyananu na. Dé an ’bɛ kɛlɛoo, ka ’ka da lɛ an va ka pa gi lo. A zo lé Gakelebale a fe.

⁷ Yé maa lɛɛ nyané kɛlɛ ka lɛ, ’té kalé fɛgyɛmoné vo yaa; maa lɛɛ da fla do la, yé maa ’ka lɛɛ da lɛ fla do ta lo. Maa lɛɛ da féi do ta, yé féi lé maa ’ka lɛɛ da lɛ ’bɛ ta lo, ’bɛ ga.

⁸ Fla fié, fla yaa wo go fla bɛ ta ’yi minile we gi, yé ’yiminilɔrɔ ’ka si lɛ wo ma lo. Dé an ’bɛ kɛlɛoo, ka ’ka da lɛ an va ka pa gi lo. A zo lé Gakelebale a fe.

⁹ Maa kalé féifɛnu gyɛ gyɛ nya, yé wo toro bɔ; kalé zianféinu koo, kalé dɔrɔféinu koo, kalé bɔrɔyilinu koo, kalé ɔliviyilinu koo, gangannu wo ble. Dé an ’bɛ kɛlɛoo, ka ’ka da lɛ an va ka pa gi lo. A zo lé Gakelebale a fe.

¹⁰ Maa ka gyɛ migyɛgyɛ nya bélé Éjipiti tɛrɛ la zé zo; maa kalé pɛniɛnu gyɛ gwɔun nya, yé maa zi nɔ léé, wo kalé wisoonu si. Maa ka nyanana gin dɔ ka nyé gi; dé an ’bɛ kɛlɛoo, ka ’ka da lɛ an va ka pa gi lo. A zo lé Gakelebale a fe.

¹¹ Maa ka zana a gi, Sɔdɔm valé Gɔmɔɔ zé kɛlɛ fɛan zo, a zo; maa ka kɛlɛ bélé kyɛpéli lé wa si kyɛ va gla nya, a zo. Dé an ’bɛ kɛlɛoo, ka ’ka da lɛ an va ka pa gi lo. A zo lé Gakelebale a fe.

¹² Bɛwemalé, Izraɛl, maa dan we kɛlɛ lɛ i lɛ yee ɛ zo; yé maa dan yee duo kɛlɛ lɛ ka lɛ, amalé oo Izraɛl, ’ka ma’lɛrɛ keele kalé Bale nya we gi.

¹³ Naa, mi lé é gɔ blɛnnu kɛlɛ yé é fu kɛlɛ, Yé éé bɔn‐in bɔrɔmawe gɔɔn‐an blami lɛ, Yee lé éé tu kinile nɔlaan gunu nya, ’Té éé tawoo tɛrɛ la fɛna nwalenu na, yee lé ke bɛ; A tɔ lé Gakelebale, lai sunyanu lé Bale.