Amɔs 3 - Kazambale lé Sebe Sauunu 1979

¹ ’Kaa Izraɛlnu, ’ka tɔné dɔ dére ’ko lé maa Gakelebale a fe ka ma, a lɛ; migɔnɔ faa lé maa wo si Éjipiti tɛrɛ la, wo ma we lé maa ke a fena.

² ’Kaa do kpen lé maa ka si tɛrɛ la migɔnɔnu faa va, bɛwemalé maa dan we lɛdɔ lɛ ka gi, kalé wenyanénu faa lé we ma.

³ Dé mi fié bli ’ka do lo, woo tawoo ékeva kaa?

⁴ Dé golizra ’ka tan é blefɛ ye lɛ lo ’naan, éé gi gunuan pɔrɔ gii? Dé golizrané ’ka tan wi gyɛ lɛ lo ’naan, éé siaan é yɛrɛ gii?

⁵ Dé wo ’ka tan séli vɔ lɛ lo ’naan, éé miané kunwoo? Dé wi ’ka tan vɔ lɛ san ’léé lo ’naan, éé biéan é plaa?

⁶ Dé wo béli fɛn fla, kana ’ka zén‐é munu gi loo? Wenaané do bɔ fla, ’té é ’ka sié Gakelebale va loo?

⁷ Naa, Mizan Gakelebale ’ka we kɛla é pla lo, ’té dé é ’ka tan é giwe yɔɔle ga vɔ lɛ é leezannu balelayezannu la lo.

⁸ Dé golizra we ’naan, kana ’ka vɔa de ɛ gi loo? Dé Mizan Gakelebale a wena ’naan, de ɛ ’ka kɔɔn balelawe fé loo?

Samari zé ’wuoplana

⁹ Bale léma: ’Ka we zana dɔɔ fuakɔnnu gi Azdɔd tɛrɛ la, ’bɛ valé Éjipiti tɛrɛ la; ’ka fe léma: ’Ka zén ékeva Samari gɔnu nwiin, yé Samarinu bɔ éé gya fɛan zo, yé ka a ye; wa glawe kɛlɛna fɛan zo, yé ka a ye.

¹⁰ Gakelebale léma: Wo ’ka wedrɔle kɛlɛle gi dɔɔa lo; fɛnu lé wa si gla valé ta plɛplɛ nya, woo wo tééan ’wolé fuakɔnnu gi.

¹¹ Bɛwemalé Mizan Gakelebale léma: Ka nyanézannu é dan kalé tɛrɛ zi lɛ sɔɔ lɛ; wo dan kalé plɛplɛ sɛrɛ lɛ, yé wo dan ’wii lɛ kalé fuakɔnnu ta.

¹² Gakelebale léma: Dé ’bla pin fié léé, dé a tɔné kuru léé, ’blatabinzan éé wo soo golizra ’léé fɛan zo, Izraɛlnu lé wo ke é nyanale Samari blin blɛn valé sɔ vlɛzan lé wo si Damas, wo ta, wo dan so lɛ we lee a zo.

¹³ Mizan Gakelebale, lai sunyanu lé Bale léma: ’Ka tɔné dɔ yé ’ka we ’ko lɛ kini Jakɔb lé munu lɛ léé:

¹⁴ Yian nya lé an dan we lɛdɔ lɛ Izraɛlnu gi wolé bélidɔwe sɛrɛlenu lé we ma, yobannanu lé wo ke Bétɛl, maa dan wo sɛrɛ lɛ; maa dan wo bélinu yéli lɛ yé wo dan dia lɛ tɛrɛ va.

¹⁵ Maa dan dunu bléyi va kɔnnu valé kyɛyee bléyi va kɔnnu zana lɛ; maa dan vwii suiɛ kɔnnu zana lɛ, yé tɔzannu lé kɔnnu é dan san lɛ. A zo lé Gakelebale a fe.